1 Na, kamo na magonawa ng mga anak ko, syosorat ko kamayo yani na mga butang antak di kamo magpakadosa. Awgaid kong aon makadosa, aon matabang kanatun mangayo ng ampon adto sang Tohan na Ama, aw yani na tigpatunga si Isa Almasi na yan way dosa. 2 Yani si Isa yagapakamatay na magonawa ng korban antak maampon yang kanatun mga dosa. Aw yagapakamatay yan dili gaid para sang kanatun mga dosa awgaid sampay oman sang mga dosa ng kariko ng manosiya.

3 Na, kong tomanun natun yang mga sogowan ng Tohan, makasigoro kita na kikilaa natun yang Tohan. 4 Kong aon otaw na yagalaong na kikilaa nan yang Tohan awgaid wa nan inanga yang mga sogowan nan, bakakun yan aw waa ansang pangatayan nan yang kabunnaan. 5 Awgaid sino-sino yang yamangagad sang pyaglaongan ng Tohan, bunna na pyapakadakowa nan yang Tohan sang kanan pangatayan. Yan agaw yang tanda na yagakasambok kita sang Tohan kong mangagad kita kanan. 6 Agaw, sino-sino yang yagalaong na yagakasambok yan sang Tohan, dait na yang batasan nan magonawa sang batasan ni Isa Almasi.

7 Mga kalomonan ko, yang sogowan na syosorat ko kamayo adon dili ng bago awgaid dadaan da. Dadaan da yan kay disti sidtong wakto na yamangintoo kamo sang Almasi, yan yang sogowan ng Tohan kanatun aw yan yang indowan na dyudungug mayo na dait kamo maglinoyay. 8 Awgaid yani na sogowan mapakay oman tawagun ng bago kay sabap sang ininang ng Almasi yamakita natun yang bunna na looy, aw makita da oman yani sang kinabowi mayo. Kay yagaipan da mawaa yang kaduguuman aw similat da yang bunna na kaamdagan.

9 Sino-sino yang yagalaong na iyan yan magauya sang kaamdagan awgaid yagadumut sang lomon nan sang pagpangintoo, na, idto pa yan magauya sang kaduguuman. 10 Awgaid yang otaw na yamalooy sang lomon nan, idto yan magauya sang kaamdagan aw way maskin ono na iyan kanan na pagasabapan ng pagpakadosa. 11 Awgaid yang otaw na yagadumut sang lomon nan, iyan yan magauya sang kaduguuman. Maynang yagapanaw-panaw yan sang kaduguuman aw wa yan akatigam daw makain yan kadto kay sabap sang kaduguum magonawa yan ng bota na di makakita.

12 Na, yagasorat ako kamayo, mga anak ko, kay yampon da ng Tohan yang mga dosa mayo sabap sang ininang ni Isa Almasi. 13 Yagasorat ako kamayo, mga mangkatikadung, kay ikilaa kamo kang Isa Almasi na iyan da sikun pa sang pukas nang wa pa akabaoy yang donya. Yagasorat ako kamayo, mga olitawo, kay yamatalo mayo si Iblis na pyagasikunan ng kaatan.

14 Na, barikun ko yang pyaglaongan ko. Yagasorat ako kamayo, mga anak ko, kay ikilaa kamo sang Tohan na Ama. Yagasorat ako kamayo, mga mangkatikadung, kay ikilaa kamo kang Isa Almasi na iyan da sikun pa sang pukas nang wa pa akabaoy yang donya. Yagasorat ako kamayo, mga olitawo, kay matigsun yang pagpangintoo mayo aw iyan sang pangatayan mayo yang pyaglaongan ng Tohan. Agaw, yamatalo da mayo si Iblis na pyagasikunan ng kariko ng maat.

15 Na, ayaw mayo pagpalabia yang ininang aw batasan ng mga otaw na wa apangagad sang Tohan aw ayaw oman mayo pagpalabia yang maskin ono na adi sang donya. Kay kong palabiun mayo yang kadodonya, wa mayo apakadakowaa yang Tohan sang kamayo pangatayan. 16 Kay yang kariko na adi sining donya magonawa ng kyakanapsowan ng mga otaw aw yang napso sang maskin ono na kikita nilan, aw yang pagpasigarbo sang yamainang nilan, yan kariko wa magasikun sang Tohan na Ama, awgaid kadodonya gaid yan. 17 Yang donya aw yang kariko ng kyakanapsowan ng manosiya amawaa. Awgaid yang otaw na yamangagad sang karim ng Tohan amabowi taman sa taman.

18 Mga anak ko, masaid da domatung yang arikiyamat. Yamadungug da kowaw mayo na madatung ona yang kalaban ng Almasi. Aw adon madaig da yang mga kalaban nan. Agaw, kyakatigaman da natun na masaid da yang kataposan ng donya. 19 Yani na mga otaw na yosopak sang Almasi mga inagad natun silan sangaon. Awgaid ibiya silan kanatun kay dili silan ng bunna na inagad natun. Kay kong bunna silan na inagad natun, wa gao silan ibiya kanatun. Awgaid ibiya silan, agaw yamaklaro na dili silan ng bunna na mga inagad natun.

20 Awgaid kamo, yatagan da kamo ng Almasi ng Nyawa ng Tohan, aw sabap sinyan yamatigam da kamo sang kabunnaan. 21 Yagasorat ako kamayo dili sabap ng wa kamo akatigam sang kabunnaan awgaid sabap ng kyakatigaman da mayo, aw kyakatigaman oman mayo na way bakak na yagasikun sang kabunnaan. 22 Na adon, sino kadi yang bakakun? Yan yang otaw na yagalaong na si Isa dili ng Almasi, yang pyapasad na manlolowas. Yan na otaw yang kalaban ng Almasi. Tyatarikodan nan yang Tohan na Ama aw tyatarikodan oman nan yang kanan Anak. 23 Sino-sino yang di amangintoo sang Anak, waa ansan kanan yang Tohan na Ama. Sino-sino yang yamangintoo sang Anak, iyan oman kanan yang Ama.

24 Agaw, sigorowa mayo na abay magpabilin sang kamayo pangatayan yang indowan na dyudungug mayo disti sang pagsogod ng pagpangintoo mayo. Kay kong idtong dyudungug mayo abay magpabilin sang kamayo pangatayan, abay kamo magkasambok sang Anak ng Tohan kipat sang Tohan na Ama. 25 Aw yan agaw yang pyapasad ng Almasi kanatun na atagan kita ng kinabowi na way kataposan.

26 Na, yani yang syosorat ko kamayo antak kamo magbantay sang mga otaw na marim magpasoway kamayo sang bunna na indowan. 27 Awgaid kamo, yatagan da kamo ng Almasi ng Nyawa ng Tohan. Aw sabap ng iyan da yan sang kamayo pangatayan, di da kinaanglan na aon pay magaindo kamayo. Kay yang Nyawa ng Tohan yang yagaindo kamayo sang kariko ng mga butang. Aw yang kariko ng pyagaindo nan bunna, aw dili ng bakak. Agaw, inanga mayo yang pyagaindo kamayo ng Nyawa ng Tohan aw abaya mayo yang pagkasambok mayo sang Almasi.

28 Mga anak ko, abaya mayo yang pagkasambok mayo sang Almasi. Kay kong maynan, di kita amalluk sang allaw ng pagbarik nan adi sang donya aw di oman kita amasipug mangadap kanan. 29 Yamatigam kamo na yang Almasi matorid. Agaw, dait na katigaman oman mayo na sino-sino yang yagainang ng matorid, anak yan ng Tohan.