1 Na, yang karim ko ipasabot kamayo magonawa sang kabutang ng sambok na isu na aon kabilin kanan ng ama nan. Sarta isu pa yan magonawa yang kabutang nan sang kabutang ng mga allang sang kanilan baay maskin yan da yang tagtomon ng kariko ng kabtangan. 2 Kay sarta tagbi pa yan, aon mga otaw na syasarigan sang pagatiman kanan kipat sang mga kabtangan nan sampay sidtong wakto na pyagabuut ng kanan ama. Pagdatung sidto na wakto, atagan da yan ng kapatot magbuut sang mga kabtangan nan. 3 Magonawa oman sinyan kita sangaon. Kay sidtong wakto na maynang isu pa kita kay wa pa kita akatigam ng makapantag sang Almasi, main kita ng mga allang na yamangagad sang kabatasanan ng mga kaompowan ta aw sang pyagaindo ng mga otaw adi sining donya. 4 Awgaid pagdatung ng wakto na pyagakahanda ng Tohan, syosogo nan adi sining donya yang Anak nan. Yamabaoy yan ng manosiya kay yamaotaw yan pinaagi sang sambok na bobay. Yahodi yan aw sakop yan sang Hokoman ng agama Yahodi 5 antak lowasun nan yang mga otaw na yamasakop sang Hokoman aw antak tarimaun kita ng Tohan na mga anak nan. 6 Aw adon pyapakita ng Tohan na kita mga anak da nan kay yatagan nan kita ng Sotti na Nyawa na iyan oman sang kanan Anak na si Isa Almasi. Aw sabap ng idi da sang kanatun pangatayan yang Sotti na Nyawa matawag da natun yang Tohan yang kanatun Ama. 7 Agaw adon, di da kamo ng magonawa ng allang kondi mga anak da kamo ng Tohan. Aw sabap ng mga anak da kamo ng Tohan, amadawat oman mayo yang kariko ng kadyawan na pyagakahanda nan para sang mga anak nan.

8 Sangaong wa pa kamo akatigam sang Tohan, pyapangagadan mayo yang mga tagallang mayo aw main kamo ng mga allang nilan. 9 Awgaid adon ikilaa da mayo yang Tohan, atawa mas madyaw aw magalaong ako na kikilaa da kamo ng Tohan na sakop nan. Na, nanga sa adon karim oman mayo mangagad sang kabatasanan aw mga indowan na way poos aw di makatabang kamayo? Karim ba mayo na amainang oman kamo ng mga allang sinyan? 10 Kay yamangagad da oman kamo sang indowan makapantag sang dakowa na mga allaw aw mga pakaradyaan sang mga bowan aw mga toig na yosobay sang kasogowan ng agama Yahodi. 11 Na, yamarido da ako kamayo kay basin kyakawaan ng poos yang kariko ng gawbuk ko ansan kamayo.

12 Mga kalomonan ko, pangayoon ko kamayo na mosonod kamo kanak. Kay maskin Yahodi ako, disti sang pagsarig ko sang Almasi wa da ako apangagad sang Hokoman ng agama Yahodi aw yamainang da ako ng magonawa kamayo na dili ng Yahodi. Aw pagalaongon ta kamo na way ininang mayo kanak na maat sidtong wakto na idto pa ako kamayo. 13 Kyakatigaman sa mayo na yakapayapat ako ng Madyaw na Gogodanun adto kamayo sang pirmiro sabap ng yamasakit ako sangaon. 14 Aw maskin mairap kamayo yang idto na sakit ko, wa kamo magalain kanak aw wa oman mayo ako atarikodi. Awgaid sang kabunnaan, tyatarima mayo ako na main ako ng sambok na malaikat na syosogo ng Tohan atawa si Isa Almasi mismo na yakaon kamayo. 15 Dakowa yang kasowat mayo sangaong idto pa ako kamayo. Ako mismo makasaksi na aw mapakay, lusatun pa mayo yang mata mayo aw atag mayo kanak sabap sang lugun mayo kanak. Awgaid adon, nanga sa yamalain da kamo kanak? 16 Yamainang da ako ng kalaban mayo sabap ng kabunnaan yang pyapayapat ko kamayo?

