1 Na, sabap ng mga anak da kamo ng Tohan na kyakalugunan nan, pagsiling kamo kanan. 2 Kinaanglan na makita sang kinabowi mayo na aon looy mayo sang kapagonawa mayo magonawa sang looy kamayo ng Almasi. Sabap sang looy nan kanatun yagapakamatay yan para kanatun na magonawa ng korban atawa maballo na pasampay na amakasowat sang Tohan.

3 Agaw, ayaw kamo magjina atawa maginang ng maskin ono na kadopangan. Aw ayaw oman kamo magnapso sang kakawasaan. Maskin yang paglambit sini na mga batasan dili ng dait kamayo kay mga sakop da kamo ng Tohan. 4 Di oman dait kamayo yang binastos na mga pyaglaongan, mga istorya na way poos atawa mga komedya na lain paningugan. Awgaid yang dait kamayo na amanginsokor kamo sang Tohan. 5 Kay yamatigam da kamo na sino-sino yang yagajina atawa yagainang ng kadopangan, di amakaangkun ng kadyawan adto sang pyagadatowan ng Almasi na pyagadatowan oman ng Tohan. Magonawa oman sinyan yang otaw na yaganapso sang mga kabtangan, di oman yan amakaangkun ng kadyawan kay pyapalabi nan yang mga butang adi sang donya kaysang Tohan. 6 Ayaw kamo magpaningug sang mga otaw na yagalaong na dili ng maat yang mayninyan na mga inang. Kay sabap sinyan na mga inang isiksaun ng Tohan yang mga otaw na wa apangagad kanan. 7 Agaw, ayaw kamo magupud sang mga otaw na yagainang ng maynidto.

8 Kay sangaon, iyan oman kamo sang kaduguuman. Awgaid adon, iyan da kamo sang kaamdagan sabap sang pagkasambok mayo kang Tagallang Isa. Agaw, dait na apakita mayo pinaagi sang batasan mayo na iyan kamo sang kaamdagan. 9 Paginang da kamo ng madyaw aw matorid aw pangagadi mayo yang kabunnaan kay iyan kamo sang kaamdagan. 10 Aw paningkamoti mayo katigaman daw ono yang amakasowat sang Tagallang. 11 Pagpakawat kamo sang mga inang na way poos na ininang nidtong mga otaw na iyan sang kaduguuman. Awgaid pakitaan gao mayo kanilan na maat yang ininang nilan. 12 Kay makasipug maskin pa yang paglambit sang ininang nilan sang tago. 13 Awgaid kong madaa silan sang kaamdagan kay pyapakita da mayo kanilan yang madyaw na ininang mayo, amaklaro da kanilan na maat yang ininang nilan. 14 Kay yang kariko na ibutang sang kaamdagan amainang oman ng maamdag. Kay aon yamakasorat sang Kitab na yagalaong,

15 Idto sagaw, timani mayo yang batasan mayo. Ayaw kamo magsiling sang mga otaw na di makasabot, awgaid pagsiling kamo sang mga otaw na matigam daw ono yang barapantag. 16 Ayaw mayo pagsapadi yang oras kondi gamita mayo yani sang paginang ng kadyawan kay madaig da adon yang mga otaw na yagainang ng maat. 17 Agaw, ayaw kamo magsiling sang mga otaw na di magdumdum sang madatung, awgaid paningkamoti mayo katigaman daw ono yang kahanda kamayo ng Tagallang. 18 Ayaw kamo maglasing kay kong maynan, di da mayo kapogongan yang maat na mga inang mayo. Awgaid togoti mayo na pagabuutan kamo ng Nyawa ng Tohan. 19 Sang pagbaaw-baaw mayo gamita mayo yang mga pyaglaongan sikun sang Kitab Jabor aw mga kanta ng pagpoji. Pagkanta aw pagpoji kamo sang Tagallang sikun sang kaiklas ng pangatayan mayo. 20 Aw abay mayo panginsokori yang Tohan na kanatun Ama sang kariko ng mga butang sabap sang ngaan ni Isa Almasi na kanatun Tagallang.

21 Pagpasakop kamo sang matag-isa sabap sang pagaddat mayo sang Almasi.

22 Kamo na mga asawa, pagpasakop kamo sang kamayo bana magonawa sang pagpasakop mayo sang Tagallang. 23 Kay yang bana maynang oo ng kanan asawa magonawa sang Almasi na yan yang maynang oo ng mga yamangintoo kanan na silan yang jamaa, yang tyatawag na lawas nan. Aw yang Almasi dili gaid yang oo nilan kondi yang Manlolowas oman nilan. 24 Agaw, magonawa sang pagpasakop ng jamaa sang Almasi dait na yang mga asawa oman magpasakop sang kanilan bana sang kariko ng mga butang.

25 Kamo oman na mga bana, kaluguni mayo yang asawa mayo magonawa sang lugun ng Almasi sang mga yamangintoo kanan. Kay sabap sang looy nan kanatun yagapakamatay yan para kanatun 26 antak inangun nan kita na mga sakop ng Tohan. Pyapasotti nan kita sabap sang pagpangintoo natun sang pyaglaongan ng Tohan aw sabap sang pagpasogbo natun na idto yang tanda na yamangintoo kita kanan. 27 Ininang nan yani kay antak sang madatung na mga allaw matarima nan yang jamaa na magonawa ng bobay na apangasawaun nan, yang bobay na madyaway, sotti, way konot atawa sayup aw way maskin ono na akasaway. Agaw, maynan da yang kariko natun na yamangintoo sang Almasi kay kyakamang da yang mga dosa ta aw waa day akasaway kanatun. 28 Na, magonawa sinyan kamo na mga bana, dait na kalugunan mayo yang asawa mayo magonawa sang sarili mayo na lawas. Yang otaw na malugun sang asawa nan, malugun oman sang sarili nan. 29 Kay way otaw na yagadumut sang sarili nan na lawas kondi apakanun aw atimanun nan ng madyaw. Magonawa sinyan yang ininang ng Almasi sang jamaa 30 kay kita-kamo na yamangintoo kanan magonawa ng mga bain sang kanan lawas. 31 Sang way dowa-dowa kyakatigaman mayo yang yamakasorat sang Kitab na yagalaong, “Sabap sinyan ibiyaan ng usug yang kanan ama aw ina kay umupud sang asawa nan aw silan dowa amainang ng sambok gaid na lawas.”*5:31 Yani yang yamakasorat sang Kitab Tawrat, Tagna Donya 2:24. 32 Na, maum yang mana sinyan, aw yang karim ko ipasabot yang relasyon ng Almasi adto sang jamaa. 33 Awgaid yani para kamayo oman na mga magasawa. Agaw, kamo na mga bana, kaluguni mayo yang asawa mayo magonawa sang sarili mayo. Aw kamo na mga asawa, addati mayo yang bana mayo.