19
Si Paulus adto sa Ipisos
Sarta adto pa si Apolos sa Korinto, yamagi si Paulus sang kabutayan sa Galatiya aw Pirigiya sampay na dyomatung yan sa Ipisos. Ansidto aon yakita nan na mga yagapangintoo kang Isa aw yosip nan silan, laong nan, “Sang wakto na yagapangintoo kamo, yadawat ba mayo yang Nyawa ng Tohan?”
Tyomobag silan kang Paulus, “Waa. Wa gani kami akatigam na aon Nyawa ng Tohan.”
Yaga-osip oman si Paulus, “Ono yang indowan na pyangagadan mayo sidtong wakto na yagapasogbo kamo?”
Tyomobag silan, “Yang pyaga-indo ni Yahiya na Magsosogboway.”
Yagalaong si Paulus, “Yang pagsogbo na pyaga-indo ni Yahiya makapantag sang pagtawbat ng mga dosa. Awgaid yagalaong oman yan sang mga otaw na dait silan mangintoo sang masonod kanan domatung na yan agaw si Isa.”
Na, pagdungug nilan sang pyaglaongan ni Paulus, yagapasogbo silan sang ngaan ni Isa silbi tanda na yagapangintoo da silan kang Tagallang Isa. Ansinyan pagdapun kanilan ni Paulus ng arima nan, yakunsad kanilan yang Nyawa ng Tohan aw yakapaglaong da silan ng yagakatuna-tuna na pyaglaongan na wa nilan akatigami aw pyapayapat da nilan yang pyatigam kanilan ng Tohan. Na, yang kariko nilan mga sampoo aw dowa na kausugan.
Na, matag Allaw ng Pagpatana kyomadto si Paulus sang pagsasambayangan ng mga Yahodi aw yapagbaaw sang mga otaw. Sa suud ng toombowan pyatigam nan kanilan ng way alluk yang makapantag sang pagdato kanilan ng Tohan aw yapaglalis yan kanilan kay untak mangintoo silan. Awgaid yang kadaigan kanilan, matigas yang oo nilan aw di silan amangintoo. Sa atobangan ng mga otaw maat yang pyaglaongan nilan makapantag sang pagpangintoo kang Isa Almasi. Agaw pyanawan da silan ni Paulus. Pyaga-agad nan yang mga yagapangintoo kang Isa, aw matag allaw adto da yan sang iskowelaan ni Tiranos na yaga-indo aw yapagbaaw sang mga otaw. 10 Na, maynan yang ininang ni Paulus sa suud ng dowangka toig. Agaw, yang kariko ng yaga-uya sang probinsya ng Asiya, mga Yahodi aw dili ng Yahodi, yakadungug sang pyaglaongan ng Tohan.
Yang pitongka Otaw na mga Anak ni Iskib
11 Madaig yang mga katingaan na ininang ni Paulus sabap sang kabarakat ng Tohan. 12 Kay maskin yang panyo atawa towalya na tyakmagan ni Paulus, kong dyaa inyan adto sang mga masakitun, yamadyaw silan aw yang mga kyasaytanan pyanawan ng saytan.
13 Na, aon mga Yahodi na yakarimpud pomanaw sang banwa kay untak magpalogwa silan ng mga saytan. Itistingan nilan pagsampit ng ngaan ni Isa sang pagpalogwa ng saytan aw laong nilan, “Sang ngaan ni Isa na pyapayapat ni Paulus, panaw da, kay saytan!” 14 Adon, mag-onawa sinyan yang ininang ng pitongka usug na mga anak ni Iskib na sambok na pangoo ng mga imam ng mga Yahodi. 15 Awgaid yagalaong yang saytan kanilan, “Ikilaa ko si Isa, aw yamatigam ako daw sino si Paulus. Awgaid kamo, sino kadi kamo?” 16 Ansinyan lyoksowan silan nidtong otaw na kyasaytanan aw syakitan nan silan, aw wa silan pakadaog kanan. Agaw dyomaagan silan sikun sang baay na kyaparian aw waa day dagom.
17 Na, yang kariko ng mga otaw sa Ipisos, mga Yahodi aw dili ng Yahodi, yakadungug ng makapantag sinyan. Yangkalluk da yang kariko nilan aw byantog nilan yang ngaan ni Tagallang Isa. 18 Madaig oman yang yagapangintoo kang Isa aw yagalaong sa atobangan ng kadaigan makapantag sang maat na ininang nilan. 19 Yang mga otaw na dadaan mananambalay, dyaa nilan yang kanilan mga libro na syoratan ng ilmo aw syonog nilan sa atobangan ng mga otaw. Na, pagbilang nilan, yagakantidad ng minilyon yang kariko ng mga libro na syonog nilan. 20 Na, sang mayninyan na pama-agi yapayapat yang pyaglaongan ng Tohan adto sang kadaigan na mga banwa aw sabap sang kabarakat nan yagakadaig yang mga yagapangintoo kang Isa.
Yang Kasamok adto sa Ipisos
21 Na, pagkatapos sinyan yagahokom si Paulus komadto sa Awrosalam awgaid amapit kono yan ona sa Makidoniya aw Akaya. Aw laong pa nan, “Pagkatapos ko komadto sa Awrosalam dait na makadto oman ako sa Roma.” 22 Ansinyan pya-ona nan adto sa Makidoniya si Timotiyo aw si Irastos na dowa sang mga katabang nan sarta yagapabilin pa yan adto sang probinsya ng Asiya na ansan yasakop yang Ipisos.
