Paul di bura remanu ere
Timothy
rofu
Ago di ini adina
Paul di bura remanu ere Timothy rofu di sina tora bi nineu rena ago Timothy rofu. Timothy bi amiye keika ma Paul di asini ma aedeyo amiye. Bura rena ago di sina tora tora bi are rei gira rena vegu fafau. Paul yaku Timothy nineu resi niegira reyo bi mokena vari gira aena dudu, toga Iesu Keriso rofu ninegau resi ago buni ma Sei di uka ago kori di oteimana ago moi gira resi oteimana amiye ma esika esika moina ma ruda renari, Sei di ago niogau redo amiye kana, ini moimai reyaine.
Paul yaku ka Timothy rofu “forovai ma ada yora de kayamo ago” (2.23) di no usi digi ago gira tora iniye maro. Adina ini buni yokoi de iniye, idu neidededi vene moi no rego maka.
Mina ago tauri, Timothy yaku bura reyo amiye di vegu ma mokena di oteimana ago mokeyaine—mina bi ini mokena vari gira aena, toro rena, uka mana, egira rena ma toe moinari esika moina.
Beika sina ideri
Ago di ini adina 1.1–2
Sei di roka moi odoro rina ma egira rena vegu 1.3—2.13
Nineu rena ago ma ago gira mana 2.14—4.5
Paul di amena 4.6–18
Metona ago 4.19–22
1
1 Na Paul bi Sei di ura dudu Iesu Keriso di nifeidena amiye, nitore reyo vegu Iesu Keriso sa dada—
2 Mina bi Timothy nai uka maida mida, ya rofu bura reida:✡Acts 16.1
Baba Sei ma Iesu Keriso uni Varika amiye di buni tora gade, iriyeduka ma uka amuta ya maragane.
Buni tora gade mana ma egira rena ago
3 Na bi Sei rofu buni tora gade masi nai tutubena vene reyadi kana ka naivo reida. Resi uka di mokena buni iniye dudu maka resi na bi toga toga nai urusa ma ariu usa usa nigasa ya mokeida. 4 Yi isaka niyori, ya mokegasa ya vegi ura reida, ye ada rena bi na vata baeyaine dada. 5 Na bi yi mokena vari gira aena rama iniye mokeida. Mina mokena vari gira aena bi siko yi aufa rema Lois ma yi nono Eunice sa amegamo. Ma na na diba iniye gua yasa ka amedo mini.✡Acts 16.1 6 Mina dada dudusa ya nioteimaida Sei beika ya maro, bi fu rei fairo re, mina bi yasa mini. Nai vana ya fafau aeyakari mina moiyo. 7 Adina Sei yaku vima una maro bi ori di vima de, idu vava, uka mana ma uniye dogo rena di vima.
8 Mina dada uni Varika amiye o na ini dibura ameida amiye na rofu maena ga re, idu Sei di vava dudu ago buni rofu esika moigifa nasa kaiba re. 9 Kaere ina yaku una moi vegu risi vegu kikifari raka ni dui reyo, diya beika reyafa dada, idu iniye di ura ma ini buni tora gade dada. Mina bi senagi senagi gokai beika vata nina koderi, Iesu Keriso ri una maro. 10 Idu mina bi gua Iesu Keriso di ogau nina dudu moi erau riyo. Ina yaku una moi vegu risi muyena di vava ukero vau resi ago buni dudu toga toga vegu ameibobina vabara dudu kana, moi ogau riyo.
11 Ye Sei yaku mina ago buni niogau amiye, nifeidena amiye ma*Bura bedakai ka tutubena idana vene di nufa. oteimana amiye kana na abidi reyo.✡1 Tim 2.7 12 Mina resi na bi mina rofu gurauga ameida. Idu na bi maena de reida, adina na na diba kaere rofu na bi mokena vari gira aeyaka, resi na bi nai mokena moida, beika na rofu nimaro,†beika na rofu nimaro; o beika ina rofu nimaraka. ina yaku na nari rego bogo mina Keriso di dairina meda okigo. 13 Beika ago rama mokena vari gira aena ma uka mana dudu, Iesu Keriso ri na rofu neideyo, mina di oteimana ida usi di. 14 Vima kikifa kaere uni ideri amedo dudu, beika buni Sei ya nimaro mina nari re.
15 Ya ya diba Asia gaganiri vene tau noibanu bi na ferei tavoi reyadi, Phygelus ma Hermogenes ka. 16 Idu Varika amiye yaku Onesiphorus di yava vene rofu ini iriyeduka moi oteimaraine, adina ina bi toga na moi aesi dibura yavari, seini yaku ukita reyadi rofu maena de reyo, 17 Rome okigasa bi na maina rei yeiva regamo ma gabi mamo na veitao reyo. 18 Varika amiye yaku ini iriyeduka ina rofu mago bi, Varika amiye rofu baku reyaine ini meda bae okigori! Ya diba kotana niyo gokai Ephesus amegamakari, bi ida tauri na naivo reyo.