1 Awgaid si Isa yakadto sang Butay ng Jayton.

2 Pagka-ilaw ng masuum pa byomarik si Isa adto sang Baay ng Tohan. Yang kariko ng mga otaw ansan yanagtipon adto kanan. Agaw yamingkod yan aw yaga-indo kanilan. 3 Ansinyan dyomatung yang mga magiindoway ng Hokoman aw yang mga Parisi na aon daa nilan na bobay na dyatungan na yagajina. Pya-atobang nilan yan sang mga otaw 4 aw yagalaong silan kang Isa, “Magiindoway, yani na bobay dyatungan na yagajina. 5 Sobay sang Hokoman na yatag kanatun ni Nabi Mosa, yang mayninyan na bobay dait bonoon ng bato sampay na akamatay da nan. Na ikaw, ono yang ikapaglaong mo?” 6 Maynan yang osip nilan kay karim nilan porbaan si Isa paglaongon untak aon ikasombong nilan kanan. Awgaid yang ininang ni Isa, yadoko yan aw yagasorat sang lopa pina-agi sang kanan tollo.

7 Adon kay yabay pa silan mag-osip kanan, yamindug si Isa aw yagalaong kanilan, “Sino kamayo yang way dosa, yan yang ama-ona magbono ng bato kanan.” 8 Ansinyan yadoko da oman si Isa aw yagasorat sang lopa. 9 Na, pagdungug nilan sinyan, isa-isa silan pomanaw na yama-ona yang mga mangkatikadung sampay na si Isa dakoman yang yamabilin aw yang bobay na yaga-indug pa ansan. 10 Ansinyan yamindug si Isa aw yaga-osip kanan, “Kay Bi, wain da silan? Way yamabilin untak maghokom kammo?”

11 “Waa, kay Sir,” tyomobag yang bobay.

Ansinyan yagalaong si Isa kanan, “Kong maynan, di oman ako magahokom kammo na apatayun kaw. Panaw da, awgaid ayaw da pagpakadosa.”

12 Ansinyan yaga-indo da oman si Isa sang mga otaw aw yagalaong yan, “Ako yang allag na yaga-atag ng kapawa sang dumduman ng manosiya. Sino-sino yang amangagad kanak di da magapanaw sang kadugguman kay iyan kanan yang allag na maka-atag ng kinabowi.”

13 Pagdungug sinyan ng mga Parisi, yagalaong silan, “Di amadawat yang pyagalaong mo kay yagasaksi kaw makapantag sang ginawa mo.”

14 Tyomobag si Isa aw laong nan, “Maskin yagasaksi ako makapantag sang ginawa ko, bunna yang pyagalaong ko kay yamatigam ako daw wain ako pagasikun aw wain ako makadto. Awgaid kamo, wa kamo akatigam daw wain ako pagasikun aw wain ako makadto. 15 Yang kamayo paghokom dili kasarigan kay yang syonod mayo yang dumduman ng otaw. Awgaid ako, di ako magahokom sang abir sino. 16 Awgaid kong magahokom ako, bunna yang paghokom ko kay dili ako gaid yang magahokom kondi ako aw yang Ama na yagasogo kanak. 17 Yakasorat sang kamayo Hokoman na bunna yang pagsaksi ng dowangka otaw aw mag-onawa yang pyagalaong nilan. 18 Na adon, dait dawatun yang pyagalaong ko kay dowa kami na yagasaksi makapantag kanak, ako aw yang Ama na yagasogo kanak.”

19 Yaga-osip yang mga Parisi, “Wain kadi yang kammo ama?”

Tyomobag si Isa, “Wa kamo akilaa kanak aw wa oman kamo akilaa sang kanak Ama. Kay kong kinilaa mayo ako, kinilaa oman mayo yang kanak Ama.”

20 Yan yang pyagalaong ni Isa sarta yaga-indo yan adto sang Baay ng Tohan masaid sang butanganan ng mga sidoka. Awgaid way yagadakup kanan kay wa pa adatung yang wakto na pyagakahanda kanan.

21 Ansinyan yagalaong oman si Isa kanilan, “Di amadogay mapanaw da ako aw anapun mayo ako. Awgaid amatay da gaid kamo nang wa pa kamo ampona ng mga dosa mayo. Aw di kamo makakadto sang akadtonan ko.”

