15
Nɨbi bɨ rɨmnap mɨd aij göl rö adö u nöp nɨŋun a gɨmim
1 Hon nɨbi bɨ Krais nɨp nɨŋ ud pɨdöŋ gɨ mɨdpun gau, hanɨp ke aij gɨnab adö u nɨŋun gagun. 2 Nɨbi bɨ nɨp nɨŋ ud pɨdöŋ gagpal gau, nɨp nɨŋ ud pɨdöŋ göl a gun, gasɨ u nɨŋun gun. Hon ke aij gɨnab u nan kub wasö; pen nɨbi bɨ rɨmnap, Krais nɨp nɨŋ ud pɨdöŋ gɨnaböl aka nɨp nɨŋ ud pɨdöŋ gagnaböl u nan kub. *1Ko 10:24,33 3 Krais u rö nöp, ke aij ga adö u gaga. Krais nɨpe Nap nɨp manö haga rɨmnap, Depid nɨpe God Manö adɨŋ ap kalɨ kƚiñ rɨköm haga, “Nöp hag jubal u uri yɨp u rö nöp hag juaböl,” a ga. *Sam 69:9 4 Kale nɨŋ aij göl a göm, God nɨpe geia nɨŋöm bɨ nöd nɨbö gau God Manö u kalɨ kƚiñ rɨkla. God Manö anɨbu amgö lɨ nɨŋun, manö aij anɨbu nɨŋ udun, Jisas Krais nɨŋ ud pɨdöŋ gun, kƚö gun gɨ aij gun, agamɨj ñɨñɨ löl gɨ gasɨ halö mɨdeinabun. Adö anɨbu nöp God nɨpe geia, God Manö anɨbu kalɨ kƚiñ rɨkla. *2Di 3:16 5 God nɨpe gö, kale Jisas Krais nɨŋ ud pɨdöŋ gɨmim, kƚö gɨmim gɨ aij gɨmim, agamɨj ñɨñɨ löl gɨ gasɨ halö mɨdeinabim. Pen Krais Jisas ga rö nɨŋun anɨg rö gun a gɨmim, nɨp anɨg göl hain gɨmim, God nɨpe gö, kale gasɨ adö añɨ nɨŋmim, jɨm ñöl mɨdmim, gɨmim. 6 Kale anɨg gɨmim, gasɨ añɨ nöp, maj mɨgan añɨ adɨp adɨp u nöp, Bɨ Kub hon Jisas Krais Nap hib nɨpe u hagpe adö arnɨm.
God Isrel nɨbi bɨ wasö gau kalɨp u rö nöp mög nɨŋöb
7 Gasɨ nɨŋ aij gagpe ñɨn u, Krais kalöp mög nɨŋöm ud aij gö, nɨbi bɨ nɨpe mɨdpim u, kale ke agamɨj pen pen mög nɨŋmim, ud aij gɨmim, mɨdmagö lɨ mɨdpe, nɨbi bɨ rɨmnap nɨŋöm God hib nɨpe haglö adö arnab. *Ro 14:1 8 God hadame nöp Juda kai nɨhi iƚaŋ kale gau kalɨp manö kƚö nɨŋö haga u, haga rö nöp gɨnab u, nɨŋöl a göm, Krais nɨpe Juda kai kalɨp nan a göm aua. *Mad 15:24 9 Anɨb u, Juda nɨbi bɨ wasö gau, God nɨpe hanɨp mög yabɨƚ nɨŋöb, a göm hib nɨpe haglö adö arnɨm, a göm aua. Krais nöd Nap God nɨp manö haga rö, Depid God Manö adɨŋ rɨmnap kalɨ kƚiñ rɨköm haga,
“ ‘Anɨb u, yad Juda nɨbi bɨ wasö aŋ gau mɨdem,
kɨmap hagem, hib ne u hagnö adö arnab,’ a göp,” a ga. *Ap 3:25; Sam 18:49
10 Manö ap Mosɨs God Manö adɨŋ ap kalɨ kƚiñ rɨköm haga,
“Kale Juda nɨbi bɨ wasö gau, God nɨbi bɨ nɨpe aip
pa jɨm ñɨmim, mɨñ mɨñ gɨmim,” a ga. *Dud 32:43
11 Pen manö ap Depid God Manö adɨŋ ap kalɨ kƚiñ rɨköm haga,
“Kale Juda nɨbi bɨ wasö gau magöŋhalö
Bɨ Kub hib nɨpe hagpe adö araŋ.
