146
God Jebuga Mutari Kato Dae Sakai Saore!
1 Bajari dae sakai saore! Arie namoako, nanda dubo jokáimi Bajari dae sakai saone!
2 Na Bajari dae sakai sise irá ambari tano, na sifo ghousa God nane tumonde baingheraena aikena,
yaruimi sakai sise irarena.
3 Nenda tumondari erá endada evetu genembo da babojegari kena fitiove!
Endada evetu genemboimi jo saoro jebugae areva.
4 Ne sifo reda ambarera, ne jovereghe fonja jinarera,
sifo aminda ne rea ari dae kotisera, isambu soesa tefo arira.
5 God, Jacob tumonde bainghedo ghusira aimi maveju ava sonembarira amo, ne ivugaghae irarera.
A mave nenda gigitari God kena fitarera, nébarago ivugaghae irarera.
6 God, utu, enda a eva, kotugo roera ainda jokáda iritirira, isasambu nune etiri sirorusira,
aimi rea ari dae seraera ava, nune edo gherira.
7 Nu ijujuse, evetu genembo gitofuimi mema futero, mema itatamuse irera, ava soreraira.
Kotugo baimara eretafera ainda bayau, nune muturaira.
Bajari, nune dibura embo seari dibura do buvututururoro, 8 diti digoide seari sifo sevo giraera.
Evetu genembo gofedo irera, ava, Bajari nune jighiari ereraera.
Evetu genembo dambugo mo, Bajari nune dubo buraira.
9 Teana embo namondeda reighida irera ava, Bajari nune kaifa eraira.
Roriri nenda sasingu babatede nenda sonemba nune eraira.
O ari ekoko embo da kotari nune eari beje soesa eraira.
10 Bajari mo kini (king) edo evovodae irira. Arie Israel embo, reighi Saion*Afige, geka eni Saion dae gefusera, tuturo 2:6 duruda tege, garesa! ireva,
nenda God ne evovodae kaifa use irarira.
Bajari dae sakai saore!