1 Ansinyan pyomanaos silan ni Paulus adto sa Dirbi aw pagkatapos san adto silan sang syodad ng Listara. Ansidto aon sambok na otaw na yagapangintoo kang Isa na pyagangaanan kang Timotiyo. Yang kanan ina bangsa Yahodi na yagapangintoo oman kang Isa, awgaid yang ama nan bangsa Grik. 2 Na, yang kariko ng mga kalomonan sang jamaa adto sa Listara aw Ikoniyom, madyaw yang pyaglaongan nilan makapantag kang Timotiyo. 3 Ansinyan karim ni Paulus pa-agadun si Timotiyo. Awgaid bago silan pomanaw, tyoli nan si Timotiyo kay untak addatan yan ng mga Yahodi. Kay yang kariko ng mga Yahodi sidto na mga banwa, kyatigaman nilan na yang ama ni Timotiyo dili ng Yahodi. 4 Na, pagkadto nilan sang yagakatuna-tuna na mga banwa, pyatigam nilan sang mga yagapangintoo kang Isa yang mga sogowan na pyagaka-oyonan ng mga sahabat aw yang mga pangoo ng jamaa adto sa Awrosalam. Aw pyagalaong oman nan silan na dait nilan pangagadan yan na mga sogowan. 5 Idto sagaw, yagakabagsug yang pagpangintoo ng mga kalomonan sang kariko ng mga jamaa, aw allaw-allaw kyadogangan pa yang kadaig nilan.

6 Ansinyan yamagi si Paulus aw yang mga kaupudanan nan sang mga banwa na sakop ng Pirigiya aw Galatiya kay wa silan atogoti ng Nyawa ng Tohan na mag-osiyat ng pyaglaongan ng Tohan adto sang probinsya ng Asiya. 7 Pagdatung nilan sang kilid ng kasakopan ng Misiya, makadto gao silan sang probinsya ng Bitiniya, awgaid wa silan atogoti ng Nyawa ni Isa na komadto. 8 Agaw yamagi da gaid silan sa Misiya aw kyomadto silan sang syodad ng Trowas. 9 Sidto na gabi, aon pyakita ng Tohan kang Paulus. Sang pagpananaw nan kinita nan na aon otaw na taga Makidoniya na yaga-indug aw yaga-angyo kanan, laong nan, “Pagtaripag adi sang banwa ng Makidoniya aw tabangi kami.” 10 Na, pagkatapos sinyan yangandam dayon kami*16:10 Si Lukas yang yagasorat sini na gogodanun. Gyamit nan yang pyaglaongan na kami kong sambok yan na kaupudanan ni Paulus sang panaw nan. komadto sang Makidoniya kay kyatigaman da nami na kahanda ng Tohan na adto da kami mag-osiyat ng Madyaw na Gogodanun.

11 Na, syomakay da kami sang bangka, aw sikun sa Trowas lyomayag kami adto sang poo ng Samotraki. Pagka-ilaw sinyan pyomanaos kami adto sang banwa ng Niyapolis. 12 Ansidto kyomawas kami sang bangka aw panaw kami paduug sa Pilipi na dakowa na syodad sang ona na distreto ng Makidoniya. Yang kadaigan ng mga otaw adto aw maskin pa yang mga pangoo sang banwa, mga taga Roma. Na, adto da kami paga-uya sa suud ng pilang allaw.

13 Sang Allaw ng Pagpatana lyomogwa kami sikun sang syodad aw kyomadto sang kilid ng tobig kay yagadumdum kami na magakatipon yang mga Yahodi untak magdowaa. Pagdatung nami adto, aon mga kaobayan na yanagkatipon ansan. Agaw yamingkod kami aw yapagbaaw kanilan. 14 Yang isa nidtong mga bobay na yamaningug kanami si Lidiya na taga Tatira. Negosyante yan ng madyaw na tela na mapowa. Aw maskin dili yan ng Yahodi yagasambayang yan sang Tohan. Adon sarta yamaningug si Lidiya sang pyaga-indo ni Paulus makapantag kang Isa, tyabangan yan ng Tohan pagsabot aw yagapangintoo da yan kang Isa Almasi. 15 Ansinyan syogbowan si Lidiya aw yang kariko ng mga otaw sang kanan baay. Pagkatapos, yaga-angyo si Lidiya kanami, laong nan, “Kong sang dumduman mayo bunna ako na yagapangintoo kang Tagallang Isa, adto da kamo pag-uya sang kanak baay.” Yabay pa yan mag-angyo kanami, agaw yasogot da gaid kami.

16 Na, sangallaw sinyan pagkadto nami sidtong logar na pagtitiponan ng mga Yahodi untak magdowaa, syongon kami ng sambok na allang na bobay. Yamatigam yan maggogod ng bagi ng mga otaw sabap ng kyasaytanan yan. Aw yang mga amo nan yakasapi ng madaig sabap kanan. 17 Na, yan na bobay yagasonod-sonod kanami ni Paulus aw yagapiyagit yan aw laong nan, “Yani na mga otaw, mga sogowanun silan ng Tohan na Labi na Makagwas! Yagapatigam silan kamayo daw monono kamo amalowas.” 18 Na, allaw-allaw maynan yang ininang nidtong bobay sampay na yamasoya da si Paulus. Agaw yapag-atobang yan sang bobay aw yagalaong yan sang saytan, “Sang ngaan ni Isa Almasi, logwa da!” Aw sinyan dayon lyomogwa yang saytan sikun sang bobay.