22 Sabap sinyan yanag-inosipay yang mga pangoo ng mga Yahodi, laong nilan, “Nanga yagalaong yan na di kita makakadto sang akadtonan nan? Karim nan ipasabot na magapakamatay yan?”

23 Yagalaong si Isa, “Kamo taga donya, awgaid ako, sikun ako sang sorga. Sakop kamo sining donya, awgaid ako dili. 24 Sabap sinyan pyagalaong da ta kamo na amatay kamo ng way kaamponan ng mga dosa mayo. Amaitabo sagaw yan kong di kamo mangintoo sang pyagalaong ko daw sino ako.”*8:24 Yang pyaglaongan na gyamit ni Isa sang ako mag-onawa ng ngaan na gyamit ng Tohan makapantag sang ginawa nan. Tanawa sa Kitab Tawrat, Tagna Donya 3:14. Sabap sinyan pyatigam ni Isa na yan agaw bunna na Tohan. Mag-onawa oman sinyan yang mana ng ako sang mga ayatan 28 aw 58 kipat yang sura 13:19.

25 “Sino kaw kadi?” yaga-osip silan.

Tyomobag si Isa, “Pyagalaong da ta kamo sikun pa sang ona daw sino ako. 26 Madaig yang ikapaglaong ko makapantag kamayo na ikahokom kamayo. Awgaid idto gaid yang pyagalaong ko sang mga otaw adi sang donya daw ono yang dyungug ko adto sang yagasogo kanak. Aw yang kariko ng pyagalaong nan bunna.”

27 Na, wa silan pakasabot na pyagalaong nan silan makapantag sang Tohan na Ama. 28 Agaw yagalaong si Isa kanilan, “Pagdatung ng wakto na pyataas da mayo ako na Anak ng Manosiya adto sa kros, akatigaman da mayo na ako sagaw daw sino yang pyagalaong ko. Akatigaman oman mayo na way ininang ko sikun gaid sang dumduman ko. Awgaid yani gaid yang pyagalaong ko daw ono yang pyagalaong kanak ng Ama. 29 Yang yagasogo kanak yabay idi kanak. Wa nan ako apabayai kay maskin ono yang akasowat nan, idto yang ininang ko.”

30 Na, pagdungug ng mga otaw sinyan na pyaglaongan ni Isa, madaig yang yagapangintoo kanan.

31 Ansinyan yagalaong si Isa sidtong mga Yahodi na yagapangintoo kanan, “Kong abay mayo pangagadan yang pyaga-indo ko, bunna kamo na mga inindowan ko. 32 Akatigaman da mayo yang kabunnaan, aw idto sagaw, yang kabunnaan maka-atag kamayo ng kagawasan.”

33 Yagalaong silan, “Oy, kami mga topo ni Nabi Ibrahim. Sikun pa singaon, dili kami ng allang ng abir sino. Nanga yagalaong kaw na atagan kami ng kagawasan?”

34 Tyomobag si Isa, “Sa bunna-bunna na ipaglaong ko kamayo na sino-sino yang abay magpakadosa, allang yan ng kadosaan. 35 Adon, yang allang dili sakop sang baay taman sa taman, awgaid yang anak. 36 Agaw, kong yang Anak ng Tohan yang maga-atag kamayo ng kagawasan, bunna na makagawas da kamo sang pagka-allang mayo. 37 Yamatigam ako na mga topo kamo ni Nabi Ibrahim. Awgaid maskin maynan, karim mayo ako patayun kay di mayo adawatun yang indowan ko. 38 Pyagalaong ko kamayo daw ono yang kinita ko adto sang kanak Ama. Kamo oman, ininang mayo daw ono yang dyungug mayo adto sang kamayo ama.”

39 Yagalaong silan, “Si Nabi Ibrahim yang kanami ama.”

“Kong bunna na mga topo kamo ni Nabi Ibrahim,” yagalaong si Isa, “inangun gao mayo yang mag-onawa ng ininang nan. 40 Awgaid kamo, yagadumdum sagaw kamo magpatay kanak maskin yabay ako maglaong kamayo ng kabunnaan na dyungug ko adto sang Tohan. Dili ng maynan yang ininang ni Nabi Ibrahim. 41 Yang ininang mayo mag-onawa sagaw sang ininang ng kamayo ama.”

