1 Ansinyan yagalaong oman si Isa adto sang mga inindowan nan, “Bunna yang pagalaong ko kamayo na aon mga otaw disini na di pa amatay taman sang ikitaun nilan na magadato da yang Tohan sang kanan kabarakat.”

2 Na, paglabay ng unum na allaw sikun disinyan pyagaagad ni Isa si Pitros, si Yakob aw si Yahiya aw tyomokod silan sang makagwas na butay na silan da gaid. Adto sa taas sarta yagatanaw silan kang Isa, yamaisab yang parangay nan. 3 Yang kanan dagom yagakapoti aw masindaway na way main da nan na kapoti adi sang babawan ng donya. 4 Sakadyap yagapakita kanilan si Nabi Mosa aw si Nabi Iliyas aw yapagbaaw silan kang Isa.

5 Ansinyan yagalaong si Pitros kang Isa, “Kay Goro, madyaw na ani kami sini. Magainang da kami ng toombok na payag, yang sambok kanmo, yang sambok kang Nabi Mosa aw yang sambok oman kang Nabi Iliyas.” 6 Maynini yang pyaglaongan nan kay wa yan akatigam daw ono yang dait nan paglaongon sabap ng labi da yang alluk nan kipat oman sang mga kaupdanan nan.

7 Ansinyan aon yamaon na gabon aw kyakatabonan silan sinyan. Aw aon yamadungug nilan na sowara sikun sang gabon na yagalaong, “Yani yang pyapasaya ko na Anak. Paningug kamo kanan.” 8 Ansinyan pagpanlingi nilan, waa day kikita nilan na kadaigan na bay dakman kang Isa.

9 Ansinyan pagtobang nilan sikun sang butay, syasagda silan ni Isa aw laong nan, “Ayaw kamo maggogod sang maskin sino sidtong kikita mayo taman sang amabowi oman ako na Anak ng Manosiya.”

10 Agaw wa silan magagogod sinyan sang kadaigan. Awgaid silan too, yanaginosipay silan daw ono yang mana ng pyaglaongan nan na amabowi oman yan.

11 Ansinyan yagaosip silan kang Isa, “Nanga sa yagalaong yang mga magiindoway ng Hokoman na madatung ona si Nabi Iliyas bago pa yang Almasi?”

12 Tyomobag si Isa, “Bunna sagaw na madatung ona si Nabi Iliyas kay dadayawon nan yang kariko. Na, kong maynan, nanga sa yamakasorat sang Kitab na ako na Anak ng Manosiya dait amagi ng kasikotan aw ataripundaan ng mga otaw? 13 Awgaid pagalaong ko kamayo na dyomatung da si Nabi Iliyas aw ininang kanan ng mga otaw yang maskin ono na kyakallinian nilan magonawa sang yamakasorat sang Kitab makapantag kanan.”

14 Ansinyan pagbarik nilan adto sang kadaigan na mga inindowan, kikita nilan na madaig yang mga otaw na yanaglibot kanilan. Aon oman mga magiindoway ng Hokoman na yapaglalis kanilan. 15 Pagkita ng mga otaw kang Isa, yamatingaa silan aw dyomaagan dayon silan adto kanan aw panagsalam. 16 Ansinyan yagaosip si Isa kanilan, “Ono yang pyagalalisan mayo?”

17 Aon isa sang mga otaw na yotobag, “Kay Goro, dyadaa ko ani kanmo yang anak ko na usug kay kyakasaytanan yan aw di da yan makapagtiyab. 18 Kada wakto na suudan yan ng saytan, amatowad yan sang lopa, magabowa yang baba nan, mangoyagut yang onto nan aw amatoskig yang lawas nan. Pyapangayo da ko sang mga inindowan mo na palogwaun nilan yang saytan, awgaid di silan makagaga.”

19 Yagalaong si Isa sang mga otaw, “Astaga! Kamo na mga otaw adon na panahon, waa say pagpangintoo mayo! Kadogay da ako ani kamayo! Wain pa kotob yang pagsabar ko kamayo? Daa adi kanak yang isu.” 20 Agaw dyadaa nilan adto kanan yang isu.

Pagkita ng saytan kang Isa, pyapakorog dayon nan yang isu. Yamatowad yan aw yagaligid-ligid sang lopa na yagabowa yang kanan baba. 21 Yagaosip si Isa sang ama ng isu, “Yadogay da ba yaning isu ng mayninyan?”

Tyomobag yang ama, “Ud, disti ng tagbi pa yan. 22 Pyagatimbag yan maag ng saytan adto sang atoon aw adto oman sang tobig antak yan matay. Awgaid kong aon amainang mo, mallat kaw kanami aw tabangi kami!”

23 Yagalaong kanan si Isa, “Nanga sa yagalaong kaw na kong aon amainang ko? Yang maskin ono amainang sidtong otaw na aon pagpangintoo.”

24 Yagalaong dayon yang ama ng isu, “Yamangintoo ako, awgaid kolang pa. Tabangi ako antak kadogangan pa yang pagpangintoo ko.”

25 Adon, pagkita ni Isa na madaig yang mga otaw na yagapasingadi kanan, syasagda nan yang saytan aw laong nan, “Ikaw na saytan na makaamang aw makabungul, panawi adon yani na isu aw ayaw da magbarik kanan.”

