7
Nia tigidaumaha o nia dagi
1 Di laangi Moses ne hagaduu aga di Hale laa Dimaadua, mee ga haga tulu di maa mo di haga dabu di Hale laa mo ono goloo huogodoo, mo di gowaa dudu tigidaumaha mo ono goloo huogodoo. 2 Nia dagi madahaanau ala nogo hai nia dagi i nia madawaawa Israel, go nia daane la hua ala nogo dagi di hihi dangada tenua, 3 ga gaamai nadau tigidaumaha gi mua o Dimaadua: nia kulumaa e ono, nia kau e madangaholu maa lua, di kulumaa e dahi ang gi nia dagi dogolua, mo di kau e dahi ang gi di tagi e dahi. I muli nadau gaamai nia maa, 4 gei Dimaadua ga helekai gi Moses, 5 “Kaina nia tigidaumaha aanei e hai ai nia hegau ang gi di Hale laa Dimaadua, wanga ina nia maa gi digau Levi gii hai be di hegau dela belee hai go digaula.” 6 Malaa, Moses gaa wanga nia kulumaa mo nia kau gi digau Levi. 7 Moses gaa wanga nia kulumaa e lua mono kau e haa ang gi digau Gershon*Gershon la tama daane ni Aaron , 8 ge ang gi digau Merari†Merari la tama daane ni Aaron nia kulumaa e haa mono kau e walu. Nia moomee huogodoo digaula le e hai i lala di tagi go Ithamar, tama daane Aaron. 9 Moses digi wanga ana kulumaa mono kau gi digau Kohath‡Kohath la tama daane ni Aaron , idimaa, digaula e madamada humalia i nia goloo haga madagu, e aamo i hongo nadau bakau.
10 Nia dagi gu gaamai labelaa nia tigidaumaha e budu di haga dabu di gowaa dudu tigidaumaha. Di madagoaa digaula gu togomaalia di dahi aga nadau wanga dehuia i di gowaa dudu tigidaumaha, 11 Dimaadua ga helekai gi Moses, “Hai gi digaula bolo di laangi e dahi o nia laangi e madangaholu maa lua e hagatau gi muli, di tagi e dahi e gaamai ana wanga dehuia ang gi di haga dabu o di gowaa dudu tigidaumaha.”
12-83 Gei digaula ga gaamai nadau tigidaumaha be di hai deenei i lala:
| Laangi | Nia madawaawa | Tagi |
| 1 | Judah | Nahshon tama daane Amminadab |
| 2 | Issachar | Nethanel tama daane Zuar |
| 3 | Zebulun | Eliab tama daane Helon |
| 4 | Reuben | Elizur tama daane Shedeur |
| 5 | Simeon | Shelumiel tama daane Zurishaddai |
| 6 | Gad | Eliasaph tama daane Deuel |
| 7 | Ephraim | Elishama tama daane Ammihud |
| 8 | Manasseh | Gamaliel tama daane Pedahzur |
| 9 | Benjamin | Abidan tama daane Gideoni |
| 10 | Dan | Ahiezer tama daane Ammishaddai |
| 11 | Asher | Pagiel tama daane Ochran |
| 12 | Naphtali | Ahira tama daane Enan |
Nia tigidaumaha tangada nei mo tangada nei ala ne gaamai le e hai be di mee e dahi:
- di boolo silber e 50 ons dono daamaha,
- di baisin silber e dahi e 30 ons dono daamaha; nia mee e lua aanei e honu palaawaa mo nia lolo ang gi tigidaumaha golee laagau,
- di pileedi goolo e 4 ons dono daamaha e honu nia ‘incense’,
- dahi damaa kau daane, mo dahi dama siibi daane, mo dahi dama siibi di ngadau e dahi. Nia manu e dolu aanei e hai ai tigidaumaha dudu,
- dahi kuudi e hai ai tigidaumaha wwede nia huaidu,
- nia kau daane e lua, siibi daane e lima, nia kuudi e lima, ge dama siibi e lima nia ngadau dagi dahi. Nia manu aanei e hai ai tigidaumaha o di hagadaubuni.
84-88 Aanei nia hulu llauehe o nia tigidaumaha ala ne gaamai go nia dagi e madangaholu maa lua, e hai ai di budu di haga dabu o di gowaa dudu tigidaumaha:
- 12 boolo silber ge 12 baisin silber, taamaha e 60 pauna,
- 12 pileedi goolo, e 48 ons, e honu ‘incense’,
- nia kau daane e 12, nia siibi daane e 12, nia dama siibi nia ngadau dagidahi e 12, ngaadahi mo nadau tigidaumaha huwa laagau e dau gi nia mee tigidaumaha dudu aanei,
- nia kuudi e 12 e hai ai tigidaumaha wwede nia huaidu,
- nia kau daane e 24, nia siibi e 60, mo nia dama siibi e 60 nadau ngadau dagi dahi e hai ai tigidaumaha o di hagadaubuni.
89 Di madagoaa Moses ne ulu gi lodo di Hale laa belee helekai gi Dimaadua, mee ga longono Dimaadua e helekai gi mee mai i hongo di uhi o Tebedebe o di Hagababa, mai i mehanga nia ada manu e hai ono bakau.