12
Yang Bobay aw yang Dragon
1 Adon, aon dakowa aw katingaan na tanda na yagapakita adto sang langit. Kikita ko yang sambok na bobay na yamandagom ng maynang suga. Yagaindug yan sang babaw ng bowan, aw sang kanan oo aon korona na ininang ng sampoo aw dowa na mga bitoon. 2 Masaid da yan manganak, agaw yamangiyak yan sang kasakit ng pagpamati nan.
3 Ansinyan aon kikita ko na tuna pa na tanda adto sang langit. Aon kikita ko na dakowanay na dragon na mapowa na pito yang oo nan aw sampoo yang sowag aw sang kada oo aon sambok na korona. 4 Kyakamang nan yang ikatoo na kabain ng mga bitoon adto sang langit pinaagi sang kanan ikog aw labakan adto daum sang lopa. Pagkatapos san imindug yan sang adapan ng bobay na madari da kaotawan kay yagatagad yan sang isu na amaotaw kay alamonon gao nan. 5 Ansinyan yamanganak yang bobay ng sambok na isu na usug. Awgaid wa akalamon ng dragon yang isu kay dyadaa dayon yan adto sa taas sang adapan ng ingkodanan ng Tohan. Yan na isu yang magadato sang kariko ng kabangsaan aw way sino-sino na makasopak kanan kay dakowa yang kapatot ng kanan pagdato. 6 Yang bobay na yamanganak lyomayas adto sang diserto sang logar na pyagakahanda dadaan kanan ng Tohan. Ansan atimanun yan ng Tohan sa suud ng 1,260 na mga allaw.
7 Adon, yamaon yang tyanam adto sang sorga. Yang labaw na malaikat na si Mikail aw yang mga kaupdanan nan na malaikat yapagtanam sang dragon. Aw yapaglaban oman kanilan yang dragon aw yang mga sakop nan. 8 Awgaid yamatalo yang dragon aw yang mga sakop nan aw pyapapanaw silan sikun sang sorga. 9 Na, lyalabak da adto sang donya yang dakowa na dragon na yan yang bila sidtong ona na panahon na pyagangaanan ni Iblis atawa Saytan.*12:9 Si Iblis yang yagapakita sang porma ng bila sidtong wakto na syasatsat nan si Sitti Awa adto sang tanumanan ng Idin. Tanawa sang Kitab Tawrat, Tagna Donya 3:1-5. Yan agaw yang yamangilad sang kariko ng mga otaw sang donya. Agaw, lyalabak da yan kipat sang kariko ng mga sakop nan.†12:9 Yang mga sakop ng Saytan yang tyatawag na mga saytan. Mga malaikat silan sangaon, awgaid yadapig silan kang Iblis aw yamagad silan kanan.
10 Adon, aon dyudungug ko na matanog na sowara adto sang sorga na yagalaong,
“Adon dyomatung da yang wakto na amatoman yang paglowas ng Tohan sang manosiya.
Pyapakita da ng Tohan yang kanan kabarakat aw yagasogod da yan magdato sang donya,
aw pyapakita oman yang kapatot ng Almasi na kanan pinili.‡12:10 Yang Almasi yang pipili ng Tohan antak maglowas aw magdato sang manosiya.
Kay si Iblisna yan yang yagaoman sang kanatun mga kalomonan adto sang Tohan allaw aw gabi,
pyapalogwa da sikun sang sorga.
11 Awgaid yang kanatun mga kalomonan,
yamatalo nilan si Iblis sabap sang dogo ng Karniro§12:11 Si Isa Almasi yang tyatawag na Karniro kay yamatay yan na magonawa ng korban antak makamang yang dosa ng manosiya. Yang kariko ng mga yamangintoo kang Isa, yampon da yang mga dosa nilan. Agaw, di da silan kaapiktowan ng pagoman ng Saytan. na yamatay para kanilan,
aw sabap sang pagsaksi nilan sang bunna na indowan na tyatarima nilan.
Aw wa silan akalluk na apatayun sabap sang pagpangintoo nilan.
12 Agaw, kamo na yanaguya sang sorga,
pangkasowat da kamo.
Awgaid maat yang adatungan mayo na yanaguya sang lopa aw dagat
kay yakawas da adto kamayo si Iblis.
Yamadamanay yan kay kyakatigaman nan na
tagbi da yang panahon na yamabilin kanan.”
13 Na adon, pagkatigam ng dragon na lyalabak da yan adto sang donya, lyomopog yan sang bobay na yamanganak sidtong isu na usug. 14 Awgaid yatagan yang bobay ng dowambok na panid na magonawa sang panid ng dakowa na agila antak makalayog yan adto sang diserto sang logar na tyatagana kanan ng Tohan. Kay ansan atimanun yan ng Tohan sa suud ng toongka toig aw tunga aw di yan kailabtan ng dragon na tyatawag oman ng bila. 15 Ansinyan yoboga yang bila ng madaig na tobig na maynang baa pasingadto sang bobay antak maanod yan. 16 Awgaid tyatabangan yang bobay ng lopa kay yamaboka yang lopa aw suyupa yang tobig na byoboga ng dragon. 17 Na, yamadamanay da yang dragon sang bobay aw pyomanaw yan antak mapagtanam sang kadaigan pa na mga topo ng bobay. Yan silan yang kariko ng mga otaw na yotoman sang kasogowan ng Tohan aw yagapadayon mangagad sang kabunnaan na pyagaindo ni Isa. 18 Pagkatapos san, yagaindug yang dragon adto sang baybay.
*12:9 12:9 Si Iblis yang yagapakita sang porma ng bila sidtong wakto na syasatsat nan si Sitti Awa adto sang tanumanan ng Idin. Tanawa sang Kitab Tawrat, Tagna Donya 3:1-5.
†12:9 12:9 Yang mga sakop ng Saytan yang tyatawag na mga saytan. Mga malaikat silan sangaon, awgaid yadapig silan kang Iblis aw yamagad silan kanan.
‡12:10 12:10 Yang Almasi yang pipili ng Tohan antak maglowas aw magdato sang manosiya.
§12:11 12:11 Si Isa Almasi yang tyatawag na Karniro kay yamatay yan na magonawa ng korban antak makamang yang dosa ng manosiya. Yang kariko ng mga yamangintoo kang Isa, yampon da yang mga dosa nilan. Agaw, di da silan kaapiktowan ng pagoman ng Saytan.