136
Taahili danggee
1 Danggee ang gi Dimaadua, idimaa Mee e humalia.
Di aloho o Maa hagalee modu.*1-Chronicles 16.34; 2-Chronicles 5.13; 7.3; Ezra 3.11; Pisalem 100.5; 106.1; 107.1; 118.1; Jeremiah 33.11
2 Danggee gi di God dela koia e aamua i nia god huogodoo.
Di aloho o Maa hagalee modu.
3 Danggee gi di Tagi dela koia e maaloo i hongo nia dagi huogodoo.
Di aloho o Maa hagalee modu.
4 Go Mee modogoia dela e hai ana mogobuna hagagoboina.
Di aloho o Maa hagalee modu.
5 Mee ne hai di langi gi dono kabemee.
Di aloho o Maa hagalee modu.*Genesis 1.1
6 Mee ne hai henuailala gi hongo nia wai llala.
Di aloho o Maa hagalee modu.*Genesis 1.2
7 Mee ne hai di laa mo di malama.
Di aloho o Maa hagalee modu.
8 Di laa e dagi di aa.
Di aloho o Maa hagalee modu.
9 Di malama mo nia heduu e dagi di boo.
Di aloho o Maa hagalee modu.*Genesis 1.16
10 Mee gu daaligi gii mmade nia ulu mmaadua dama daane digau Egypt.
Di aloho o Maa hagalee modu.*Exodus 12.29
11 Mee guu lahi digau Israel gi daha mo Egypt,
Di aloho o Maa hagalee modu.*Exodus 12.51
12 gi nia mahi mo nia mogobuna mahi o nia lima o Maa.
Di aloho o Maa hagalee modu.
13 Mee gu wwae lua di Tai Mmee.
Di aloho o Maa hagalee modu.
14 Mee guu lahi ana daangada laa lodo di tai deelaa.
Di aloho o Maa hagalee modu.
15 Mee guu hai di king o Egypt mo ana gau dauwa gi mmaalemu.
Di aloho o Maa hagalee modu.*Exodus 14.21-29
16 Mee guu lahi ana daangada laa lodo di anggowaa.
Di aloho o Maa hagalee modu.
17 Mee gu daaligi gii mmade nia king maaloo dangihi.
Di aloho o Maa hagalee modu.
18 Mee gu daaligi gii mmade nia king ala e dau,
Di aloho o Maa hagalee modu.
19 ala go Sihon, di king o digau Amor,
Di aloho o Maa hagalee modu.*Numbers 21.21-30
20 mo Og, di king o Bashan.
Di aloho o Maa hagalee modu.*Numbers 21.31-35
21 Mee guu wanga nia henua digaula gi ana daangada.
Di aloho o Maa hagalee modu.
22 Mee guu wanga nia maa gi Israel, go dana dangada hai hegau.
Di aloho o Maa hagalee modu.
23 Mee digi de langahia e Ia gidaadou i tadau madagoaa ne magedaa.
Di aloho o Maa hagalee modu.
24 Mee ne haga dagaloaha gidaadou gi daha mo tadau hagadaumee.
Di aloho o Maa hagalee modu.
25 Mee ne wanga nia meegai gi nia manu mouli huogodoo.
Di aloho o Maa hagalee modu.
26 Goodou danggee ang gi di God o di langi.
Di aloho o Maa hagalee modu.
*136.1: 1-Chronicles 16.34; 2-Chronicles 5.13; 7.3; Ezra 3.11; Pisalem 100.5; 106.1; 107.1; 118.1; Jeremiah 33.11