148
Sie Pang Nu Sin Ma Orekla Nukewa In Kaksakin God
1 Kaksakin LEUM GOD!
Kaksakin LEUM GOD inkusrao me,
Kowos su muta yen fulat lucng.
2 Kaksakunul, lipufan lal nukewa
Ac un mwet ku lal inkusrao.
3 Faht ac malem, kowos in kaksakunul,
Itu saromrom, kowos in kaksakunul.
4 Kaksakunul, acn fulatlana inkusrao,
Oayapa kof su oan lucng liki kusrao.Gen 1:6–7; Psa 104:3
5 Lela elos nukewa in kaksakin Inen LEUM GOD!
God El sapsap na, ac ma inge orekla.
6 Ke sap ku lal, ma inge oakiyuki yen selos ma pahtpat,
Ac elos tia ku in srola liki.
7 Kaksakin LEUM GOD fin faclu me,
Kowos ma sulallal lulap inkof uh, oayapa yen loal nukewa meoa;
8 Sarom ac af yohk kosra, snow ac pukunyeng uh,
Paka su akos pac sap lal.
9 Kaksakunul, kowos eol ac inging uh,
Insak uh, ac sak ma isus fahko,
10 Kosro lemnak, ac kosro muna,
Ma orakrak ke sia, ac won sohksok nukewa.
11 Kaksakunul, kowos tokosra uh, ac mutanfahl nukewa,
Mwet leum, ac mwet kol nukewa fin faclu,
12 Mutan fusr ac mukul fusr,
Mwet matu ac oayapa tulik.
13 Lela elos nukewa in kaksakin Inen LEUM GOD!
Tuh Inel fulat liki ine nukewa saya.
Wolana lal oan lucng liki faclu ac kusrao.
14 El oru tuh facl sel in ku,
Tuh mwet lal nukewa in kaksakunul —
Aok mwet Israel, su arulana saok sel.
Kaksakin LEUM GOD!