52
Di hagiaga mo tumaalia o God*Taahili ni David, i muli Doeg, tangada Edom, ne hana gi hagamodongoohia ang gi Saul boloo, “David guu hana gi di hale o Ahimelech.” (1-Samuel 22.9-10)
1 Goe taane maaloo, ma e aha dela goe e galanga gi au huaidu ala e hai?
Di manawa dahi o God la dono hagaodi ai.
2 Goe e haganoho au hai belee hagahuaidu digau ala i golo.
Do holole e gaa be tulumanu dahi ngudu.
Nia madagoaa huogodoo gei goe e dili au kai tilikai.
3 Goe e hagalabagau nia hangaahai huaidu laa hongo nia hangaahai humalia,
mo nia kai tilikai laa hongo nia kai e donu.
4 Goe e hiihai e hagahuaidu nia daangada gi au helekai,
goe tangada hai kai tilikai!
5 Malaa, God ga haga huaidu goe gi mooho gaa hana hua beelaa.
Mee gaa kumi goe gaa dada mai goe gi daha mo do guongo.
Mee gaa daa goe gi daha mo tenua o digau mouli.
6 Digau ala e hai di tonu gaa mmada gi di mee deenei ma gaa hai,
ga mmaadagu. Digaula ga gadagada adu gi di goe ga helekai,
7 “Mmada, deenei tangada nogo hagalee hagadagadagagee
gi nia hagamaamaa a God, nogo hagadagadagagee hua gi ono goloo ala e logo,
gei e halahala ono hagahumalia gi nia hangaahai huaidu mono kai tilikai.”
8 Gei au, au e hai gadoo be di laagau olib e tomo i lodo di hale o God.
Au e hagadagadagagee gi di aloho dee modu o maa,
gaa hana hua beelaa dono hagaodi ai.
9 Au ga danggee adu gi di Goe i nia madagoaa huogodoo, meenei God,
i au mee ala ne hai. Au ga hagadele gi mua au daangada bolo Goe e humalia.
*^ Taahili ni David, i muli Doeg, tangada Edom, ne hana gi hagamodongoohia ang gi Saul boloo, “David guu hana gi di hale o Ahimelech.” (1-Samuel 22.9-10)