88
[Psalm Lun Tulik Natul Korah; Ac Heman, Mwet Ezra]
Sie Pang In Suk Kasru
1 O LEUM GOD su langoeyu, nga wowoyak ac tung len fon,
Ac ke fong nga tuku nu ye motom.
2 Lohng pre luk,
Lipsre tung luk in suk kasru!
3 Tuh mwe keok puspis putati nu fuk
Ac nga apkuran in misa.
4 Nga oana elos nukewa su apkuran in misa;
Wanginla ku luk.
5 Sisila nga inmasrlon mwet misa,
Nga oana mwet su anwuki ac pukpuki in kulyuk uh —
Oana elos su kom tiana sifil esam,
Su kom fah tia ku in sifilpa kasru.
6 Kom sisyula nu in lufin mas loallana,
Nu in luf se su arulana lohsr ac loal.
7 Mulat lom putati toasr nu fuk
Ac nga itungyuki ye noa in kasrkusrak lom.
8 Kom oru tuh mwet kawuk luk in sisyula,
Ac oru tuh nga in oana mwe srungayuk selos.
Nga kauli ac tia ku in kaingkunla.
9 Mutuk losrla ke keok luk,
LEUM GOD, nga sralak pouk
Ac pre nu sum len nukewa.
10 Ya kom ac oru ma sakirik usrnguk nu sin mwet misa?
Ya elos ac tukakek ac kaksakin kom?
11 Ya lungse kawil lom srumunyuk in kulyuk uh?
Ya oaru lom srumunyuk ke acn in kunausten?
12 Ya mwenmen lom liyeyuk in acn lohsr uh,
Ku wo lom liyeyuk ke acn sin mwet mulkinyukla uh?
13 LEUM GOD, nga pre nu sum in kasreyu.
Nga pre nu sum ke lotutang nukewa.
14 Efu ku kom sisyula, LEUM GOD?
Efu ku kom ngetla likiyu?
15 Nga nuna keok ac apkuran nu ke misa e ke nga srikyak,
Nga totola ke ma toasr su kom kaiyu kac.
16 Mulat upa lom itungyuwi —
Mwe aksangeng lom kunausyula.
17 Ma inge apinyula oana sronot ke len nufon,
Ac kuhlusyuwi ke siska nukewa.
18 Finne kawuk fototo luk, kom oru elos sisyula,
Ac lohsr mukena pa nga liye uh.