1 Ansinyan yagalaong si Isa, “Sa bunna-bunna na ipaglaong ko kamayo na yang otaw na di amagi sang powertaan sang pagsuud sang kolongan ng mga karniro awgaid mapanik sang koral, kawatan atawa tolisan. 2 Awgaid yang otaw na masuud sang powertaan, yan yang magbabantayay ng mga karniro. 3 Pasuudun yan ng yagabantay sang powertaan. Aw pagsuud nan, atawagun nan yang kanan mga karniro sang ngaan nilan aw kinilaa nilan yang tingug nan. Ansinyan adaun nan silan adto sa logwa. 4 Paglogwa da ng kariko nilan, ama-ona yan kanilan aw yang mga karniro masonod kanan kay kinilaa nilan yang tingug nan. 5 Di masonod yang mga karniro sang otaw na wa nilan akilaa, awgaid magapakawat silan kanan kay wa silan akilaa sang tingug nan.”

6 Na, yani yang pasombingay na pyagalaong kanilan ni Isa, awgaid wa silan pakasabot sang mana ninyan.

7 Agaw yagalaong oman si Isa, “Sa bunna-bunna na ipaglaong ko kamayo na ako yang powertaan na agian ng mga karniro. 8 Yang kariko ng mga otaw na yama-ona kanak domatung aw yaga-indo ng dili ng bunna, silan yang mag-onawa ng kawatan aw tolisan. Awgaid yang mga otaw na mag-onawa ng kanak mga karniro, wa silan apaningug kanilan. 9 Ako yang powertaan. Sino-sino yang somuud pina-agi kanak amalowas. Mag-onawa silan sang mga karniro na somuud aw lomogwa aw makakita sang akasamsaman nilan. 10 Yang kawatan madatung untak gaid magpangawat, magpatay aw mangguba. Awgaid ako, yakani ako sang donya untak atagan ko yang mga otaw ng kinabowi na tanto madyaw aw way kolang.

11 “Ako yang madyaw na magbabantayay ng mga karniro. Yang madyaw na magbabantayay andam ng pagpakamatay para sang mga karniro. 12 Awgaid yang otaw na byayadan untak magbantay sang mga karniro dili ng mag-onawa ng magbabantayay na tagtomon ng mga karniro. Agaw, pagkita nan na madatung yang maisug na ido, domaagan yan aw abiyaan nan yang mga karniro. Ansinyan alopogon ng maisug na ido yang mga karniro aw ipakanat-kanat nan silan. 13 Domaagan idtong otaw kay byayadan gaid ng pagbantay aw baliwaa kanan yang mga karniro.

14-15 “Ako yang madyaw na magbabantayay ng mga karniro. Yang kanak Ama yakilaa kanak, aw ako yakilaa sang kanak Ama. Mag-onawa sinyan kinilaa ko yang kanak mga karniro, aw silan oman yakilaa kanak. Aw andam ako magpakamatay para kanilan. 16 Aon pay kadaigan na mga karniro ko na wa pa akasakop sini na kolongan. Kinaanglan na apasuudun ko oman silan. Amaningug oman silan kanak aw ansinyan amabaoy yang kariko nilan ng sambok na panon aw sambok da yang magbabantayay nilan.

17 “Pyakadakowa ako ng kanak Ama kay andam ako magpakamatay untak mabowi oman ako. 18 Way sino-sino na makapatay kanak. Awgaid iklas sang pangatayan ko na i-atag ko yang kinabowi ko. Kay aon kapatot ko na i-atag ko yang kinabowi ko, aw aon oman kapatot ko na abawiun ko yan. Kay yani yang sogo kanak ng kanak Ama.”

19 Na, sabap sinyan na pyaglaongan ni Isa yanagkalain-lain da oman yang dumduman ng mga pangoo ng mga Yahodi. 20 Yang kadaigan kanilan yagalaong, “Kyasaytanan yan aw yamabowang! Nanga yamaningug kamo kanan?”

21 Awgaid aon oman kadaigan na yagalaong, “Yang otaw na kyasaytanan dili makapaglaong ng mayninyan. Dogang pa sinyan, yang saytan di makapakadyaw sang bota!”