17 Na, yang mga otaw na yagaindo kamayo ng dili ng bunna, dakowa yang kallini nilan kamayo. Awgaid yang katoyowan nilan dili ng madyaw kay karim nilan na magapakawat kamo kanak antak silan da yang apangagadan mayo. 18 Na, madyaw kong aon mga otaw na yamallini sang kapagonawa nilan basta madyaw gaid yang katoyowan magonawa sang ininang mayo kanak sangaon. Aw padayonon gao mayo yang kallini mayo kanak maskin wa da ako ansan kamayo. 19 Kamo na magonawa ng mga anak ko, sabap kamayo yamagi da oman ako ng kasikotan magonawa ng bobay na yagapamati. Yamarido ako kamayo sampay na di pa makita ansang kinabowi mayo yang kinaiya ng Almasi. 20 Karim ko gao na ansan ako kamayo antak makapagbaaw ako kamayo ng madyaw kay bali na pagkarido ko kamayo.

21 Na adon, kamo na marim mangagad sang Hokoman ni Nabi Mosa, aon osip ko kamayo. Kyakatigaman ba mayo daw ono yang pyagalaong sang Hokoman? 22 Kay yamakasorat sang Kitab Tawrat na si Nabi Ibrahim aon dowambok na anak na usug, yang isa sang kanan asawa na sambok na allang, aw yang isa sang ona nan na asawa na dili ng allang.*4:22 Yang makapantag sang pagkaotaw sining dowa na anak mabatya sang Kitab Tawrat, Tagna Donya 16:15 aw 21:2-3. 23 Yang anak nan sang asawa nan na allang yamaotaw sang kyakaanadan na pamaagi ng manosiya. Awgaid yang anak nan sang asawa nan na dili ng allang yamaotaw sabap sang pasad ng Tohan.

24 Adon, yaning dowangka bobay magonawa ng pasombingay kay mga opamaan silan sidtong dowambok na pyagapasadan na ininang ng Tohan sang manosiya. Si Hajara na yan yang bobay na allang, yang opamaan sang pyagapasadan na yamainang adto sang Butay ng Torosina. Sidto na wakto yatag ng Tohan yang Hokoman kang Nabi Mosa, aw yang kariko ng yamasakop sang Hokoman main ng allang magonawa kang Hajara aw yang mga anak nan. 25 Agaw, si Hajara yang opamaan sang Hokoman na yatag adto sang Butay ng Torosina adto sang banwa ng Arabiya. Aw opamaan oman yan sang mga Yahodi na sakop sang syodad ng Awrosalam kay magonawa silan ng mga allang sabap ng yamangagad silan sang Hokoman ni Nabi Mosa. 26 Awgaid si Sara, yang bobay na dili ng allang, yan yang opamaan sang mga otaw na sakop ng Awrosalam na adto sang sorga. Magonawa yan ng kanatun ina kay yang kariko natun-mayo na yamangintoo aw yamangagad sang Almasi yamakalibre da sang Hokoman. 27 Kay yamakasorat sang Kitab,

28 Na adon, mga kalomonan ko, mga anak da kamo ng Tohan sabap sang kanan pasad, magonawa kang Isahak na yamaotaw kang Sara sabap sang pasad ng Tohan adto kang Nabi Ibrahim. 29 Sangaong ona, yang anak ni Nabi Ibrahim na yamaotaw sang kyakaanadan na pamaagi, pyapakasikotan nan yang mangod nan na yamaotaw sabap sang kabarakat ng Nyawa ng Tohan. Na, magonawa oman sinyan kita adon kay pyapakasikotan kita ng mga otaw na sakop sang Hokoman. 30 Awgaid ono yang yamakasorat sang Kitab? Laong ng Kitab, “Papanawa yang bobay na allang kipat sang anak nan kay di mapakay na atagan ng kabilin yang anak ng allang. Kay yang anak ng bobay na dili ng allang, yan gaid yang amakadawat ng kabilin ng kanan ama.”‡4:30 Yani yang yamakasorat sang Kitab Tawrat, Tagna Donya 21:10. 31 Idto sagaw, mga kalomonan ko na yasarig sang Almasi, kita dili magonawa ng anak ng allang kondi magonawa ng anak ng bobay na dili ng allang.