19 Na, pagkatigam ng mga amo ng bobay na di da silan makasapi sabap kanan, dyakup nilan si Paulus aw si Silas aw goyoda nilan adto sang plaza untak pa-atobangun nilan sang mga pangoo sang banwa. 20 Pagdatung nilan adto, yagalaong silan sang mga opisyales na taga Roma, “Yani na mga otaw Yahodi aw yagadaa silan ng kasamok adi sang kanatun syodad. 21 Yaga-indo silan ng kabatasanan na sopak sang kanatun kasogowan aw di natun mapakay pangagadan kay kita mga sakop ng Roma.”

22 Na, yang kariko ng kaotawan na yanagkatipon ansan yasopak oman kang Paulus aw si Silas. Ansinyan pyalasian ng mga opisyales silan ni Paulus ng dagom aw pyabadasan silan. 23 Pagkatapos silan badasan, pyapiriso silan aw sogowa yang gowardya na bantayan silan ng madyaw. 24 Agaw, sobay sidtong sogo lyasak ng gowardya si Paulus aw si Silas adto sa suud ng pirisowan aw gyapos nan yang mga siki nilan.

25 Na, sang tungang gabi sinyan yagadowaa si Paulus aw si Silas aw yagakanta silan ng pagpoji sang Tohan. Aw yamaningug kanilan yang kadaigan pa na mga piniriso. 26 Ansinyan yatokaw liminog ng makusug aw yamagayung maskin yang pondasyon ng pirisowan. Sinyan dayon yamangka-abri yang kariko ng mga powertaan aw yamangkatangtang yang mga kadina na pyagagapos sang mga piniriso. 27 Na, pagmata ng gowardya, kinita nan na yamabri yang mga powertaan. Agaw gyabot nan yang kanan ispada untak magtoyo kay pagtoo nan na yakalayas da yang mga piniriso. 28 Awgaid yagapiyagit si Paulus aw laong, “Ayaw pagtoyo! Ini pa kami!”

29 Na, yagapakamang da yang gowardya ng ilawan aw yadaagan adto sa suud aw yalood sa atobangan ni Paulus aw si Silas na tyakigan. 30 Ansinyan dyaa nan silan adto sa logwa aw laong nan, “Ono yang dait ko inangun untak malowas ako?”

31 Tyomobag silan Paulus, “Pagpangintoo kang Tagallang Isa aw amalowas kaw kipat yang kammo pamilya.” 32 Ansinyan yaga-osiyat silan ng pyaglaongan ng Tohan adto sang gowardya kipat yang kariko ng mga otaw na sakop sang kanan baay. 33 Na, sidto na wakto maskin maum da yang gabi, yogasan ng gowardya yang mga pari nilan ni Paulus. Pagkatapos, yagapasogbo dayon yan kipat yang kariko ng mga otaw na sakop sang kanan baay. 34 Ansinyan pyapanaos nan si Paulus aw si Silas adto sang kanan baay aw pyakan nan silan. Aw dakowa yang kasowat ng gowardya kipat yang kariko ng mga otaw na sakop sang kanan baay kay yagapangintoo da silan sang Tohan.

35 Pagka-ilaw sinyan, syogo ng mga opisyales na taga Roma yang mga polis adto sang pirisowan untak paglaongon nilan yang gowardya na paboyan da silan ni Paulus.

36 Agaw yagalaong yang gowardya kang Paulus, “Yang mga opisyales na taga Roma yagasogo na aboyan da kamo ni Silas. Na, logwa da kamo aw pagdadayaw kamo sang panaw mayo.”

37 Awgaid yagalaong si Paulus adto sidtong mga polis, “Astaga! Pyabadasan kami sa atobangan ng mga otaw na way pag-imbistigar kanami maskin kami mga sakop ng Roma!†16:37 Maskin bangsa Yahodi si Paulus aon oman kapatot nan mag-onawa ng mga bangsa Roma kay sakop yan ng Roma. Pyapiriso pa kami, aw adon aboyan da kami ng tago? Di yan mapakay! Yang mga opisyales mayo na taga Roma, silan mismo yang dait komani aw magpalogwa kanami.”

38 Ansinyan sagaw byomarik yang mga polis adto sang mga opisyales aw paglaonga silan ng pyagalaong ni Paulus. Na, pagdungug nilan na sakop ng Roma si Paulus aw si Silas, yangkalluk silan. 39 Agaw kyomadto da silan sang pirisowan aw yagapangayo ng ampon kanilan ni Paulus. Ansinyan byoyan nilan si Paulus aw si Silas aw yangyo silan na apanawan da nilan yang kanilan syodad. 40 Na, paglogwa da nilan Paulus sikun sang pirisowan, kyomadto silan sang baay ni Lidiya. Adto da silan managkita sang mga yagapangintoo aw pyabagsug nilan yang kanilan pangatayan. Pagkatapos pyomanaw da silan.