1 Adon, sarta yagaindo pa si Pitros aw si Yahiya sang mga otaw, yodood kanilan yang mga imam, yang mga Sadoki*4:1 Yang mga Sadoki sambok na gropo sang agama Yahodi na wa apangintoo na amabowi oman yang mga patay. aw yang kapitan ng mga gowardya sang Baay ng Tohan. 2 Bali na kadaman nilan sidtong dowa na sahabat kay yagaindo silan sang mga otaw na yamabowi oman si Isa aw idto yang tanda na amabowi oman yang kariko ng mga patay. 3 Agaw dyadakup nilan si Pitros aw si Yahiya aw sabap ng kasilum da pyapapiriso nilan taman ng pagkailaw. 4 Awgaid maskin maynan, madaig yang yamangintoo kang Isa na yamakadungug sang pyagaindo nilan Pitros. Yang kadaig ng kausgan gaid yadatung ng mga 5,000.

5 Na, pagkailaw disinyan yanagkatipon adto sang Awrosalam yang mga pangoo sang agama, yang mga pangoo sang banwa aw yang mga magiindoway ng Hokoman.†4:5 Yaning toongka gropo yang mga opisyales sang Makagwas na Hokmanan na magonawa ng konseho ng mga Yahodi na 70 ka otaw yang kadaig nilan. 6 Iyan oman si Anas na Dakowa na Imam, si Kayapas, si Yahiya, si Iskandar aw yang kadaigan pa na mga usug na sakop ng pamilya ni Anas. 7 Ansinyan pyapaatobang nilan yang dowa na sahabat adto kanilan aw osipa nilan, laong nilan, “Wain magasikun yang kabarakat mayo paginang sinyan na katingaan? Sino yang yamatag kamayo ng kapatot pagpakadyaw sinyan na sadi?”

8 Ansinyan pyagabuutan si Pitros ng Nyawa ng Tohan aw tyomobag kanilan, laong nan, “Mga pangoo sang agama aw mga pangoo sang banwa, 9 aw osipun mayo kami adon makapantag sang kadyawan na yamainang sining sadi aw monono yang pagpakadyaw kanan, 10 na, dait mayo katigaman kipat sang kariko ng mga bangsa Israil na yaning otaw na yagaindug adon sang atobangan mayo yamadyaw sabap sang kabarakat ni Isa Almasi na taga Nasarit. Yani si Isa lyalansang mayo sang kros, awgaid byobowi oman yan ng Tohan. 11 Makapantag oman kanan yang yamakasorat sang Kitab na yagalaong,

13 Na, yamangkatingaa da yang kariko ng mga pangoo pagkita nilan sang kaisug nilan Pitros aw si Yahiya pagtobag kanilan aw pagkatigam nilan na silan way mataas na pagpangadi. Aw ansinyan kyakatigaman nilan na yani na mga otaw mga inagad ni Isa sangaon. 14 Awgaid way akapaglaong nilan kay kikita nilan yang otaw na pyapakadyaw na yagaindug sang masaid kang Pitros aw si Yahiya. 15 Agaw pyapalogwa da nilan si Pitros aw si Yahiya sikun sang Makagwas na Hokmanan antak pagbaawan nilan daw ono yang inangun nilan. 16 Laong nilan, “Ono yang inangun ta sini na mga otaw? Yang kariko ng mga otaw adi sang Awrosalam yamatigam sang katingaan na ininang nilan aw di kita makapaglaong na bakak gaid inyan. 17 Awgaid antak di yani akatigaman ng kadaigan pa na mga otaw, maynini yang inangun ta. Pagalaongon natun silan na di da silan magindo sang maskin sino ng makapantag kang Isa.”

18 Ansinyan pyapatawag nilan si Pitros aw si Yahiya aw pyagalaong nilan na di na di silan maglaong atawa magindo sang ngaan ni Isa.

