BOOK AKAKOSR
90
(Psalm 90—106)
[Pre lal Moses, Mwet lun God]
God Ac Mwet Uh
1 O Leum, kom nuna nien muta lasr.
2 Meet liki kom oru tuh inging uh in sikyak,
Ku oakiya faclu,
Kom nuna God oemeet me,
Oayapa nu tok ma pahtpat.
3 Kom sap mwet uh in folokla nu ke fohk,
Kom ekululosla nu ke kutkut, ma elos orekla kac.
4 Sie tausin yac oana len se nu sum;
Oana ekea, su somla tari,
Oana sie ao fototo ke fong.2 Pet 3:8
5 Oana sie sronot, kom pahtkakinkutla;
Moul lasr tia loes liki sie mweme.
Kut oana mah ma srunak ke lotutang
6 Ac kapak ac farngelik,
Na paola ac misa ke ekela.
7 Kut kunausyukla ke mulat lom,
Kut fosrngala ke kasrkusrak lom.
8 Kom filiya ma koluk lasr ye motom,
Ac ma koluk lukma lasr yen kom ku in liye.
9 Moul lasr akfototoyeyuk ke kasrkusrak lom,
Ac wanginla oana sie osfek.
10 Lusen moul lasr yac itngoul na —
Ac kut fin ku na, ac sun yac oalngoul,
Tuh wanginna ma kut liye kac sayen mwe lokoalok ac asor.
Moul lasr uh sa na safla, ac kut wanginla.
11 Su nu pula kuiyen sulung lom?
Su etu lupan sangeng ma ac tuku ke kasrkusrak lom?
12 Luti nu sesr in etu fototoiyen moul lasr
Tu kut fah ku in lalmwetmet.
13 Kom ac mulat nwe ngac?
O LEUM GOD, pakomuta mwet kulansap lom!
14 Nwekkutla ke lungse kawil lom ke kais sie lotutang,
Tuh kut fah ku in on ac insewowo in moul lasr nufon.
15 Akenganye kut inge, in oana lupan asor su kom tuh ase nu sesr
In yac puspis su kom tuh akkeokye kut kac.
16 Lela kut, mwet kulansap lom, in liye orekma ku lom;
Lela fwil natusr tok in liye ku wolana lom.
17 O LEUM GOD lasr, lela mwe insewowo lom in wi kut.
Ase nu sesr wo ouiya in ma nukewa kut oru!