1 Ansinyan lyomogwa da si Isa sikun sang Baay ng Tohan. Aw sarta yagapanaw yan dyomood kanan yang mga inindowan nan aw yagabaaw silan kanan makapantag sang kadyaw ng paginang sang Baay ng Tohan. 2 Awgaid yagalaong kanilan si Isa, “Madyaw sagaw tanawon yang kariko sinyan. Awgaid bunna yang pagalaong ko kamayo na madatung yang allaw na way maskin sambok na bato na amabilin sang kyakabutangan nan kay obos silan apakaya-kaya.”*24:2 Yamatoman yaning pyaglaongan ni Isa mga 40 ka toig pagkatapos nan magbarik adto sang sorga. Sinyan na wakto syasapad ng mga taga Roma yang syodad ng Awrosalam.

3 Wa akadogay disinyan sarta yagaingkod si Isa adto sang Butay ng Jayton, dyomood kanan yang mga inindowan nan aw nang silan da gaid yagalaong silan, “Paglaonga kami daw kinno pa matoman yaning pyaglaongan mo aw ono yang tanda na magapakatigam kanami na mallug da kaw bomarik adi sang donya aw mallug da domatung yang kataposan ng donya.”

4 Tyomobag si Isa, laong nan, “Pagbantay kamo antak di kamo kalimbongan ng maskin sino. 5 Kay madaig yang mga otaw na madatung sang kanak ngaan aw magalaong silan na, ‘Ako yang Almasi,’ aw madaig yang akalimbongan nilan. 6 Amadungug mayo na aon mga gira sang masaid kamayo aw adto oman sang mawat na mga banwa. Awgaid ayaw kamo magkalluk kay dait na amaitabo yang kariko sinyan awgaid dili pa yani yang kataposan ng donya. 7 Yang sambok na bangsa mapaglaban adto sang tuna na bangsa, aw yang sambok na pyagadatowan mapaglaban adto sang kadaigan. Aw amaon yang gutum aw mga linog sang yagakatuna-tuna na mga banwa. 8 Awgaid yang kariko sinyan pagsogod pa gaid ng kasikotan na magonawa sang pagbati ng sambok na bobay sang pagpanganak.

9 “Ansinyan apandakupun aw adaun kamo adto sang mga pangoo antak kastigoon aw patayun kamo. Aw odumtan kamo ng kariko ng mga otaw sabap sang pagpangagad mayo kanak. 10 Sinyan na wakto madaig yang mga otaw na magatarikod sang pagpangintoo nilan kanak. Odumtan aw pagatraydoran nilan yang mga kaupdanan nilan. 11 Aw madaig yang mga otaw na magalaong na mga nabi kono silan aw madaig yang akalimbongan nilan. 12 Na, sabap ng labi da yang pagsopak ng mga otaw sang mga sogowan ng Tohan, waa day looy ng kadaigan sang kapagonawa nilan. 13 Awgaid sino-sino yang magapadayon sang pagpangintoo nan kanak sampay sang kataposan sini na mga kasikotan, amalowas. 14 Aw yang Madyaw na Gogodanun makapantag sang pagdato ng Tohan apayapat sang tibok donya antak yang kariko ng mga bangsa matigam. Pagkatapos sinyan madatung yang kataposan ng donya.

15 “Na, sang madatung na mga allaw makita mayo na aon yakabutang adto sang sotti na logar na haram na makabatar sang Baay ng Tohan. Ingidto yang pyagatagna ni Nabi Daniyal sangaon.†24:15 Tanawa sang Kitab Tawrat, Nabi Daniyal 9:27 aw 11:31-32. Aw sino-sino yang magabasa sini, sabta mayo yang mana sinyan. 16 Na, pagkita mayo sinyan, yang mga otaw na adto sang Yahodiya, dait silan domaagan adto sang kabtayan. 17 Yang otaw na adto sa logwa ng kanan baay, di dait somuud antak makamang pa sang maskin ono na butang nan. 18 Aw yang otaw na adto sang pawa, di dait mori antak makamang pa ng dagom nan. 19 Pagdatung sinyan na mga allaw, kallat sidtong mga mabdus aw sidtong mga yagapasoso kay mairapan silan domaagan. 20 Agaw, pagpangayo-ayo kamo adto sang Tohan na di gao yan amainang sang wakto ng tingtignaw atawa sang Allaw ng Pagpatana. 21 Kay sinyan na mga allaw labi da yang kasikotan na agian ng mga otaw. Sikun pa sang pagbaoy ng donya sampay adon waa pay main da nan na kasikotan, aw pagkatapos sinyan di da oman amainang yang magonawa sinyan. 22 Na, kong madogay yang inyan na kasikotan, amatay da yang kariko ng mga otaw. Awgaid sabap sang looy ng Tohan sang mga otaw na pipili nan, di nan apadogayun.

23 “Na, sinyan na mga allaw, kong aon magalaong kamayo na, ‘Tanawa idi da yang Almasi,’ atawa ‘Adto sidto yan,’ ayaw kamo magtoo kanilan. 24 Kay aon madatung na mga otaw na magalaong na silan kono yang Almasi. Aw aon oman mga otaw na magalaong na mga nabi kono silan, awgaid dili yan ng bunna. Magainang silan ng maskin ono na tanda aw katingaan kay antak kong mapakay mailad maskin yang mga pipili ng Tohan. 25 Na, timani mayo na pyagalaong da ta kamo sinyan sang wa pa yan akainang.

