1 Na adon, makapantag sang mga osip na syorat mayo kanak, maynini yang ikapaglaong ko kamayo. Bunna yang pyagalaong mayo na madyaw kong yang sambok na otaw di amangasawa. 2 Awgaid untak kalikayan yang pagjina, madyaw pa kong yang usug amangasawa aw yang bobay oman magabana. 3 Aw kamo na aon day asawa atawa bana mayo, kinaanglan na apangagadan mayo yang kallini ng kaupud mayo. Dili ng madyaw na yang usug, di nan saidan yang asawa nan atawa yang bobay di magpasaid sang bana nan. 4 Kay yang bobay na aon day kanan bana di da makabuut sang sarili nan na badan, awgaid yang kanan bana. Mag-onawa sinyan, yang usug na aon day kanan asawa di da makabuut sang sarili nan na badan, awgaid yang kanan asawa. 5 Agaw, ayaw mayo pagsopaka yang kallini ng asawa atawa bana mayo yatabiya kong yagasabot kamo na di kamo magsaid kay untak magamit mayo yang panahon para sang pagdowaa. Awgaid pagkatapos san, magabarik da oman kamo sang kya-anadan mayo inangun. Madyaw yani untak di kamo madaa ng sasat ng Saytan kay basin di da kamo makapogong ng napso mayo. 6 Na, idto yang pyagalaong ko kamayo untak katigaman mayo daw ono yang mapakay mayo inangun, awgaid dili yan ng sogo ko. 7 Kay sang kabunnaan, karim ko gao na yang kariko mayo magsiling kanak na way asawa. Awgaid yamatigam ako na dili kita parias aw lain-lain yang yatag kanatun ng Tohan.

8 Adon, kamo na waa pay asawa atawa bana kipat oman yang mga biyoda, yani yang ipaglaong ko kamayo na madyaw kong di da gaid kamo magaminyo na mag-onawa kanak. 9 Awgaid kong di mayo kapogongan yang napso mayo, na, pagminyo da kamo. Madyaw pa yang amangasawa atawa magabana kaysang aka-irapan kamo ng pagpogong ng napso mayo.

10 Adon, kamo na aon day asawa atawa bana, aon sogo ko kamayo. Yani na sogo wa pagasikun kanak awgaid sang kanatun Tagallang na si Isa Almasi kay yagalaong yan na yang bobay di mapakay magbiya sang kanan bana.*7:10 Makapantag sang pyagasogo ni Isa Almasi tanawa sa Kitab Injil, Matiyo 5:32 aw Markos 10:2-12. 11 Awgaid kong aon bobay na magabiya sang kanan bana, di mapakay na magabana da oman yan ng tuna pa na usug. Awgaid mapakay yan magbarik sang kanan bana aw mag-inamponay da silan. Na, yang usug oman, di mapakay na buagan nan yang asawa nan.

12 Adon, aon oman ipaglaong ko sang kadaigan pa na mga magasawa. Aw yani na ipaglaong ko dili ng sogo ng Tagallang kondi yang kanak gaid dumduman. Kong aon usug na yagapangintoo sang Almasi na yang kanan asawa wa apangintoo, di nan dait buagan yang kanan asawa sarta karim pa nan magpabilin adto kanan. 13 Mag-onawa sinyan, kong aon bobay na yagapangintoo sang Almasi na yang kanan bana wa apangintoo, di nan dait buagan yang bana nan sarta karim pa nan magpabilin adto kanan. 14 Kay yang bobay di amabatar sabap sang kanan bana na wa apangintoo kondi yang bana ma-inang ng sotti sabap sang kanan asawa na yagapangintoo. Mag-onawa oman sinyan yang pagtanaw ng Tohan sang bana na yagapangintoo na yang kanan asawa wa apangintoo. Kay kong dili ng maynan, yang mga anak nilan amasiling da ng mga anak ng wa apangintoo. Awgaid sang kabunnaan, tyarima silan ng Tohan na sotti. 15 Awgaid kong yang asawa atawa bana na wa apangintoo sang Almasi karim magbiya ng bana atawa asawa nan na yagapangintoo, dait yan togotan. Sang mayninyan na kabutang mapakay na yang yagapangintoo magbuag ng asawa atawa bana nan kay pinili kita ng Tohan untak malinaw yang kanatun kinabowi. 16 Awgaid kong di silan magbuag, na, basin amadaa pa yang bana sang pagpangintoo sabap sang asawa nan atawa yang asawa amadaa pa sang pagpangintoo sabap sang bana nan untak malowas oman silan.

17 Adon, yang kada isa kamayo dait magpabilin sang kabutang na yatag kamayo ng Tagallang sang wakto na pinili kamo ng Tohan untak magpangagad sang Almasi. Maynan yang pyaga-indo ko sang kariko ng mga jamaa. 18 Sawpama, yang otaw na yamatoli da dadaan bago pa yan magpangagad sang Almasi, magapabilin da gaid yan sinyan na kabutang nan. Aw yang otaw na wa pa akatoli bago pa yan magpangagad sang Almasi, di kinaanglan na magapatoli pa. 19 Kay daw yamatoli atawa wa, dili yan ng barapantag adto sang Tohan. Awgaid yani yang barapantag na amangagad kita sang mga sogowan nan. 20 Agaw madyaw kong yang kada isa kanatun magpabilin sang kabutang na yatag kanatun sang wakto na pinili kita untak magpangagad sang Almasi. 21 Kong sawpama dadaan kaw na allang sang wakto na pinili kaw ng Tohan, ayaw da pagkarido ng kabutang mo. Awgaid kong aon logar na amakalogwa kaw sikun sang pagka-allang mo, madyaw oman. 22 Kay kong ikaw sambok na allang sang wakto na pinili kaw ni Tagallang Isa untak magpangagad kanan, di da kaw ng allang sa adapan nan. Mag-onawa sinyan, kong ikaw dili ng allang sang wakto na pinili kaw ng Almasi, ya-inang da kaw ng allang nan. 23 Dakowa yang bayad ng Tohan sang paglowas nan kamayo sikun sang kadosaan. Agaw, ayaw da kamo pagpa-allang oman sang mga otaw. 24 Idto sagaw, mga kalomonan ko, maskin ono yang kabutang ng kada isa kamayo sang wakto na pinili kamo ng Tohan untak ma-inang ng sakop ng Almasi, padayon kamo disidtong kabutang mayo aw pangagadi mayo yang Tohan.