19 Awgaid tyomobag kanilan si Pitros aw si Yahiya, laong nilan, “Dumduma mayo daw wain yang madyaw na inangun sang pagtanaw ng Tohan, yang pagpangagad sang sogo mayo atawa yang sogo ng Tohan? 20 Kay di gaid mapakay na ondangan nami yang pagpayapat sang mga otaw ng makapantag sang kikita aw dyudungug nami.” 21 Na, syasagda da oman silan ng mga pangoo aw byobooyan silan. Aw maskin karim gao nilan kastigoon yaning dowangka otaw, di nilan mainang kay yamalluk silan sang mga otaw. Kay yang kariko ng mga otaw yagapoji sang Tohan sabap sidtong katingaan na yamainang. 22 Kay idtong otaw na pyapakadyaw sobra da sang 40 ka toig yang idad.

23 Na, pagkatapos kabooyan si Pitros aw si Yahiya, kyomadto silan sang mga kaupdanan nilan na mga yamangintoo kang Isa aw paglaonga nilan sang pyaglaongan kanilan ng mga pangoo ng mga imam aw yang mga pangoo sang banwa. 24 Na, pagdungug nilan sinyan, yagakasambok silan sang pagdowaa adto sang Tohan aw laong nilan, “Ya Tohan na Labi na Mabarakat, ikaw yang yagabaoy sang langit aw lopa, kipat oman sang dagat aw yang kariko ng lasak sinyan. 25 Sabap sang kabarakat ng Sotti na Nyawa yagalaong yang sogowanun mo na si Soltan Daud na kanami ompo sang pyapakatigam mo kanan, laong nan,

27 “Ya Tohan,” laong nilan, “bunna sagaw yani na pyaglaongan kay yanagkatipon adi sining syodad si Soltan Hirod aw si Pontiyos Pilato upud sang mga dili ng Yahodi aw yang mga bangsa Israil antak magkontra silan kang Isa na sotti na sogowanun mo maskin yan yang pipili mo antak magdato. 28 Ininang nilan yani kay antak matoman yang pyagakahanda mo. Aw yamaitabo inyan sabap sang karim aw kabarakat mo. 29 Aw adon, ya Tohan, tanawa yang pyagpangalluk nilan kanami aw tabangi kami na mga sogowanun mo antak aon kaisug nami sang pagpayapat ng pyaglaongan mo. 30 Apakita mo gao yang kanmo kabarakat antak makapakadyaw kami sang mga masakitun aw togotan mo gao kami paginang ng mga tanda aw katingaan sabap sang kabarakat ni Isa na sotti na sogowanun mo.”

31 Pagkatapos nilan magdowaa, yamagayung yang baay na pyagatiponan nilan. Ansinyan pyagabuutan silan ng Nyawa ng Tohan aw wa da silan akalluk pagpayapat sang pyaglaongan ng Tohan.

32 Adon, yang kariko ng mga yamangintoo kang Isa yagakasambok yang dumduman aw pangatayan nilan. Way isa na yagalaong na yan gaid yang tagtomon ng kabtangan nan kondi pyagabain-bain nilan yang kariko ng mga butang nilan. 33 Aw yang mga sahabat yagadan ng kabarakat ng Tohan pagsaksi makapantag sang pagkabowi oman ni Tagallang Isa, aw yang kariko ng mga yamangintoo tyatabangan ng Tohan. 34 Way isa kanilan na aon pay kikinaanglan kay yang mga otaw na aon mga lopa atawa mga baay nilan yanagbarigya sinyan aw yang alin 35 yatag nilan adto sang mga sahabat. Aw ansinyan pyagabain-bain nilan yang sapi aw pangatagan sang mga otaw sobay sang kikinaanglan nilan.

36 Na, idto yang ininang ni Yosop na taga Kipros. Sambok na topo yan ng tribo ni Libi aw pyagangaanan yan ng mga sahabat ni Barnabas na yang mana san “yang otaw na yagapakatigsun sang pangatayan.” 37 Byabarigya nan yang kanan lopa aw yang alin sinyan dyadaa nan adto sang mga sahabat.