26 “Agaw, kong aon magalaong kamayo na, ‘Tanawa, adto yang Almasi sang mamingaw na banwa,’ ayaw kamo magkadto. Aw kong magalaong silan na, ‘Yagatago yan adi sa suud,’ ayaw oman kamo magtoo sinyan. 27 Kay kong mabarik ako na Anak ng Manosiya adi sang donya, makita yang pagdatung ko na magonawa sang kilat na yagasiga adto sang langit sikun sang silatan taman sang sallupan. 28 Magonawa yan sang pasombingay na yagalaong, ‘Daw wain yang patay, adto magatipon yang mga banog.’

29 “Na, pagkatapos sinyan na mga allaw ng kasikotan,

30 “Ansinyan amaon adto sang langit yang tanda na madatung da ako na Anak ng Manosiya. Aw yang kariko ng mga bangsa adi sang donya magatiyao kong kitaun nilan ako na Anak ng Manosiya sikun sang mga gabon na aon dakowa na kasiga aw kabarakat. 31 Aw ansinyan sang makusug na pagpaoni ng trompita osogoon ko yang kanak mga malaikat sang opat ka pinidyowan ng donya antak tiponon nilan yang mga otaw na pipili ko sikun sang kariko ng mga banwa.

32 “Na, dumduma mayo yang kaoy na igira. Aw yamanaringsing da yang mga sanga sinyan na kaoy, akatigaman mayo na masaid da yang panuga. 33 Magonawa sinyan, pagkita mayo na amainang da yang kariko sining pyagalaong ko kamayo, akatigaman mayo na mallug da ako magbarik adi sang donya. 34 Sang bunna-bunna pagalaong ko kamayo na amatoman yang kariko sinyan sang di pa amangkamatay yang kariko ng mga otaw na yamangkabowi adon. 35 Langit aw lopa amawaa, awgaid yang pyaglaongan ko di amawaa taman sa taman.

36 “Awgaid way otaw na yamatigam daw ono na allaw atawa ono na wakto ako mabarik. Maskin yang mga malaikat adto sang sorga aw maskin oman ako na Anak ng Tohan, wa akatigam. Yang Tohan da gaid na kanak Ama yang yamatigam sinyan. 37 Na, yang ininang ng mga otaw sidtong wakto na mabarik ako na Anak ng Manosiya adi sang donya magonawa sang ininang ng mga otaw sangaon sang panahon ni Nabi Noh. 38 Kay sang wa pa magalunup adi sang donya, way lain na kyakaridowan ng mga otaw yatabiya yang pagkan, paginum aw paginasawaay taman sidtong wakto na yosuud si Nabi Noh sang dakowa na bangka.§24:38 Tanawa sang Kitab Tawrat, Tagna Donya 7:6-24. 39 Na, wa silan akatigam na mallug da silan asapadan. Agaw pagdatung ng lunup, obos silan yamangkalumus. Na, magonawa sinyan yang kabutang ng mga otaw sang wakto na mabarik ako na Anak ng Manosiya. 40 Sidto na wakto, kong aon dowangka usug na yagagawbuk adto sang pawa, akamangun yang isa aw amabilin yang isa. 41 Kong aon dowangka bobay na yagalubuk ng omay, akamangun yang isa aw amabilin yang isa.

42 “Idto sagaw, pagbantay kamo kay wa mayo akatigami daw ono na allaw yang pagbarik ng kamayo Dato. 43 Awgaid dumduma mayo yani. Kong kyakatigaman ng tagtomon ng baay daw ono na wakto ng gabi yang pagdatung ng kawatan, sang way dowa-dowa di yan matoog kondi magabantay yan antak yang kawatan di makasuud sang baay nan. 44 Agaw sagaw, dait kamo magandam kay mabarik ako na Anak ng Manosiya sang wakto na wa kamo magadumdum na mabarik ako.”

45 Ansinyan yagalaong si Isa sini na pasombingay, laong nan, “Yang sogowanun na kasarigan aw matigam maggawbuk, yan yang ipiliun ng amo nan antak magdaa sang kadaigan pa na mga sogowanun sang baay. Aw yan da yang magaatag kanilan ng kanilan pagkan sang insakto na wakto. 46 Kadyaw ng ginawa sidtong sogowanun aw pagori ng amo nan adatungan yan na yagainang ng kanan gawbuk. 47 Sang bunna-bunna pagalaong ko kamayo na asarig da kanan ng amo nan yang kariko ng mga kabtangan nan. 48 Awgaid kong maat yang idto na sogowanun, magalaong yan sang ginawa nan, ‘Ah, madogay pa mori yang amo ko!’ 49 Tapos okolataun da nan yang mga kaupdanan nan na sogowanun aw abay gaid yan koman aw minum upud sang mga lasing. 50 Na, ansinyan omori da yang amo nan sang wakto na wa nan akaniyat kay wa nan akatigami daw ono na allaw yang pagbarik nan. 51 Ansinyan kastigoon da yan ng amo nan aw adto da yan obutang sang adatungan ng mga otaw na yagapakita-kita gaid na yamangagad silan sang Tohan. Adto da yan magtiyao aw mangoyagut yang onto nan.”