Yagalaong silan, “Dili kami mga anak sa labas. Yang Tohan gaid yang kanami ama!”

42 Yagalaong si Isa kanilan, “Kong bunna sagaw na yang Tohan yang kamayo ama, pyakadakowa gao mayo ako sang pangatayan mayo kay yakani ako kamayo sikun sang Tohan. Wa ako akani sabap sang karim ko, awgaid yang Tohan yang yagasogo kanak. 43 Di kamo makasabot sang pyagalaong ko sabap ng dili kamo makadawat sang indowan ko. 44 Si Iblis yang kamayo ama, aw kallini mayo inangun daw ono yang kyallinian nan. Sikun pa singaong ona mammatay da yan. Kalaban yan ng kabunnaan kay way kinita na kabunnaan adto kanan. Kong mamakak yan, batasan gaid nan idto kay bakakun yan aw yan yang pyagasikunan ng kariko ng bakak. 45 Awgaid ako, aag bunna yang pyaglaongan ko, agaw di kamo amangintoo kanak. 46 Sino kamayo yang makapaglaong na yakadosa ako? Waa! Na, kong kabunnaan yang pyagalaong ko kamayo, nanga di kamo mangintoo kanak? 47 Sino-sino na sakop ng Tohan amaningug sang pyaglaongan nan. Awgaid kamo, di kamo amaningug sang pyaglaongan nan kay dili kamo sakop ng Tohan.”

48 Ansinyan yagalaong kanan yang mga pangoo ng mga Yahodi, “Bunna sagaw yang pyagalaong nami na ikaw taga Samariya aw kyasaytanan kaw.”

49 “Wa ako akasaytani,” yagalaong si Isa. “Yaddatan ko yang kanak Ama, awgaid way addat mayo kanak. 50 Di ako maga-anap na abantogon ako. Awgaid yang kanak Ama maga-atag kanak ng kabantog, aw yan yang maghohokom. 51 Sa bunna-bunna na ipaglaong ko kamayo na sino-sino yang amangagad sang indowan ko, di yan amatay taman sa taman.”

52 Yagalaong kanan yang mga pangoo ng mga Yahodi, “Na, sa way dowa-dowa yamatigam da kami na kyasaytanan kaw! Maskin si Nabi Ibrahim yamatay kipat yang kadaigan pa na mga nabi. Awgaid ikaw yagalaong na sino-sino yang amangagad sang indowan mo, di amatay taman sa taman. 53 Nanga, labaw pa kaw sang kanatun ompo na si Nabi Ibrahim? Si Nabi Ibrahim patay da aw maynan oman yang kadaigan pa na mga nabi. Sino kaw kadi sang dumduman mo?”

54 Tyomobag si Isa, “Kong abantogon ko yang ginawa ko, way siyat ng kabantog ko. Awgaid yang yagabantog kanak yang kanak Ama na pyagalaong mayo na Tohan mayo. 55 Wa kamo akilaa kanan, awgaid ako, kinilaa ko yan. Kong magalaong ako na wa ko yan akilaa, amabaoy ako ng bakakun mag-onawa kamayo. Awgaid bunna na kinilaa ko yan aw tyoman ko yang pyaglaongan nan. 56 Yamasowat si Nabi Ibrahim na ompo mayo pagkatigam nan na madatung yang allaw na makadi ako sang donya. Pagkita nan sini, yamasowat yan.”

57 Ansinyan yagalaong kanan yang mga pangoo ng mga Yahodi, “Waa pay 50 yang idad mo aw kinita mo si Nabi Ibrahim?”

58 Tyomobag si Isa, “Sa bunna-bunna na ipaglaong ko kamayo, sang wa pa akaotaw si Nabi Ibrahim, iyan da ako.” 59 Pagdungug nilan sinyan, yanagpamoti silan ng bato kay untak bonoon nilan si Isa. Awgaid yawaa si Isa sang kadaig ng mga otaw aw lyomogwa sikun sang Baay ng Tohan.