1 Pagkatapos magosiyat tyomobang si Isa sikun sang butay aw madaig yang mga otaw na yamagad kanan. 2 Ansinyan dyomood kanan yang sangka otaw na sanglaun. Syomojod yan sang atobangan nan aw laong nan, “Kay Dato, aw karim mo, makapagkadyaw kaw sang kanak sakit.”

3 Ansinyan dyadapunan ni Isa yang inyan na otaw ng arima nan aw laong nan, “Ud, karim ko. Amadyaw da kaw.” Na, sinyan na wakto yamawaa yang sangla aw yamadyaw da yang lawas nan. 4 Ansinyan yagalaong kanan si Isa, “Ayaw da yani paglaongan sang maskin sino, awgaid kadto sang imam aw pagpatanaw kanan. Aw pagpasampay adto sang Tohan ng pyagasogo ni Nabi Mosa sang pagpangimunna sang mga otaw na yamadyaw da kaw.”*8:4 Tanawa sang Kitab Tawrat, Pangibada 14:1-7.

5 Ansinyan pagdatung ni Isa sang longsod ng Kapirnaom, aon syomongon kanan na sangka otaw na kapitan ng mga sondao na taga Roma. Yagapakilooy yan kanan 6 aw laong nan, “Kay Sir, yang sogowanun ko yagakowang adto sang baay na yamasakit. Di da yan makaliyuk aw bali na kasakit nan.”

7 Tyomobag si Isa, “Anda, akadtowan da ko aw apakadyawon ko yan.”

8 Awgaid yagalaong yang kapitan, “Kay Sir, ayaw da magkadto kay way kapatot ko pagtarima kanmo sang kanak baay. Paglaong gaid aw amadyaw da yang sogowanun ko. 9 Kyakatigaman ko yani kay ako yagapasakop sang labaw pa kanak aw aon oman mga sondao ko na yagapasakop kanak. Kong sogoon ko yang isa, ‘Adto kaw,’ makadto yan. Kong sogoon ko yang isa, ‘Adi kaw,’ makani yan. Aw kong sogoon ko yang kanak sogowanun, ‘Inanga yani,’ na, inangun da nan.”

10 Pagdungug sinyan ni Isa, yamatingaa yan aw yagalaong yan sang mga otaw na yamagad kanan, “Sang bunna-bunna pagalaong ko kamayo na waa pay kikita ko na otaw na bangsa Israil na maynini kadakowa ng pagpangintoo nan. 11 Timani mayo yani! Sang madatung na mga allaw madaig yang mga dili ng Yahodi sikun sang yagakatuna-tuna na mga banwa sang silatan aw sallupan na managupud kang Ibrahim, Isahak aw si Yakob sang kandori adto sang pyagadatowan ng Tohan. 12 Awgaid madaig yang mga otaw na bangsa Israil na silan gao yang amasakop sang pyagadatowan ng Tohan, awgaid di silan amakasuud. Itimbag silan ng Tohan adto sa logwa sang kaduguuman aw adto da silan magtiyao aw mangoyagut yang onto nilan.”

13 Ansinyan yagalaong si Isa sang kapitan, “Ori da, aw amatoman yang pyapangayo mo sabap sang pagpangintoo mo.” Aw sinyan na wakto yamadyaw da yang sogowanun nan.

14 Ansinyan kyomadto si Isa sang baay ni Pitros. Pagdatung nan ansan, kikita nan yang ogangan na bobay ni Pitros na yagakowang kay labi na mapaso yang lawas nan. 15 Ansinyan kyukuputan ni Isa yang arima ng bobay aw yamawaa dayon yang kapaso ng lawas nan. Na, yagabangon da yan aw pakana nan silan Isa.

16 Pagkakasilum da, madaig yang mga otaw na kyakasaytanan na dyadaa adto kang Isa. Pyapalogwa ni Isa yang mga saytan sikun sidtong mga otaw sang sambok gaid na paglaong aw pyapakadyaw nan yang kariko ng mga masakitun. 17 Ininang nan yani kay antak matoman yang pyaglaongan ni Nabi Isayas na laong nan, “Yan mismo yang yakamang sang kanatun mga sakit aw yagapakadyaw kanatun.”†8:17 Yani na ayatan yamakasorat sang Kitab Tawrat, Nabi Isayas 53:4.