Kale nɨbi bɨ ram mɨnöŋ ke gau gau magöŋhalö
kɨmap hagöl gɨ, hib nɨpe hagpe adö i gɨlaŋ araŋ,” a ga. *Sam 117:1
12 Pen Aisaia u rö nöp God Manö adɨŋ ap kalɨ kƚiñ rɨköm haga,
“Bɨ Jesi rɨkö rɨk damöm rɨk daunaböl ap apöm,
nɨbi bɨ ram mɨnöŋ ke ke mɨdpal gau magöŋhalö abad mɨdeinab.
Juda nɨbi bɨ wasö gau, Bɨ anɨbu nöp gasɨ nɨŋöm,
gasɨ halö mɨdeinaböl,” a ga. *Ais 11:10 Rep 5:5
13 God nɨpe ga u nɨŋun, gasɨ halö mɨdpun. God gö, kale nɨp nɨŋ ud pɨdöŋ gɨmim, mɨñ mɨñ göl gɨ, agamɨj hibur hain hain göl gɨ mɨdmim. Anɨg göl gɨ mɨdaibe, Ana Uɫ nɨpe pɨdöŋ halö gasɨ rɨmɨd mɨdmagö aŋ kalöp daŋ apöm gö, kale gasɨ halö nöp mɨdeinabim.
Pol nɨhön gɨnɨg manö kƚö hagöm köp kalɨ kƚiñ rɨkaŋ
14 Pen añ mam bɨ. Gasɨ yad nɨŋbin kale nɨbi bɨ aij yöl; nagɨ adö nɨhön gɨmim God nɨp aij gɨnab u nɨŋ aij gɨpim; kale añ mam kale gau God Manö aij u pen pen hag ñɨ aij gɨmim rö löp. 15 Pen kalöp köp kalɨ kƚiñ rɨkabin anɨbi, manö kƚö rö rɨmnap hagpin. God yɨp mög nɨŋöm, ud aij göm, wög gep bɨ nɨpe hag la u me, yad kalöp manö kƚö anɨbu, kauyaŋ hagnö nɨŋ aij gim a gem hagpin. 16 God yɨp hag lö, yad Krais Jisas wög gep bɨ nɨpe mɨdem, Juda nɨbi bɨ wasö gau gɨ ñem, God manö aij u kalöp hag ñabin. Yad God manö aij hag ñabin u, yad God nɨp nan sabe gep bɨ rö mɨdem, manö aij nɨpe hag ñabin. Anɨg gɨnö, Juda nɨbi bɨ wasö gau, God nɨp nan sabe gɨ ñɨbal nan aij yabɨƚ nan gagöp rö lɨlö, God nɨp aij gɨnab. Ana Uɫ nɨpe gö, kale nɨbi bɨ ke kamɨŋ aij rö lɨlö, God kalɨp ñɨñɨ löm udnab. *Ro 1:5; 11:13
17 Krais Jisas aip jɨm ñöl mɨdpin u me, yɨp aij gö nɨŋöl gɨ, God nɨp wög gɨ mɨdpin. 18-19 Krais geia yad nɨp wög gem, yad wög nɨhön nɨhön gɨpin u nöp hagnabin. Yad Juda nɨbi bɨ wasö gau kalɨp Krais manö aij u hag ñɨ ajainö nɨŋöl gɨ, Ana nan gagep rö rɨmnap gö nɨŋöl gɨ, Juda nɨbi bɨ wasö gau nɨŋöm, God manö u udpal. Yad ram mɨnöŋ Jerusalem urakem, Krais manö aij u magöŋhalö kabö göl nöp adan mɨlö yabɨƚ hag ñɨ aij gɨ dam dam ram mɨnöŋ Ilirikam amem, ado gɨ aunö. 20 Gasɨ yad pör nɨŋbin u, nɨbi bɨ Krais manö nɨpe nöd nɨŋagla ram mɨnöŋ gau nöp amem, hag ñɨnam a gem nɨŋbin. Bɨ Krais manö hag ñeb rɨmnap nöd amöm padö bɨnɨŋ gɨla adö u ram gɨnam a gem nɨŋagpin. *2Ko 10:15-16 21 Aisaia nɨpe God Manö adɨŋ ap kalɨ kƚiñ rɨköm haga,
“Kalɨp manö aij nɨpe hag ñagal;
pen kale nɨŋnaböl.
