43
Genembo Eni Gitofuimi Sandi Budo Isera, Ainda Banungariri. (Yaru 42 da mendori.)
1 Arie God, evetu genembo ni buneraera, gungubo kakato,
a evetu genembo ekoko ainda dombuda ere, na sonembuse, “Embavokena kosasa tefo beká”, ava saetesi.
2 Nimo nanda sonemba katori,
ava redae na doteso, gitofu mema namokena futero, ainda bouvu erefufeni?
3 Ninda Geka Beká a usasa mutu foa, na giti jijighuse bu ya Saion,*Afige, geka eni Saion dae gefusera, tuturo 2:6 duruda tege, garesa!
ninda doriri kakara aminda buvudo, ninda banungari kambo nimo irá gheraesa, aminda terone!
4 Aminda teredo, na ninda olta (altar) da yaone!
Arie God, nimoa nanda ivuga da susuri.
Arie God, nanda God, na gita bu doruse,†Afige, geka eni gita o uka dae gefusera, tuturo 33:2 duruda tege, garesa!
nindae sakai sise, yaru divarena.
5 Na redae mema ereni?
Na redae bune jarutereni? Avori, jo amingae arena.
Na sekago nanda tumondari nanda God a sonemba katokena fifituse,
nundae sakai sarena.