12
Yang Bobay aw yang Dragon
1 Adon, aon dakowa aw katingaan na tanda na yagapakita adto sang langit. Kinita ko yang sambok na bobay na yamandagom ng maynang suga. Yaga-indug yan sa babaw ng bowan, aw sang kanan oo aon korona na ininang ng sampoo aw dowa na mga bitoon. 2 Masaid da yan manganak, agaw yagapiyagit yan sang kasakit ng pagpamati nan.
3 Ansinyan aon kinita ko na tuna pa na tanda adto sang langit. Aon kinita ko na dakowanay na dragon na mapowa na pito yang oo nan aw sampoo yang sowag aw sang kada oo aon sambok na korona. 4 Kyamang nan yang ikatoo na kabain ng mga bitoon adto sang langit pina-agi sang kanan ikog aw damian adto sa daum sa lopa. Pagkatapos san yamindug yan sa adapan ng bobay na madari da kaotawan kay yagatagad yan sang isu na amaotaw kay alamonon gao nan. 5 Ansinyan yamanganak yang bobay ng sambok na isu na usug. Awgaid wa akalamona ng dragon yang isu kay dyaa dayon yan adto sa taas sa adapan ng ingkodanan ng Tohan. Yani na isu magadato sang kariko ng kabangsaan aw way sino-sino na makasopak kanan kay dakowa yang kapatot ng kanan pagdato. 6 Yang bobay na yamanganak lyomayas adto sang diserto sang logar na pyagakahanda dadaan kanan ng Tohan. Ansan atimanun yan ng Tohan sa suud ng 1,260 na mga allaw.
7 Adon, yama-aon yang tyanam adto sa sorga. Yang labaw na malaikat na si Mikail aw yang mga kaupudanan nan na malaikat yapagtanam sang dragon. Aw yapaglaban oman kanilan yang dragon aw yang mga sakop nan. 8 Awgaid yatalo yang dragon aw yang mga sakop nan aw pyapanaw silan sikun sa sorga. 9 Na, dyami da adto sang donya yang dakowa na dragon na yan yang od sidtong ona na panahon na pyagangaanan kang Iblis atawa Saytan.*12:9 Si Iblis yang yagapakita sa porma ng od sidtong wakto na syasat si Nabi Adam aw si Sitti Awa adto sa tanumanan ng Idin. Tanawa sa Kitab Tawrat, Tagna Donya 3:1-5. Yan agaw yang yamangilad sang kariko ng mga otaw sang donya. Agaw, dyami da yan kipat yang kariko ng mga sakop nan.†12:9 Yang mga sakop ng Saytan yang pyagatawag na mga saytan. Mga malaikat silan singaon, awgaid yadapig silan kang Iblis aw yamagad silan kanan.
10 Adon, aon dyungug ko na matanog na sowara adto sa sorga na yagalaong,
“Adon dyomatung da yang wakto na amatoman yang paglowas ng Tohan sang manosiya.
Pyakita da ng Tohan yang kanan kabarakat aw yagasogod da yan magdato sang donya,
aw pyakita oman yang kapatot ng Almasi na kanan pinili.‡12:10 Yang Almasi yang pinili ng Tohan untak maglowas aw magdato sang manosiya.
Kay si Iblis §12:10 Yang pyaglaongan na Iblis yagasikun sang pyaglaongan na Grik, aw yang pyaglaongan na Saytan yagasikun sang pyaglaongan na Hibrani. Mag-onawa da yang mana, aw yang mana san “yang yagasombong” atawa “yang yagalaong ng maat makapantag sang kadaigan.”na yan yang yagasombong ng kanatun mga kalomonan adto sang Tohan allaw aw gabi,
pyalogwa da sikun sa sorga.
11 Awgaid yang kanatun mga kalomonan, yatalo nilan si Iblis sabap sang dogo ng Karniro*12:11 Si Isa Almasi yang tyawag na Karniro kay yamatay yan na mag-onawa ng korban untak makamang yang dosa ng manosiya. Yang kariko ng mga yagapangintoo kang Isa, yampon da yang mga dosa nilan. Agaw, di da silan ka-apiktowan ng pagsombong ng Saytan. na yamatay para kanilan,
aw sabap sang pagsaksi nilan sang bunna na indowan na tyarima nilan.
Aw wa silan akalluk na apatayun sabap sang pagpangintoo nilan.
12 Agaw, kamo na yanag-uya sang sorga,
pangkasowat da kamo.
Awgaid maat yang adatungan mayo na yanag-uya sa lopa aw dagat
kay yapanaog da adto kamayo si Iblis.
Yamadaman yan tanto kay kyatigaman nan na
tagbi da yang panahon na yamabilin kanan.”
13 Na adon, pagkatigam ng dragon na dyami da yan adto sang donya, lyomopog yan sang bobay na yamanganak sidtong isu na usug. 14 Awgaid yatagan yang bobay ng dowambok na panid na mag-onawa ng panid ng dakowa na agila untak makalayog yan adto sang diserto sang logar na tyagana kanan ng Tohan. Kay ansan atimanun yan ng Tohan sa suud ng toongka toig aw tunga aw di yan ka-ilabtan ng dragon na tyawag oman ng od. 15 Ansinyan yaboga yang od ng madaig na tobig na maynang baa paduug sang bobay untak ma-anod yan. 16 Awgaid tyabangan yang bobay ng lopa kay yamaboka yang lopa aw suyupa yang tobig na byoga ng dragon. 17 Na, yamadaman da yang dragon sang bobay aw pyomanaw yan untak mapagtanam sang kadaigan pa na mga topo ng bobay. Silan yang kariko ng mga otaw na yagatoman ng kasogowan ng Tohan aw yagapadayon magpangagad sang kabunnaan na pyaga-indo ni Isa. 18 Pagkatapos san, yaga-indug yang dragon adto sang baybay.
*12:9 12:9 Si Iblis yang yagapakita sa porma ng od sidtong wakto na syasat si Nabi Adam aw si Sitti Awa adto sa tanumanan ng Idin. Tanawa sa Kitab Tawrat, Tagna Donya 3:1-5.
†12:9 12:9 Yang mga sakop ng Saytan yang pyagatawag na mga saytan. Mga malaikat silan singaon, awgaid yadapig silan kang Iblis aw yamagad silan kanan.
‡12:10 12:10 Yang Almasi yang pinili ng Tohan untak maglowas aw magdato sang manosiya.
§12:10 12:10 Yang pyaglaongan na Iblis yagasikun sang pyaglaongan na Grik, aw yang pyaglaongan na Saytan yagasikun sang pyaglaongan na Hibrani. Mag-onawa da yang mana, aw yang mana san “yang yagasombong” atawa “yang yagalaong ng maat makapantag sang kadaigan.”
*12:11 12:11 Si Isa Almasi yang tyawag na Karniro kay yamatay yan na mag-onawa ng korban untak makamang yang dosa ng manosiya. Yang kariko ng mga yagapangintoo kang Isa, yampon da yang mga dosa nilan. Agaw, di da silan ka-apiktowan ng pagsombong ng Saytan.