18 Sangallaw disinyan pagkita ni Isa na madaig yang mga otaw na yanagkatipon sang palibot nan, yagalaong yan sang mga inindowan nan, “Mataripag da kita sang linaw.” 19 Sinyan na wakto dyomood kanan yang sambok na magiindoway ng Hokoman aw yagalaong yan kanan, “Kay Goro, amagad ako kanmo maskin makain kaw kadto.”

20 Tyomobag si Isa aw laong nan, “Yang mga milo aon kanilan tagowanan aw yang mga langgam aon kanilan pogad. Awgaid ako na Anak ng Manosiya,‡8:20 Yang pyaglaongan na Anak ng Manosiya sambok na titolo na gyagamit ni Isa Almasi sang ginawa nan. Yani na titolo yagasikun sang Kitab Tawrat, Nabi Daniyal 7:13-14, aw yang mana sinyan na si Isa yamabaoy ng manosiya, awgaid yagasikun yan sang sorga aw yatagan yan ng Tohan ng kapatot pagdato sang kariko ng mga bangsa adi sang donya. way kanak logar na akakowangan ko.”

21 Aon oman sambok na inindowan nan na yagalaong kanan, “Kay Dato, omori pa nay ako kay ulubung pa ko yang kanak ama.”

22 Awgaid yagalaong si Isa kanan, “Pabayai yang paglubung sang mga patay adto sang mga otaw na main oman ng patay kay wa silan apangintoo kanak.”

23 Ansinyan syomakay si Isa sang bangka upud sang mga inindowan nan aw larga da silan. 24 Na, tyomokaw moyop yang makusug na samut aw kyakalasakan da ng tobig yang kanilan bangka. Awgaid si Isa yamatoog. 25 Agaw, yodoodan yan ng mga inindowan nan aw pokawa nilan. Laong nilan, “Kay Dato, tabangi kami! Amatay da kita!”

26 Yagalaong si Isa kanilan, “Nanga sa yamalluk kamo? Katagbi ng pagpangintoo mayo!” Ansinyan yagabangon yan aw syasagda nan yang samut aw yang mga baud. Na, ansinyan yamalinaw da.

27 Yamangkatingaa da yang mga inindowan nan aw yagalaong silan, “Sino kadi yani na otaw na maskin yang samut aw yang mga baud motoman kanan?”

28 Ansinyan pagdatung nilan adto sang dipag ng linaw sang logar ng mga taga Gadara,§8:28 Yang tuna na ngaan sang Gadara Girasa. Tanawa sang Kitab Injil, Markos 5:1 aw Lukas 8:26. syosongon si Isa ng dowangka otaw na lyomogwa sikun sang mga langob na pakoboran. Yaning dowangka otaw kyakasaytanan aw makallukay sagaw silan. Agaw, way makaagi sinyan na daan. 29 Ansinyan yamangiyak silan aw laong nilan, “Ikaw na Anak ng Tohan, ono yang labot mo kanami? Yakani kaw sang pagsiksa kanami maskin di pa wakto ng paghokom?”

30 Na, dili ng mawat kanilan aon dakowa na panon ng mga binatang na yanagdowang. 31 Agaw yagapakilooy yang mga saytan kang Isa aw laong nilan, “Aw bogawon mo kami, adto da kami pasuuda sidtong mga binatang.”

32 “Anda, kadto da kamo!” laong ni Isa. Ansinyan lyomogwa da yang mga saytan sikun sinyang dowangka otaw aw syomuud silan sang mga binatang. Aw yang tibok panon dyomaagan adto sang pangpang. Yamangkallog silan sang linaw aw yamangkalumus. 33 Pagkita sinyan ng mga magbabantayay ng mga binatang, dyomaagan silan adto sang longsod kay ogogod nilan sang mga otaw yang kariko ng yamaitabo kipat sang yamainang sidtong mga kyakasaytanan. 34 Agaw sa yang kariko ng mga otaw sidtong longsod kyomadto kang Isa aw yanagpakilooy silan kanan na apanawan da nan yang banwa nilan.