1 Amiye yokoi yaku Keriso di naivo naivo resifa vene ma Sei di sui ago moi gira iniye resifa vene kana una mokebiyaine. 2 Mina kana moimai rededi vene maina renari, bi vegu rama rededi vene kana veifategori bi buni. 3 Idu ya vene o kota rena amiye yokoi na kota regedi vonisi, bi na rofu bi beika baika keika iniye maka. Rama iniye, na kaya ka kota de reida. 4 Nai uka di mokenari no yokoi na fafau mina na na toto, idu makai na moi rama de redo. Ye Varika amiye na kota redo mini. 5 Mina dada, mina meda koderi, Varika amiye di dena koderi, kota ga refa. Mina medari, Varika amiye yaku beika baika mukunari sui niyadi bi vabara moi baesi amiye di uka di mokena moi ogau rigo. Kamini amiye neinei ini roka tora Sei gutuna moigo.

6 Nai usika ourena, ya rofu mina beika tau di ago gira na ma Apollos fafau aesi neideyaka, ye uni oteimana ago dudu kana, beika baika sena bura reyo, mina maka neidesi berou rofu ga diyaganedi. Ye makai yi utari yokoi yaku ni-ika ga reyaine, yokoi rofu ada resi yokoi rofu vei yarenari. 7 Amiye yokoi rofu ya bi idana de. Beika baika tau noibanu moiyo bi Sei yaku ya maro ba ide? Moiyori, bi beika resi yi vava dudu moina kana ni-ika reisa?

8 Beika tau ya yaku ura reyadi bi sena baku reyadi! Ya bi sena gugura tau nufa niyadi! Una bi yasa de ma ya bi kini niyadi! Ya vene bi kini kana ourefeidegedi bi buni, ye una ka ya venesa ourefeidegifa! 9 Adina mokeida Sei yaku una, ini nifeidena vene, bi egona sana rofu aeyo, kota resi muyegi moi feideyadi vene kana, kono tora noibanu di vene ma Sei di naivo naivo vima uni muyena vegedi vene niyafa dada. 10 Keriso dada amiye di mokenari, una bi ada de vene, ma ya bi Keriso dudu mokena vabara nufa vene. Una bi yau niyafa, idu ya bi yeiva. Amiye ya kikifa rededi, idu una vei yarededi. 11 Gokai gua mina meda nemoko ramari ka, una bi koru vaigasa rauna disi varuka kori maka risifa. Una uga imiga regasa rei no rededi ma uni varena amena sana bi koina. 12 Uni vana dudu moimai rei gira resifa. Una kovai nidediri, bi buni tora gade masifa; esika esika una madediri, bi are rei gira resifa;✡Acts 18.3 13 una nifafana redediri, egira resifa. Una bi kono tora noibanu di sanika kana niyafa ma toga bi beika baika tau noibanu di kukune kana!

14 Ya moi maena regika, na yaku mina bura de reida, idu nai uka maida mida kana, ya ni mama regika dada. 15 Adina yi nari rededi vene ka Keriso dudu bi 10,000 vonisi, yi bakai bi tau de. Adina na bi ago buni dudu Iesu Keriso rofu yi baba niyaka. 16 Na beika reyaka ya yaku na tari reyaganedi ya niguba reida.✡1 Cor 11.1; Phil 3.17 17 Mina resi Timothy, kaere bi Varika amiye dudu, nai uka maida mida ma vegu rama redo amiye, ya rofu nifeideyaka; nai oteimana vegu gagani gagani tau noibanuri, dubu tau gaderi reida, Iesu Keriso dudu mina ya oteimago, ye mina dada mokegedi.

18 Ya vene rofu de bae negida kana, ya bedakai ada gira regasa ni-ika rededi. 19 Idu Varika amiye ini uka ura rego vonisi, bi evade ya rofu bae nesi diya mina ada gira regasa ni-ika rededi vene di ago, idu ini vava bi gokai maina regida. 20 Adina Sei di ourefeidena amena sana bi ago dudu baku de redo, idu bi vava dudu baku redo. 21 Yi uka bi beika ura rededi? Na bi ago gira dudu ya moi rorobo rigi ba uka mana ma amuta kui yovi yovi di vima dudu, ya rofu bae negida?