5
1 Na adon, yang kada isa na Dakowa na Imam ng mga Yahodi, pipili yan sikun sang mga otaw antak magpatunga kanilan adto sang Tohan. Pipili yan na Dakowa na Imam antak magpasampay aw magpakorban adto sang Tohan antak maampon yang mga dosa nilan. 2 Na, sabap ng manosiya oman yan na magpakainang ng dosa, matigam yan malooy sang mga otaw na yamakadosa aw yakasoway sang matorid na daan kay wa silan akatigam na sayup kadi yang ininang nilan. 3 Aw sabap ng makadosa oman yan kinaanglan yan magpakorban adto sang Tohan dili gaid sabap sang dosa ng mga otaw, kondi sabap oman sang mga dosa nan.
4 Way otaw na makapagbuut na mainang ng Dakowa na Imam, awgaid yang Tohan yang magapili sang otaw na atagan nan sini na kapatot magonawa sang pagpili nan kang Haron*5:4 Tanawa sang Kitab Tawrat, Pagpanaw 28:1. sangaong ona. 5 Magonawa sinyan, wa magabuut yang Almasi na atagan yan ng kapatot na mainang ng Dakowa na Imam kondi yang Tohan yang yagapili kanan. Kay yagalaong yan kanan,
“Ikaw yang Anak ko.
Aw adon apakatigam ko na ako yang kanmo Ama.Ӡ5:5 Yani na ayatan yamakasorat sang Kitab Jabor 2:7.
6 Aw yamakasorat oman sang tuna na ayatan na yagalaong yang Tohan,
“Imam kaw taman sa taman
magonawa sang pagkaimam ni Malkisadik.”‡5:6 Yani na ayatan yamakasorat sang Kitab Jabor 110:4.
7 Sang wakto na adi pa sang donya si Isa, yagadowaa yan na yagatiyao ng makusug aw yamangayo-ayo yan adto sang Tohan na yan yang makalowas kanan sikun sang pagkamatay. Aw dyudungug ng Tohan yang pagpangayo-ayo nan sabap ng pyapangagadan nan yang kahanda ng Tohan. 8 Na, maskin Anak yan ng Tohan, yamagi yan ng kasikot antak katigaman nan daw monono yang pagtoman sang kahanda ng Tohan. 9 Aw pagkatapos nan kaagian yang kariko ng dait nan agian, yamainang yan ng Manlolowas ng kariko ng mga otaw na yamangagad kanan aw taman sa taman lowas da silan sikun sang kasiksaan. 10 Aw ininang yan ng Tohan na Dakowa na Imam magonawa sang pagkaimam ni Malkisadik.
Pagbantay kamo antak di kamo Kawaan ng Pagpangintoo mayo
11 Na, madaig pa gao yang pagalaong ko kamayo makapantag sang pagkaimam ni Isa aw si Malkisadik. Awgaid mairap yani pakatigam kamayo kay maynang matigas yang oo mayo. 12 Sang bunna-bunna, kamo da gao yang magaindo sang kadaigan kay dogay da kamo yamangagad kang Isa. Awgaid sampay adon kinaanglan na aon pay magaindo kamayo ng ona na mga indowan makapantag sang pyaglaongan ng Tohan. Maynang kamokan pa kamo na abay marim somoso kay di pa makakan! 13 Na, yang mayninyan na otaw wa akatigam daw ono yang madyaw aw maat. 14 Awgaid yang maum na indowan na maparias sang pagkan para sang mga otaw na mataas da yang idad kay kyakaanadan da nilan yang pagpangagad sang madyaw aw yang pagtarikod sang maat.