Nɨbi bɨ manö aij nɨpe apdi nɨŋagal gau,
kale nɨŋöm nɨŋ aij gɨnaböl,” a ga. *Ais 52:15
Pol daun kub Rom arnam, a ga
22-23 Anɨb u, mɨ iru yabɨƚ nöp, ram mɨnöŋ gai i hag ñɨ aj aj, daun kub kale Rom arnam a gɨmɨdin u pen nɨnam rö laga. Pen mɨñi ram mɨnöŋ rɨgoŋ gai i wög gɨnam rö lagöp nɨŋem yad kalöp nɨŋnɨg nɨnabin. *Ro 1:13 24 Yöp söl mɨdöp, ram mɨnöŋ Spen arnɨg gabin. Gasɨ yad nɨŋbin u, am kale aip pro magö ap mɨdnö aij gö nɨŋöl gɨ, hainö yɨp dam Spen adan ramö u yumim, a gɨ gasɨ nɨŋbin. 25-26 Pen Masedonia Propins nɨbi bɨ abe, Akaia Propins nɨbi bɨ abe, Jerusalem nɨbi bɨ Krais lau adö mɨdöm mani nan kale mɨdagöp gau, kalɨp mani nan kale gau abönamö ñɨla u, mɨñi kalɨp ñɨnam a gem nɨnabin. *1Ko 16:1-4; 2Ko 8:1; 9:2,12; Ap 24:17 27 Gasɨ kale ke nɨŋöm gɨpal anɨbu, gɨ aij gɨpal. Juda nɨbi bɨ Krais manö aij u dam, Juda nɨbi bɨ wasö gau kalɨp hag ñɨbal rö, God mani nan kalɨp ñöb gau rɨmnap Juda nɨbi bɨ kalɨp pen ñɨnaböl u aij. *1Ko 9:11
28 Pen mani yɨp ñɨbal anɨbu magöŋhalö dam Jerusalem bɨ gau ñem, Spen adan u amem, kale mɨdpim u nɨnabin. 29 Ñɨn anɨbu apem kalöp nɨŋnö, Krais gasɨ aij nɨpe ñö, kale nɨp nɨŋ ud sɨsɨ lɨmim ñɨñɨ yabɨƚ lɨnabim. *Ro 1:11
30 Añ mam yad gau. Bɨ Kub Jisas Krais lau adö mɨdpim u, God Ana aŋ kalöp daŋ mɨdöm kalöp mɨdmagö lep magö u ñab rö, yad a gɨmim, God nɨp sabe göl gɨ nöp mɨdaimim. *2Ko 1:11; Kol 4:3; 2De 3:1 31 God nɨp sabe gɨ mɨdaimim, yad Jerusalem arnɨg gem, ram mɨnöŋ Judia areinam, Judia nɨbi bɨ Krais nɨp nɨŋ udagpal gau yɨp gɨ naij gaiöl, yɨp ud kamɨŋ yunɨm. Pen God nɨp sabe gɨ mɨdaimim, yad Jerusalem amjakem, Krais nɨbi bɨ nɨpe gau kalɨp nan nɨhön nɨhön gɨ ñɨnɨg gabin u gɨnö, kalɨp aij gö nɨŋöl gɨ, aip jɨm ñöl mɨdaiun. 32 Anɨb u, God yɨp yau a gainɨm, kale mɨdpim u amem, magö ap mɨdnö aij gö nɨŋöl gɨ, kalöp aip mɨdeinabun.
33 God kalöp magöŋhalö abad mɨdö nɨŋöl gɨ, agamɨj jɨm ñöl mɨdmim mɨd aij gɨmim. Anɨb unbö rö aij.