1 Sade ñɨn u, ram rɨknɨg gö nɨŋöl gɨ, Maria Magdala wip rɨgöl gɨla mɨgan amöm nɨŋa, kabö kub wip rɨgöl pɨƚ gɨla u, ƚɨƚɨ gɨ am goƚ au mɨdeia. 2 Nɨpe nɨŋöm, kauyaŋ gɨ dö gɨ ap Saimon Pida hol mɨhöŋ mɨdailo u apöm haga, “Bɨ Kub u nɨp agamɨj ud arbal; pen dap lɨbal au nɨŋagpun,” a ga.

3-4 Anɨg hageia, Pida hol mɨhöŋ nɨŋnɨg gɨ dö yabɨƚ gul hadlo. Yad nöd amjakem, 5 höŋ adö löyaŋ nöp mɨdem, kabö mɨgan jɨŋ sɨpsɨp nɨŋnö waƚɨj bad gau nöp mɨdeia. 6-7 Pen Saimon Pida nɨpe hain apöm, kabö mɨgan u hiɨkɨd amöm nɨŋa, Jisas nɨp waƚɨj wam halö yula gau hubɨk gaga; rɨgöl gɨla rö nöp mɨdeia. Pen waƚɨj nabɨc jɨŋ pɨral wam gɨgabö gɨla u, u rö nöp hubɨkaga; pɨral gɨgabö gɨla rö nöp asɨk gɨ ke au mɨdeia. 8 Yad nöd wip rɨgöl gɨla au apjaknö pen uri yad u rö nöp kabö mɨgan hiɨkɨd amem nɨŋnö, waƚɨj gau wam halula rö mɨdeia u me, anɨbu Jisas uraköp, a gem nɨŋ udnö. 9 Pen ñɨn anɨbu, God Manö kalɨ kƚiñ rɨköm, Jisas umöm uraknɨm, a gɨla manö u, hol nɨŋ aij gaglo. *Ap 2:24-32; 1Ko 15:4 10 Anɨg nɨŋul ado gɨ ram arlo.

11-12 Pen Maria wip rɨgöl gɨla rɨgöl mɨgan anɨbu höŋ adö au uraköl mɨdöm mɨɫöŋ göl gɨ mɨdeia. Mɨɫöŋ göl gɨ mɨdöl gɨ, jöl magö dudu gɨ kabö mɨgan jɨŋ sɨpsɨp nɨŋa, ejol waƚɨj rud lɨlö mɨhau, Jisas wip he nöd mɨdeia ka anɨbu asɨk mɨdöl gɨ, ap nabɨc adɨŋ jɨŋ, ap ma adɨŋ mɨŋ, mɨdailö. 13 Ejol anɨb mɨhau Maria nɨp haglö, “Nɨhön gɨnɨg mɨɫöŋ gabön?” ö gɨlö.

Hagailö haga, “Bɨ Kub yad u nɨp damöm gai dam lɨbal u nɨŋagpin!” a ga. 14 Anɨg hagöm, ado göm nɨŋa, Jisas urak mɨdeia. Pen nɨp nɨŋö, bɨ unbö ke rö la. Jisas nɨŋa u pen u Jisas nöp a göm nɨŋaga. *Luk 24:16; Jon 21:4

15 Jisas pen Maria nɨp haga, “Nɨbi me. Nɨhön gɨnɨg mɨɫöŋ gabön? An nɨp uƚhai nɨŋabön?” ö ga.

Hageia, Maria haga e, bɨ wög adɨŋ nap nɨbö u nöp yɨp hagab, a göm haga, “Bɨ kub nɨŋeb. Wip u ud arbin, a gɨmön, gai dam lɨban u yɨp hagaimön, yad ud arnam,” a ga.

16 Hageia, Jisas haga, “Maria!” a ga.

Hageia, Maria, Arameik manö löm, “Rabonai!” a ga. Manö haga anɨbu, “Manö Hag Ñeb Bɨ.”

17 Hageia, Jisas haga, “Yad ram mɨnöŋ iƚ i arö gem, Bapi ado gɨ au laŋ aragɨn rö, yɨp ud mɨdagaimön. Pen ne arammön, mam bɨ kalɨp hagmön, ‘Jisas hagöp, “Yad Bapi yad, Bapi kale, God yad, God kale mɨdöp u ado gɨ arabin,” a göp,’ a gɨmön,” a ga. *Ro 8:29; Hib 2:11-12

18 Jisas anɨg hageia, Maria Magdala am Jisas bɨ nɨpe gau kalɨp haga, “Yad Bɨ Kub u nɨp nɨŋem auabin,” a ga. Anɨg hagöm, Jisas manö nɨhön nɨhön nɨp haga u, Maria nɨpe Jisas bɨ nɨpe kalɨp manö anɨbu haga.