22 Ansinyan timpo ng tingmaniki aw wakto ng pakaradyaan sa Awrosalam na tyawag ng Pagpasotti sang Baay ng Tohan. 23 Na, adto si Isa sang pamanag ng Baay ng Tohan na yagapanaw-panaw sang tyawag na Pagasilongan ni Solayman. 24 Ansinyan yanagtipon adto kanan yang mga pangoo ng mga Yahodi aw yanaglaong silan, “Nanga di pa mo kami paglaongon daw sino kaw? Paglaongan da kanami ng diretso kong ikaw agaw yang Almasi na pyasad ng Tohan.”

25 Tyomobag si Isa, “Pyagalaong da ta kamo, awgaid di kamo mangintoo kanak. Yang mga katingaan na ininang ko sabap sang kapatot ng kanak Ama, yang idto yagapangimunna daw sino ako. 26 Awgaid di kamo mangintoo kay dili kamo ng mga karniro ko. 27 Yang mga otaw na sakop ko na maynang mga karniro ko, yamaningug kanak. Ikilaa ko silan aw yagapangagad silan kanak. 28 Atagan ko silan ng kinabowi na way kataposan aw di na di silan amabuag sang Tohan. Aw way sino-sino na maka-agaw kanilan sikun sang kanak arima. 29 Yatag silan kanak ng kanak Ama na labaw sang kariko. Aw way sino-sino na maka-agaw kanilan sikun sang arima ng kanak Ama. 30 Ako aw yang kanak Ama sambok da.”

31 Na, pagdungug sinyan ng mga pangoo ng mga Yahodi, yanagpamoti da oman silan ng bato untak bonoon si Isa. 32 Awgaid yagalaong si Isa kanilan, “Madaig yang katingaan na pyakita ko kamayo na pya-inang kanak ng kanak Ama. Wain ansidto yang pyagasabapan na abonoon mayo ako ng bato?”

33 Tyomobag yang mga Yahodi, “Dili sabap sang madyaw na mga inang mo abonoon kaw nami ng bato, awgaid sabap ng yakun mo yang kapatot ng Tohan! Manosiya kaw gaid, awgaid yagalaong kaw na ikaw yang Tohan!”

34 Yagalaong si Isa kanilan, “Di ba yakasorat sang kamayo Kitab na yagalaong yang Tohan na ‘mga tohan kamo?’*10:34 Yang idto yakasorat sa Kitab Jabor 82:6. Yang mga pangoo aw yang mga maghohokom ng mga Yahodi, tyawag silan ng mga tohan kay sikun sang Tohan yang kapatot nilan pagdato aw paghokom sang mga otaw. 35 Kyatigaman natun na aag bunna yang yakasorat sang Kitab. Na, kong ‘mga tohan’ yang tawag ng Tohan sang mga otaw na pyadatungan nan ng kanan pyaglaongan, 36 nanga yagalaong kamo na yakadosa ako sang Tohan sabap ng yagalaong ako na ako yang Anak ng Tohan? Kay pinili ako ng Ama aw syogo nan ako adi sang donya. 37 Na, kong wa ako paga-inang ng pya-inang kanak ng kanak Ama, ayaw kamo pagpangintoo kanak. 38 Awgaid kong ininang ko yang pya-inang nan kanak, na, maskin di gao kamo amangintoo sang pyaglaongan ko, pangintowi da mayo yang mga inang ko kay untak katigaman mayo na yang Ama idi kanak, aw ako iyan sang Ama.” 39 Na, adakupun da oman gao nilan si Isa, awgaid yakalikay yan kanilan.

40 Ansinyan byomarik si Isa adto sang dipag ng Yordan sang logar daw wain pagasogbo singaon si Yahiya sang mga otaw. Yagapabilin yan ansan ng pilang allaw 41 aw madaig yang mga otaw na kyomadto kanan. Yagalaong silan, “Maskin sagaw wa paga-inang si Yahiya ng katingaan, awgaid yang kariko ng pyagalaong nan makapantag kang Isa bunna.” 42 Aw madaig yang mga otaw sidto na logar na yagapangintoo kang Isa.