Paul di bura
Colossae vene
rofu
Ago di ini adina
Paul di bura Colossae vene rofu bi Colossae taoni ekalesia vene rofu bura reyo. Mina taoni bi Asia keika gaganiri Ephesus taoni di meda baedo eta rofu. Paul yaku mina dubu nitugi de reyo, idu ina bi mina gagani yokoi nari resi Ephesus gutuna moimai reyadi vene nifeidegamo. Ephesus bi Asia gagani di gavamani taoni tora. Paul yaku diba niyo Colossae di duburi bi ofa ofa oteimana vene amegamadi. Mina vene bi ago gira dudu nigamadi, Sei diba nisi moi vegu rina vegu noibanu moina amiye yaku “vima nufa ourefeidena vene ma vava nufa vene” bedakai nivakeyaganedi. Mina oteimana vene ka niyadi, amiye akeke di vegu riyaganedi; mina bi roaita nugana, iruku ma beika baika goro rina.
Paul yaku ago rama dudu mina oteimana ago biri rigika bura reyo. Ini ago tora bi mini: Iesu Keriso ina maka moi vegu rido, ma mina kana vegu ini mokena vari gira aenasa bi amiye Iesu moi gaima rededi. Sei yaku kono tora noibanu Keriso dudu riyo ma ina dudu iniye rofu ka moi dairigo. Keriso vakoisa maka mina kono vene yaku moi vegu rina di uka mokena baku regedi. Kamini Paul yaku mina oteimana ago tora di moimai, mokena vari gira aededi vene di vegu rofu nido.
Ago yokoi bi Tychicus fafau, kaere bi Onesimus sa Paul gutuna mina bura rena Colossae ri moiyo. Paul sena Philemon rofu bura reyo, mina moimai rei tavoi reyo amiye Onesimus dada.
Beika sina ideri
Ago di ini adina 1.1–8
Keriso di vegu ma moimai 1.9—2.19
Vegu ruaka Keriso dudu 2.20—4.6
Metona ago 4.7–18
1
1 Na Paul, na bi Sei di ura dudu Iesu Keriso di nifeidena amiye yokoi. Mina uni dubuini Timothy sa bura reida—
2 Sei di vene ma vegu rama rededi usika ourena Keriso ideri Colossae ri rofu:
Uni Baba Sei*Bura bedakai ka ma Varika amiye Iesu Keriso...maragane nufa. yaku buni tora gade ma uka amuta ya maraine.
Buni tora gade mana di usa usa nina
3 Ya dada usa usa nigasa toga toga uni Varika amiye Iesu Keriso di Baba Sei rofu buni tora gade masifa. 4 Adina una sena yi mokena vari gira Iesu Keriso rofu aesi Sei di vene tau noibanu uka madedi, mina neideyafa. 5 Mina bi uka mokena omari ya rofu ae mukora reyo dada. Ya bi sena mina ago ramari, mina ago buni bi neideyadi. 6 Sena ya rofu baeyo ma kono tora noibanuri, ini meko varesi tora nido.†varesi tora nido; bura bedakai vareyo maka nufa. Yi fogori mina ida yokoiri ka makai reyo, boyo mina medari neidesi mamo rama dudu, Sei di buni tora gade diba niyadi. 7 Mina bi uni uka masifa unasa vakoi moimai rei tavoi redo amiye Epaphras ya oteimaro kana. Ina bi vegu ramari, Keriso di naivo redo amiye ya‡ya; bura bedakai una nufa. dada.✡Col 4.12; Phlm 23 8 Ye yi uka mana, Vima dudu una ka nioteimaro.