19 Pen Sade ñɨn u, sɨdö wad ara nɨŋöm, bɨ nɨpe gau Juda bɨ kub gau kalɨp pɨñɨŋ göm, ram raul amöm ajöŋ u gɨñ pɨdöŋ göm, agamɨj mɨdeila nɨŋöm, Jisas ap aŋ anɨb au waiö löm haga, “God kalöp abad mɨdeiaŋ,” a ga. 20 Anɨg hagöm, ñɨmagö ur nɨpe gau kalɨp yamöm, rɨglöm böŋ lau yamöm ga. Bɨ nɨpe gau nɨŋöm, u Bɨ Kub nöp, a göm, mɨñ mɨñ yabɨƚ gɨla. *Jon 16:22; 1Jn 1:1

21 Jisas pen kalɨp kuöyaŋ haga, “God kalöp abad mɨdeiaŋ. Bapi yɨp hag yuö apem wög nɨpe gɨpin rö, kalöp pen abe hag yuabin,” a ga. 22 Anɨg hagöm, kalɨp pu göl gɨ haga, “Ana Uɫ u udmim. 23 Nɨbi bɨ rɨmnap nan si nan naij gɨpal gau nɨŋmim arö gɨnabim u, God u rö nöp nɨŋöm arö gɨnab. Pen nɨŋmim arö gagnabim u, God u rö nöp nɨŋöm arö gagnab,” a ga. *Mad 16:19

24 Pen Jisas ap waiö löm kalɨp manö haga ñɨn anɨbu, bɨ nɨpe Domas, hib ap Ñɨ Ramö a gɨmɨdal u, kalɨp aip mɨdageia. 25 Anɨb u, hainö Jisas bɨ nɨpe Domas nɨp hagla, “Bɨ Kub u nɨŋbun,” a gɨla.

Hageila, nɨpe pen haga, “Anɨg hagabim u pen ñɨmagö nɨpe cɨpɨƚ pakla u abe, rɨglöm bɨnɨŋ gɨla u abe, amgö yad ke nɨŋem ñɨmagö yad ud nɨŋnabin u me, manö anɨbu nɨŋ udem, uraköp, a gem nɨŋ udnabin; wasö u wasö,” ga.

26 Anɨg hagöm, pen wik añɨ ap mɨdöm, Jisas bɨ nɨpe gau Domas aip kuöyaŋ ram raul u mɨdeila. Ajöŋ gɨñ pɨdöŋ gɨla u pen Jisas nɨpe ap aŋ anɨb au waiö löm haga, “God kalöp abad mɨdeiaŋ,” a ga. 27 Jisas anɨg hagöm, Domas nɨp haga, “Ñɨmagö ne u, yɨp cɨpɨƚ pakla u ud nöŋ. Ñɨmagö yad nöŋ. Rɨglöm böŋ yad bɨnɨŋ gɨla aui abe ud nöŋ. Gasɨ mɨlö lagmön, yɨp nɨŋ udmön,” a ga.

28 Hageia, Domas haga, “Bɨ Kub yad, God yad!” a ga.

29 Pen Jisas Domas nɨp haga, “Yɨp waiö nɨŋmön me, yɨp nɨŋ udpan. Pen nɨbi bɨ yɨp waiö nɨŋagöm, yɨp nɨŋ udnaböl gau, mɨñ mɨñ yabɨƚ gɨnaböl,” a ga. *1Pi 1:8

30 Pen manö kalɨ kƚiñ rɨkabin anɨbi, hon Jisas bɨ nɨpe gau nɨŋ mɨdno nɨŋöl gɨ, Jisas nan gagep ke ke iru nöp gɨmɨdöp rö, magöŋhalö kalɨ kƚiñ rɨkagpin. 31 Pen kale, Jisas nöp me, Krais u, God Ñɨ nɨpe yabɨƚ u nöp, a gɨmim, nɨp nɨŋ udpe, kalöp udö, nɨp aip kamɨŋ mɨdeinabim, a gem, manö anɨbi kalɨ kƚiñ rɨkpin. *Jon 3:15; Ro 1:17; 1Jn 5:13