10
1 Usika ourena, nai uka meko dudu, ura resi Sei rofu usa usa nida, ye ina*ina; bura bedakai Israel nufa. vene bi moi vegu riyaganedi! 2 Ye ina vene yaku Sei rofu mokei tora rededi ma ninegau reida, idu ini mokei tora rena Sei rofu bi diba ni mona de dada. 3 Adina ina vene bi Sei di mokena rorobo vegu toto, idu iniye ini mokena moi rorobo rigika maina resi Sei di mokena rorobo vegu gabireri raga de reyadi. 4 Adina Keriso yaku ago gira di tu moi fudika reyo, ye amiye tau noibanu, kaere mokena vari gira aegedi, bi ini mokena moi rorobo rigo.
Moi vegu rina bi amiye tau noibanu rofu
5 Ini adina Moses yaku mokena rorobo ago gira dada makai bura reyo: “Amiye kaere ago gira di ago neidego bi makai dudu vegu ameibobigo.”✡Lev 18.5 6 Idu mokena rorobo mokena vari gira aena dada bi makai nido: “Yi uka mekori ga ni, Kaere omari bogo?” (mina bi Keriso moi degika kana).✡Deut 30.12–14 7 “O: Kaere kono ruba soku torari nego?” (mina bi muyena vene gutuna Keriso moi baegika kana). 8 Idu beika nido bi yomini: “Ago bi ya atafuri amedo; bi yi venari ma yi uka mekori amedo”—mina bi, nirausi resifa mokena vari gira aena di ago mini. 9 Ini adina Iesu bi Varika amiye, yi vena dudu niogau resi yi uka mekori Sei yaku Iesu muyena gutuna moi dadi rae reyo, mina mokena vari gira aegiya vonisi, bi ya moi vegu rigo. 10 Adina amiye yokoi yaku uka meko dudu mokena vari gira aegori, bi moi rorobo rigo; ye vena dudu niogau regori, bi moi vegu rigo. 11 Ini adina Sei di agori yomakai niyo, “Amiye kaere ina rofu mokena vari gira aego, bi maena de rego.”✡Is 28.16 12 Adina Jew vene ma tutubena idana vene†tutubena idana vene: Greek agori mina bi Greek vene. bi idana de; Varika amiye yokoi maka bi ina tau vakoi di, ma amiye tau gade kaere ina raka nigedi bi beika baika tau gade mago. 13 Ini adina “Amiye kaere Varika amiye di roka raka nigo bi moi vegu rigo.”✡Joel 2.32
14 Idu ina rofu mokena vari gira de aeyadi vonisi, bi gokai ina raka nigedi? Ma ina fafau toga de neideyadi vonisi, bi gokai mokena vari gira aegedi? Ma amiye yokoi ago nirausi de reyo vonisi, bi gokai neidegedi? 15 Ma de nifeideyo vonisi, bi gokai ago nirausi regedi? Bura reyo kana, “Ago buni niogau rededi vene di okina bi buni vayavaya!”✡Is 52.7 16 Idu diya amiye tau gade yaku ago buni neideyadi. Adina Isaiah niyo, “Varika amiye, kaere yaku uni ago neidesi mokena vari gira aeyo?”✡Is 53.1 17 Ye mokena vari gira aena bi neidena gutuna moi baedo; ma neidena bi Keriso di ago gutuna moi baedo.
18 Idu nikaiteida: bi mina sina de neideyadi ba? Rama iniye neideyadi—ini adina:✡Ps 19.4
“Ini goroka bi kono tora noibanuri,
ma ini ago ka gagani tora noibanuri urafo rei diyo.”
19 Dudusa nikaiteida: Israel vene bi diba niyadi ba ide? Moses siko nikabai reyo:✡Deut 32.21
“Na yaku kaere bi gagani de vene dudu
ya moi maunu nigida;
ma ada yora de gagani vene dudu
ya moi gubuyo regida.”
20 Kamini Isaiah ori de dudu yomakai niyo,✡Is 65.1
“Kaere na maina de regamadi vene yaku na baku reyadi;
kaere na usa de nigamadi vene rofu ogau niyaka.”
21 Idu Israel vene fafau yomakai niyo, “Meda doba ideri neidena de ma ruda ruda vene rofu nai vana moi roto rigamaka.”✡Is 65.2