26 Ansinyan yamangiyak yang saytan, pyapakorog nan yang isu aw logwa. Paglogwa ng saytan, maynang patay da yang isu. Agaw yagalaong yang kadaigan, “Patay da yan.” 27 Awgaid kyukuputan ni Isa yang arima ng isu aw painduga nan. Ansinyan imindug da yang isu.

28 Na, pagsuud ni Isa sang baay, yagaosip kanan yang mga inindowan nan nang silan da gaid, laong nilan, “Nanga sa wa kami makapalogwa sidto na saytan?”

29 Tyomobag si Isa kanilan, “Yang mayninyan na klasi na saytan di mapalogwa yatabiya pinaagi sang pagdowaa.”

30 Ansinyan pyomanaw si Isa kipat sang mga inindowan nan sikun sidto na banwa aw yamagi silan sang probinsya ng Jalil. Dili karim ni Isa na akatigaman ng mga otaw daw wain yan 31 kay yagaindo yan sang mga inindowan nan. Yagalaong yan kanilan, “Ako na Anak ng Manosiya, mallug da ako adaun adto sang mga otaw na aon kapatot aw apatayun ako nilan. Awgaid sang ikatoong allaw sikun sang kanak pagkamatay amabowi oman ako.”

32 Awgaid wa silan makasabot sidto na pyaglaongan nan. Aw yamalluk silan magosip kanan.

33 Ansinyan dyomatung da silan sang longsod ng Kapirnaom. Nang iyan da silan sang baay, yagaosip si Isa sang mga inindowan nan, “Ono yang pyagalalisan mayo adto sang daan?” 34 Awgaid yagapakatingun gaid silan kay yanaglalis silan daw sino kanilan yang labaw.

35 Ansinyan imingkod si Isa, pyapadood nan yang sampoo aw dowa na sahabat nan aw yagalaong yan kanilan, “Sino-sino yang mallini mainang ng labaw sang kadaigan, dait yan magpababa sang ginawa nan aw mainang ng sogowanun sang kariko.” 36 Ansinyan kyakamang ni Isa yang sambok na isu aw painduga nan sang atobangan nilan. Sisipit nan yang isu aw yagalaong yan kanilan, 37 “Sino-sino yang magatarima sang mga isu na main sini sabap sang pagpangagad nan kanak, magatarima oman kanak. Aw sino-sino yang magatarima kanak, magatarima oman sang Tohan na yagasogo kanak.”

38 Ansinyan yagalaong si Yahiya kang Isa, “Kay Goro, aon kikita nami na otaw na yagapalogwa sang mga saytan na lyalambit nan yang ngaan mo. Syasagda nami yan kay di yan inagad natun.”

39 Awgaid yagalaong kanan si Isa, “Ayaw mayo yan pagsagdaa. Kay sino-sino yang makainang ng katingaan sang kanak ngaan, di yan dayon makapaglaong ng maat makapantag kanak. 40 Kay yang maskin sino na di mapaglaban kanatun, matabang kanatun. 41 Sang bunna-bunna pagalaong ko kamayo na sino-sino yang magpainum kamayo ng maskin tobig gaid sabap ng yamangagad kamo sang Almasi, sang way dowa-dowa abarasan yan ng Tohan.”

42 Yagalaong oman si Isa, “Sino-sino yang amainang ng pyagasabapan na amakadosa yang maskin sambok sining tagbi na mga isu na yamangintoo kanak, madyaw pa kanan yang talian yang liyug nan ng dakowa na bato aw itimbag yan adto sang laod. 43 Idto sagaw, kong yang arima mo yang pyagasabapan na amakadosa kaw, otoda yan. Madyaw pa na yamaotod yang sangkilid na arima mo, awgaid akaonan kaw ng kinabowi na way kataposan kaysang dowambok yang arima mo awgaid itimbag kaw adto sang narka, sang atoon na di amatay. 44-45 Magonawa sinyan, kong yang siki mo yang pyagasabapan na amakadosa kaw, otoda yan. Madyaw pa na yamaotod yang sangkilid na siki mo, awgaid akaonan kaw ng kinabowi na way kataposan kaysang dowambok yang siki mo awgaid itimbag kaw adto sang narka. 46-47 Aw kong yang mata mo yang pyagasabapan na amakadosa kaw, lusata yan. Madyaw pa na sambok gaid yang mata mo, awgaid amakasuud kaw sang sorga kaysang dowambok yang mata mo awgaid itimbag kaw adto sang narka. 48 Kay adto sang narka way kataposan ng kasiksaan kay yang mga ood na yanagkutkut sang lawas ng mga otaw di amatay aw di oman amatay yang atoon.”

49 Yagalaong oman si Isa, “Yang kariko ng mga otaw dait amagi ng kasikotan. Kay magonawa sang asin atawa atoon, yang kasikotan makakamang sang maskin ono na dili ng madyaw. 50 Kyakatigaman mayo na madyaw yang asin. Awgaid kong mawaa yang lasa ng asin, di da mapabarik yang kaasin nan. Agaw, magonawa sang asin na makatabang kanatun, kinaanglan na magtinabangay kamo aw madyaw yang relasyon mayo sang matag-isa.”