9 Mina dada, ouresi medari yi sina neideyafari, bi ya rofu usa usa nina ferena de regamafa; vabara mokena ma Vima di ada yora tau noibanu dudu, ini ura di diba nina moi vata baeyaine, mina usa nigamafa. 10 Resi Varika amiye rofu nana rei mona resi ina moi ada rei vau resi vegu buni noibanu dudu, meko varesi Sei di diba ninari tora niyagane. 11 Ini vabara nufa isivaga dada, are rei gira rena noibanu ma ada dudu toro rena, mina rofu vava noibanu dudu egira reyagane. 12 Resi Baba rofu buni tora gade maragane, kaere bi vabarari, Sei di vene adina nisi rau regi dada, ya moi buni riyo. 13 Ina yaku mukuna di vava gabireri una erufusi moi yakusi ini uka mado Mida di ourefeidena amena sana di vava gabireri una afei baeyo. 14 Ye ina kaere bi§Bura bedakai ka ini dava dudu nufa. una voi resi erufusi uni vegu no koite makuyo.✡Eph 1.7
Keriso di vegu ma ini moimai
15 Keriso bi vena de Sei di rama iniye kana; ina bi beika baika tau noibanu rina koderi, bi amegamo. Sei yaku beika baika tau noibanu riyori, Keriso bi mina noibanu fafau ini vava nufa. 16 Adina ina dudu, oma ma konori vena ma vena de beika baika tau noibanu riyo. Bi ourefeidena amena fata amededi vene, varika vene, ourefeidena vene ma vava vene—mina tau noibanu ina dudu ma ina rofu riyo. 17 Ma beika tau noibanu bi amena koderi, ina bi sena amegamo, resi ina yaku mina beika tau noibanu moi gogo risi adora rido. 18 Ma roaita kana, ina bi dubu di ada, kaere bi vegu di adina. Ina bi muyenari gutuna siko dadi rae reyo, ye beika baika tau fafau bi ourena amiye.✡Eph 1.22–23 19 Adina Sei ini Mida ideri, iniye kana vata bae vau resi amedo vegasa ada regamo. 20 Sei ka ina dudu, beika baika konori ma omari tau noibanu iniye rofu, yasa auta regika ura reyo, ye makai sataurori Iesu di dava rausi reyori, bi uka amuta riyo.✡Eph 2.16
21 Kamini meda yokoiri, yi mokenari vegu no dudu, Sei gutuna ya kaya ya moi gaima rigasa ini tuma vene nigamadi. 22 Idu gua ini roaita di muyena dudu, yasa auta reyo, kikifa, butigi yokoi de nufa ma vegu no nufa de ini nemokori ya afei baesi oteimagi dada. 23 Ye mokena vari gira toga aesi ya kaya nitugi resi are rei gira resi mina neideyadi ago buni di uka mokena gutuna moi etagae de rigedi vonisi, mina bi ogau nigedi. Mina ago buni bi oma gabireri beika baika noibanu riyo, mina rofu nirausi reyo, ma na Paul, na bi ini naivo reida amiye niyaka.
Paul di moimai naivo redo amiye kana ekalesia vene rofu
24 Kamini ya dada esika moiyaka, mina rofu gua ada reida. Keriso yaku ini roaita, mina ekalesia vene, ina dada esika moiyo, ma mina esika moiyori beika bi nufa de, bi na rofu vata baedo. 25 Ma Sei yaku moimai ya dada na maro, ye ini naivo reida amiye kana niyaka; mina moimai bi Sei di ago diba ni vau regida. 26 Ye makai mina sui ago meda tauri ma tutubena bounari sui nigamo, idu bi gua Sei di vene rofu moi ogau riyo. 27 Sei di ura reyo bi mina sui ago di vabara di buni vayavaya, ini tora tutubena idana vene di fogori, bi gokai ina vene rofu moi diba riyo; mina bi Keriso ya ideri amedo, bi vabara di uka mokena mini. 28 Kamini mina amiye niogau resi amiye tau noibanu rofu ago gira masi mokena vabara noibanu dudu amiye tau noibanu oteimagi afei baesifa, ye amiye tau noibanu Keriso dudu, sena tora niyadi kana oteimagifa dada. 29 Ye mina rofu ka ini reremama rena vava nai ideri moimai redo dudu, moimai regasa duro reida.