1 Pagkatapos sinyan aon kinita ko na opat na malaikat na yanag-indug sang opat ka pinidyowan ng donya. Byabagan nilan yang opat na mga samut untak di maka-oyop adto sang lopa aw dagat atawa yang maskin sambok na pono ng kaoy. 2 Ansinyan aon oman kinita ko na tuna pa na malaikat na yadatung sikun sang silatan na yagadaa ng pangmarka ng bowi na Tohan. Yagatawag yan ng matanog adto sang opat na malaikat na yatagan ng kapatot ng pagsapad sang lopa aw dagat, 3 laong nan, “Ayaw mayo pagsapadi yang lopa, yang dagat aw kakaoyan sampay na di pa nami akamarkaan yang guya ng mga sogowanun ng kanatun Tohan.” 4 Pagkatapos sinyan dyungug ko na yang kadaig ng kyamarkaan 144,000 na mga otaw. Yani silan yagasikun sang kariko ng mga tribo na mga katopo-topowan ng sampoo aw dowa na anak ni Israil.*7:4 Israil yang ngaan na yatag ng Tohan kang Yakob. Si Yakob na anak ni Isahak aw maki-ompo ni Nabi Ibrahim, yang bantoganun na ompo ng bangsa Israil kay yang mga ngaan ng sampoo aw dowangka tribo ng kanilan bangsa yagasikun sang ngaan ng sampoo aw dowa na mga anak nan. 5 Sang tribo ni Yodah 12,000 yang kyamarkaan. Sang tribo ni Robin 12,000. Sang tribo ni Gad 12,000. 6 Sang tribo ni Asir 12,000. Sang tribo ni Naptali 12,000. Sang tribo ni Manasi 12,000. 7 Sang tribo ni Simiyon 12,000. Sang tribo ni Libi 12,000. Sang tribo ni Isakar 12,000. 8 Sang tribo ni Sibolon 12,000. Sang tribo ni Yosop 12,000. Aw sang tribo ni Binyamin 12,000.

9 Pagkatapos san aon kinita ko na kaotawan na di amabilang yang kadaig nilan. Yani silan yagasikun sang kariko ng mga bangsa, tribo, banwa aw mga pyaglaongan. Yanag-indug silan sa adapan ng ingkodanan aw yang Karniro. Yamandagom silan ng mataas na dagom na mapoti aw yanagtakmag silan ng mga daon ng palmera.†7:9 Sidto na wakto, yang palmera yang tanda ng kasowat atawa kadaogan. 10 Ansinyan yanaglaong silan ng matanog,

13 Ansinyan yosip ako ng isa sang mga pangoo, laong nan, “Sino yan na mga otaw na yamandagom ng mapoti aw wain silan pagasikun?”

14 Tyomobag ako, “Kay pangoo, wa ako akatigam. Awgaid ikaw da yang yamatigam.”

Ansinyan laong nan kanak, “Yani na mga otaw yaka-agi ng dakowa na kasikotan. Yang mga dagom nilan pyagalabaan aw pyapoti nilan sabap sang dogo ng Karniro.‡7:14 Yang mana ng pyagalabaan aw pyapoti yang mga dagom nilan sabap sang dogo ng Karniro na sabap sang pagkamatay ni Isa Almasi kyamang yang mga dosa nilan aw ya-inang silan ng sotti sa adapan ng Tohan. 15 Idto sagaw, manag-indug silan sa adapan ng ingkodanan ng Tohan, aw allaw aw gabi yaga-ibada silan sang Tohan adto sa pyaga-uyaan nan. Aw yang yaga-atiman kanilan yang Tohan mismo na yaga-ingkod sang ingkodanan. 16 Adon di da silan amagutum atawa amangga. Di da silan akapasowan ng suga atawa yang maskin ono na kapaso. 17 Kay yang Karniro na iyan sa adapan ng ingkodanan, yan yang maga-atiman kanilan na mag-onawa ng magbabantayay ng mga karniro. Adaun nan silan adto sang mga bogak na pyagasikunan ng tobig na maka-atag kanilan ng kinabowi. Aw agarisan ng Tohan yang kariko ng mga lowa nilan.”