3
Ma Koluk Lun Jerusalem Ac Moliyukla Lal
1 Acn Jerusalem ac musalla, sie siti olafohkfok ac tunyuna, su akkeokye mwet lal sifacna. 2 El tuh tia porongo LEUM GOD, ku insewowo in eis kas in kaiyuk lal. El tia filiya lulalfongi lal in LEUM GOD, ku suk kasru sel. 3 Mwet leum lun acn we elos oana lion ngutngut; mwet nununku we oana kosro wolf masrinsral su arulana rapku ac tia lela soko sri in oan nu ke lotu tok uh. 4 Mwet palu elos tiana oru ma kunalos ac elos kutasrik; mwet tol elos akfohkfokyela ma mutal ac ikil ma sap lun God in wo nu selos sifacna. 5 Tusruktu LEUM GOD El srakna oasr in siti uh; El oru ma suwohs ac tia ku in oru ma sufal. Lotutang nukewa El tia tui in oru nununku suwohs nu sin mwet lal. A ne ouinge, mwet sesuwos we srakna oru na ma koluk ac tia mwekin.
6 LEUM GOD El fahk, “Nga sukela mutunfacl puspis. Nga kunausla siti selos ac filiya pot ac tower ke siti inge in musalla na oan. Siti uh wanginla mwet we, inkanek uh oalalla — wangin mwet lula. 7 Nga tuh nunku mu ma inge ac tuh oru mwet luk in asmakla ac akfulatye kaiyuk luk, ac tia mulkunla mwe luti luk nu selos. A tia paht na elos sifil oru koluk oana meet ah.
8 Ac LEUM GOD El fahk, “Soano na. Tupan len se nga ac tuyak ac orek loh lain mutunfacl uh. Nga wulela tari tuh nga fah orani mutunfacl ac tokosrai, ac oru elos in pula ku lun kasrkusrak luk. Faclu nufon ac fah kunausyukla ke kasrkusrak luk, su oana sie firir in e.
9 “Na nga fah ekulla ouiyen kaskas lun mwet in mutunfacl nukewa, ac elos fah pre nu sik mukena, ac tia nu sin kutena god saya. Elos nukewa fah akosyu. 10 Finne acn Ethiopia su oan loeslana, mwet luk su fahsrelik elos ac fah use mwe kisa nu sik we me. 11 In pacl sac, kowos mwet luk fah tia sifilpa enenu in mwekin lah kowos tuh tuyak lainyu. Nga fah lusla mwet nukewa su filang ac inse fulat, ac kowos fah tia sifilpa tunyuna lainyu fin eol mutal sik. 12 Nga fah oakiya sie mutunfacl pusisel ac efal in acn we, su fah tuku ac sukok kasru sik. 13 Mwet Israel su lula ac fah tia oru kutena ouiya koluk nu sin kutena mwet, ku fahk kas kikiap, ku srike in aklalfonye mwet. Elos fah kapkapak ac muta in misla, ac tia sangeng sin kutena mwet.”Fwack 14:5
Soko On In Engan
14 On ac sasa ke engan, kowos mwet Israel!
Jerusalem, engan ke insiom nufon!
15 LEUM GOD El tulokinya kaiyuk lal nu sum.
El lusak mwet lokoalok lom nukewa.
LEUM GOD, su tokosra lun Israel, El wi kom.
Inge kowos tia enenu in sifilpa sangeng.
16 Pacl se apkuran me ke elos fah fahk nu sin Jerusalem,
“Nikmet sangeng, siti Zion!
Nikmet lela poum in munasla!
17 LEUM GOD lom El wi kom;
Ku lal ac fah sot kutangla nu sum.
LEUM GOD El fah enganak keim,
Ac ke lungse yohk lal El fah sot nu sum sie moul sasu.
El fah on ac arulana engan keim,
18 Aok, oana engan lun mwet uh ke pacl in kufwa.”
LEUM GOD El fahk,
“Nga aksafyela tari mwe aksangeng lun ongoiya
Ac eisla mwe mwekin lom.
19 Pacl se apkuranme!
Nga fah akkeokye mwet ma akkolukye kom;
Nga fah molela mwet ul nukewa
Ac folokonma mwet sruoh nu yen selos.
Nga fah ekulla mwekin lalos nu ke akfulat,
Ac faclu nufon fah kaksakunulos.
20 Pacl se apkuranme!
Nga fah oru tuh mwet lom nukewa su fahsrelik in folokeni nu yen selos.
Nga fah oru kom in pwengpeng fin faclu nufon
Ac sifilpa akkasrupye kom.”
LEUM GOD El fahk ouinge.