John Nunda Reta Tuturoda Gefusira, Amo Eviri.
Iesu da ambo jimbi eni javo John, nu embako edo ghaeko 85-90 A.D. ainda jokáda, nunda geka evia gefusira. (2 John a 3 John avose, sifo daba aminda gefusira.) John gefusira amo, nu evovodae natofo ekaresia jokáda aikena roboghoi ‘nanda sasingu’ sise, geka gefusira.
Avata John da sifoda, evetu genembo mendeni tumondari beká dodo iriari. Ne totofo dederuse nemo, tumondari embova sise, Iesu mo nu God beká ava, ne jo tumondaeri. A kotugo, God vose fira genembo beká edo sirorusira ábarago, ne jo tumondae useri. Evetu genembo resera eimi, ne asisi mo roera teriago sise, tamo fisighae mo, roera ijoghakova sedo ghuseri. Aminguse, fisida uju itatako jo buregae, ne ari ekoko mendeni mendeni isaghada edo ghuseri. Nemokena beisiga use, nenda geka da mino sise, John nunda geka fakarago emo, buku einda jokáda gefusira.
John Nunda Reta Tuturoda Gefusira, Ainda Mendo Mendo Mo Eviri.
1:1-4 John geka tuturo usira.
1:5—2:29 God mo, usasa bekári. Namonde mave nunda sasingu arera amo, tumba da geka a irari ava ighagha edo, Iesu da amboda amboda use, ari eveva use irarera.
3:1-24 God da sasingu mo, ne ari eveva use, nenda nano namendi dubo ruruse irarera. O Satan da sasingu mo, ne ari ekoko use, nenda nano namendi jo dubo bae arera.
4:1-6 Evetu genembo God da Geka seraera, ai, Satan da geka seraera, ava dere garera.
4:7—5:21 Keriso da natofo rea tumondaetera, a nu redae tumondaetera, a kotugo nange use iraetera, ainda geka sedo, tano usira.
1
1:1-4 Jebuga Da Susu Mo, Keriso Numori.
1 Tuturoda, Geka eni irei. Geka ava mave tumondarira amo, nu jebuga evovodae irari ava tuve barira. Geka amo namane nininguseri, a saramana iri, namane gosuseri. A kotugo, namane ditiimi gido, ungoi jighi gosuseri. 2 Na Geka resena emo, Keriso dae resena. Numo, God dirigetiri fira isagha etiri namane gosuseri. Namane nu gido, aindae nemokena osa sise irera. Jebuga giti God Afa kena ireira amo, numori. 3 Nu isagha etiri gido, namane nunda bino ava osa seraera. Ainda tuka mo: ne namonde dabade tatedo iraeteri. A namane mo, God Afa nunda Mandi Iesu Keriso de dabade tatedo irera. 4 Aindae sise, ne namonde dabade tatedo, ivuga ari dae sise resera.
1:5-10 God Mo, Nu Usasa Bekári.
5 Geka namane Keriso kena ningido, nemokena sari dae erera amo, eviri. God mo, nu usasa bekári. Numokena a nunda jokáda, tumba eni tefori. 6 Ava sedo, “Na God ghae dabade tatedo irena,” sise, tumba da ari ava use irarera amo, namonde gungubo sarera. Ainda beká mo: namonde rea arera, a rea sarera, jo foa dabako ae arira. Amo, namonde gungubo sarera. 7 O namonde, God de dabade usasada deinghuse irarera amo, namonde tofo tofo tatedo dabade iroro, nunda Mandi Iesu da ororoimi, namondeda ari ekoko seghe fugarira.
8 Avata, “Namane eveva vanembo eraera,” sarera amo, namonde totofo dederuse irarera. Amo, namondekena geka beká eni tefori. 9 O namondeda ari ekoko God kena vujegarera amo, nu rea beka gagojuse ari dae sisira ava, nune arira. Nu namondeda ari ekoko isasambu seghe fugedo, kote doyarira. 10 O, “Namane eveva vanembo eraera,” sarera amo, namonde kau God gungubo sariá sise sarera. Mave aminge sarira amo, nu God da Geka eniko jo bae beká irira.