25 Adon, makapantag sang mga otaw na way asawa atawa bana, way sogo ko kamayo sikun sang Tagallang. Awgaid ipaglaong ko kamayo yang kanak dumduman kay ako sambok na otaw na kasarigan sabap sang looy kanak ng Tagallang. 26 Agaw, bain kanak madyaw pa kong yang sambok na otaw di da gaid magminyo sabap sang bali na kasikotan adon na panahon. 27 Na, kong aon day asawa mo, ayaw da pagbuagi. Awgaid kong waa pay asawa mo, ayaw da gaid magpangasawa. 28 Awgaid sawpama amangasawa da kaw, di kaw makadosa. Mag-onawa sinyan, kong yang sambok na daaga magabana, di oman yan makadosa. Awgaid yagalaong ako na madyaw pa kong di da gaid kamo magminyo kay karim ko na makalikay kamo ng kasikotan na aka-agian ng mga otaw na yamaminyo.

29 Mga kalomonan ko, yang karim ko ipasabot na madari da domatung yang kataposan ng donya. Agaw sikun adon, kamo na mga minyo, atimana mayo yang kamayo gawbuk para sang Tagallang na maynang way asawa atawa bana mayo. 30 Mag-onawa sinyan, yang mga otaw na yagatiyao, di dait na abay silan magkarido. Aw yang mga yamasowat, di dait na yang kasowat gaid nilan yang abay nilan dumdumun. Aw yang mga otaw na yagabili ng mga butang, di dait dumdumun na magapabilin adto kanilan yang pyamili nilan. 31 Yang maskin ono na kadodonya na inang ng otaw di nan dait palabiun sang pangatayan nan. Kay madatung yang allaw na yang kariko na adi sining donya amawaa.†7:29-31 Yang karim ipasabot sini na mga ayatan na yang kaminyoon, yang karido atawa kasowat aw maskin pa yang kakawasaan di dait ma-inang ng babag sang paggawbuk para sang Tagallang.

32 Agaw, yang karim ko gao na makalikay kamo sang mga butang na makasasat sang kamayo dumduman. Yang otaw na way asawa, way lain na kyaridowan nan kondi yang paggawbuk para sang Tagallang aw karim nan na amasowat kanan yang Tagallang. 33 Awgaid yang otaw na aon kanan asawa, yang kyaridowan nan yang panginabowi adi sang donya kay karim nan na amasowat yang kanan asawa. 34 Agaw yamabain yang dumduman nan.

Mag-onawa oman sinyan yang kabutang ng mga bobay. Yang bobay na way bana, daw biyoda atawa daaga pa, way lain na kyaridowan nan kondi yang paggawbuk para sang Tagallang. Kay karim nan magpangagad sang Tagallang sikun sang tibok nan na pangatayan aw kusug. Awgaid yang bobay na aon kanan bana, yang kyaridowan nan yang mga butang adi sining donya kay karim nan na amasowat yang kanan bana. 35 Na, pyagalaong ta kamo sini untak kamo katabangan aw dili untak kamo pa-irapan. Karim ko na inangun mayo yang osto aw madyaw. Aw karim ko oman na way makababag sang pagpangagad mayo sang Tagallang.

36 Adon, makapantag sang usug na aon tawas nan, yani yang towada ko. Kong yagadumdum yang usug na dili ng osto kong di nan pangasawaun yang tawas nan labi da kong mataas da yang idad nan, aw kong di oman yan makapogong sang napso nan, madyaw pa kong magaminyo da silan. Dili yani ng dosa. 37 Awgaid kong aon usug na yagabuut ng ginawa nan na di da yan amangasawa sang tawas nan kay sang dumduman nan madyaw yani para kanan aw makapogong oman yan ng napso nan, na, mapakay na di silan magaminyo aw madyaw oman yang ininang nilan. 38 Agaw, yang amangasawa sang tawas nan, madyaw yang ininang nan. Awgaid yang di amangasawa, mas madyaw pa yang ininang nan.

39 Adon, yang bobay na minyo da, di mapakay na magabana da oman mintras bowi pa yang kanan bana. Awgaid kong yamatay da yang kanan bana, mapakay na magabana da oman yan sang abir sino na kyallinian nan. Awgaid kinaanglan na yan na usug yagapangagad oman kang Isa Almasi na kanatun Tagallang. 40 Awgaid sang kanak dumduman labi pa yang kasowat nan kong di da yan magabana oman. Na, yani tambag ko gaid, awgaid yagapangintoo ako na yang dumduman ko yagadan oman ng Nyawa ng Tohan.