23 Na, sidto na wakto aon dakowa na kasamok sang Ipisos sabap sang pag-indo makapantag kang Isa Almasi. Yang pagsogod sidto na kasamok maynini. 24 Aon otaw na panday ng pilak na pyagangaanan kang Dimitri. Yaga-inang yan ng mangkatagbi na mga baay-baay sikun sang pilak na yang porma nan mag-onawa ng pagsasambayangan na para sang tagallang nilan na bobay na pyagangaanan kang Artimis.* 19:24 Yang pangaan ni Artimis kong sang pyaglaongan ng mga taga Roma, Dayana. Dakowa yang kita ni Dimitri aw yang mga trabante nan sabap sini na panginabowian nilan. 25 Ansinyan tinipon ni Dimitri yang mga trabante nan kipat yang kadaigan pa na mga panday na mag-onawa yang gawbuk nilan aw yagalaong yan kanilan, “Mga kaupudanan ko, kyatigaman natun na madyaw yang kita ta sabap sini na kanatun gawbuk. 26 Awgaid adon, sa way dowa-dowa kinita aw dyungug da mayo yang ininang nidtong otaw na si Paulus. Pyagalaong nan yang mga otaw na dili kono bunna na Tohan yang mga barhala na ininang ng otaw. Aw madaig yang yagapangintoo sang pyaga-indo nan, dili gaid adi sini na syodad ng Ipisos awgaid maskin pa sang kariko ng probinsya ng Asiya. 27 Agaw, maat yang akatamanan ta kay basin magalaong da yang mga otaw na dili ng madyaw yang kanatun gawbuk. Aw dili gaid inyan, awgaid basin akawaan pa ng siyat yang pagsasambayangan ng kanatun bantoganun na tagallang na si Artimis. Aw ansinyan amawaa yang dungug ni Artimis na pyagasambayangan ng kariko ng mga otaw adi sa Asiya aw sang tibok donya.”
28 Na, pagdungug nilan sinyan, bali na kadaman nilan aw yagapiyagit silan aw laong nilan, “Bantoganun si Artimis, tagallang ng mga taga Ipisos!” 29 Agaw, sang wa akadogay yagakasamok da yang kariko ng mga otaw sinyan na syodad. Dyakup nilan yang mga kaupudanan ni Paulus sang panaw nan na si Gayos aw si Aristarkos na mga taga Makidoniya. Aw yanagdungan silan domaagan adto sang pagtitiponan ng mga otaw na gyoyod nilan idtong dowangka otaw. 30 Adon, si Paulus, karim gao nan komadto aw mapag-atobang sang mga otaw, awgaid wa yan atogoti ng mga yagapangintoo. 31 Aw aon oman mga opisyales sang probinsya na mga amigo ni Paulus na yagatogon kanan na di gao yan makadto sang pyagakatiponan ng mga otaw.
32 Na, labi da yang kasamok adto sang pyagakatiponan. Lain-lain yang pyagapiyagit ng mga otaw kay yang kadaigan kanilan wa akatigam daw nanga yanagkatipon aw yagakasamok silan. 33 Ansinyan tyolak ng mga Yahodi si Iskandar sang onaan kay untak magbaaw sang mga otaw. Pag-indug nan adto sa atobangan, siningyasan nan yang mga otaw na magpakatingun untak makapaglaong yan kanilan na dili ng mga Yahodi yang pyagasabapan ng kasamok. 34 Awgaid pagkatigam nilan na Yahodi yan, yagadungan silan magpiyagit aw laong nilan, “Bantoganun si Artimis, tagallang ng mga taga Ipisos!” Maynini yang pagpiyagit nilan sa suud ng dowangka oras.
35 Na, sang orian pyakatingun ng opisyal ng syodad yang mga otaw. Yagalaong yan kanilan, “Mga kaupudanan ko na taga Ipisos, yang kariko ng mga otaw yamatigam na kita na taga Ipisos yang yaga-atiman ng pagsasambayangan ng bantoganun na tagallang na bobay na si Artimis kipat yang bato na mag-onawa ng larawan nan na yamallog sikun sang langit. 36 Way makapaglaong na dili yan ng bunna, agaw pakatingun da kamo aw ayaw da kamo pagdari-dari pagkasamok. 37 Kay yang mga otaw na dyaa mayo adi, wa silan apangawat ng mga butang sikun sang kanatun pagsasambayangan aw wa silan paga-insolto sang kanatun tagallang na bobay. 38 Adon, kong si Dimitri aw yang mga kaupudanan nan na mga panday aon pagasombong sang maskin sino, na, aon kanatun hokomanan aw maghohokom. Adto da kanan silan magsombong. 39 Kong aon pay kadaigan na mga riklamo mayo, yang idto dait osayun sang kya-anadan ta na pagtipon ng mga imamanwa. 40 Awgaid adon, delikado kita sabap sini na ininang ta. Kay kong aon magasombong kanatun adto sang mga pangoo sa Roma na yaga-inang kita ng kasamok na sopak sang kasogowan nilan, di kita makatobag san aw way ika-atag natun na katarongan sini na ininang ta.” 41 Na, pagkatapos nan maglaong sinyan, pya-ori nan yang mga otaw.

*19:24 19:24 Yang pangaan ni Artimis kong sang pyaglaongan ng mga taga Roma, Dayana.