Hibulu
Iesu esemu moleu Hibulue hoto loumalebiaho hisalianu.
1
Dilavau au mo ebagemage anelu evigevenu.
Subuta mole Dilavau vani moaga au vaveve nimolete moaga au beloveta haivege abu nahie buluve namigevelu. Isito aike vanie gabi komo au mo hanavoge moveu dobai lohoale hotove loui nahie namigevenu. Dilavau louge ata ke igaemoike onobenobe bahata ua. Iale Dilavau ke ebagemale kemo auna gabie onobenobe bahata nibievei. Ke atagau Dilava ataga ke nahate balugataho. Keu Dilavati mole nahate unaha. Iale hotove vuvune kemoike onobenobe bahata keau ui tima. Iale keu atae vaveve toela ulihaito otogoe tiale Kosive baluga vuvunete ke ada inuteatave ugulamonu.
Dilavau au mo ke ebagemage keu anelu bahata evigevenu. Isi Dilavau au mo ke ivihage ivive keu anelu kebia ivi evigevenu. Kosealemo Dilavau au moho loui avoe,
“Au di mo.
Isege dau a Mama.”
Au kateai louito anelu kebiaho hoto kateale louholinu. Isito au mo kemo loui avoe,
“Dana Mamave holige
ena di mo holisi.”
Kateai au mo igae vatae hanavoliho tota loui avoe,
“Anelu bahataeabuna avu igae hoesehavoi.”
Dilavau Bukae Hotomo avoe,
“Auna au anelu negotievege abuna heluka nahate vai venee vedodo ke nahate vai hotove mai tai.”
Anelu vaveve louito au moe vaveve lounu. Au avuho loui avoe,
“A keu Dilava.
Ana vani bahata a telonamo ugulamoi a vaveve inutolotolo kemo a ataeau a adae vuvunemo uale kebia nibigevegei.
A vaveve duaho isiviaito vaveve toelaho isiviholinu.
A vaveve katealemoike di a vahaeho vai a ebagemage a Kosive holinu.
Isito aluvuta umale kebiaho di kateholinu.”
10 Dilavau kateai louito tota avuho hoto mole lounu. Isi avoe,
“Au Kosive.
Iale vasohuta onobenobeu uoholisege a adata vata vai otogo vanu.
11 Isito a vaeveale keabuna bahata uoholisege a kena ui tigei.
A vaeveale keabuna ogoe sisi kebia nahate mamilahai.
12 Ige ana kebia mahoevege abuna uoholige dogavena ui.
Isito a keu koli holilivebene.
A subuta ui lohoale ke nahate ana vani bahata ui tigei.”
13 Dilavau kateai au moho louito tota namihai avoe,
“Di ada inute kove ugulamo.
Isege di a aiohavomale ata kebia malevei a veloe heimo otovege Kosiveabe holinela.”
Au kateai au moho louito anelubeho hoto kateale louholinu. 14 Iale anelu keabuna vadeai. Keau Dilava isivi vamale munanaea. Iale Dilavau kebia hanavege keabuna ukolikoli maleveve ata kebia tedaevegei.