1 Yang kariko ng mga otaw dait magpangagad sang gobirno kay way panggobirno na wa pagasikun sang Tohan. Aw yang mga opisyales sang gobirno, yang Tohan yang yagapa-ingkod kanilan. 2 Agaw, sino-sino yang yasopak sang gobirno, yasopak oman sang pyagakahanda ng Tohan. Aw sino-sino yang yaga-inang sinyan yagapadatung ng kastigo sang sarili nan. 3 Yang mga yaga-inang ng madyaw di dait magkalluk sang gobirno, awgaid yang mga yaga-inang ng maat. Agaw, kong di mayo karim na amalluk sang gobirno, pag-inang kamo ng madyaw aw ansinyan abantogon kamo nilan. 4 Kay silan yang syogo ng Tohan untak magdaa sang banwa para sang kadyawan mayo. Awgaid kong yaga-inang kamo ng maat, dait na amalluk kamo kay aon sagaw kapatot nilan magkastigo kamayo. Kay syogo oman silan ng Tohan untak kastigoon yang sino-sino na yaga-inang ng maat. 5 Agaw, dait na magpangagad kamo sang mga yagadaa kamayo, dili gaid untak likayan mayo yang kastigo awgaid sabap ng yamatigam kamo sa suud ng pangatayan mayo na yani yang dait mayo inangun. 6 Na, sabap oman sinyan dait kamo magbayad ng bowis. Kay yang mga opisyales sang gobirno, ininang nilan yang gawbuk na yatag kanilan ng Tohan. 7 Agaw, atagi mayo yang kariko ng mga otaw ng dait i-atag kanilan. Bayadi mayo yang kariko ng bowis na dait mayo bayadan. Addati mayo yang kariko na dait addatan.

8 Adon, kong aon otang mayo, di dait na amabilin yang otang mayo, awgaid abayadan mayo. Awgaid yang pagsikaoyay, mag-onawa yan ng otang na di akabayadan. Yang otaw na aon looy sang kapag-onawa nan, yatoman nan yang Hokoman ng Tohan.*13:8 Tanawa sa Kitab Injil, Matiyo 22:37-40. 9 Kay yang mga sogowan mag-onawa ng “Ayaw pagjina, ayaw pagpatay, ayaw pangawat, ayaw pagnapso ng mga butang ng kapag-onawa mo,”†13:9 Tanawa sa Kitab Tawrat, Pagpanaw 20:13-15, 17 aw sa Kitab Tawrat, Pangagama 5:17-19, 21. aw yang kadaigan pa na mga sogowan, pyangagadan da mo yang kariko ninyan kong pyangagadan mo yang sambok na sogowan na yagalaong “Kaoyi yang kapag-onawa mo mag-onawa ng looy mo sang ginawa mo.”‡13:9 Yani na ayatan yakasorat sa Kitab Tawrat, Pangibada 19:18 aw tanawa oman sa Kitab Injil, Matiyo 7:12. 10 Kay kong maooy kita sang kapag-onawa ta, di kita maga-inang ng maat kanilan. Idto sagaw, kong aon kanatun looy, amatoman natun yang kariko ng Hokoman ng Tohan.

11 Na, pangagadi mayo ingidto kay kyatigaman mayo na barapantag yaning panahon adon. Kay dyomatung da yang wakto na dait kamo magmata kay mas masaid da yang pagbarik ni Isa Almasi untak maglowas §13:11 Magabarik si Isa Almasi adi sang donya kay adaun nan yang mga otaw na yagapangintoo kanan adto sa sorga aw ansinyan amakomplito da yang kanilan kalowasan. kanatun kaysang wakto na yagasogod kita mangintoo kanan. 12-13 Adon maynang maduggum pa, awgaid masaid da domatung yang kaamdag. Agaw, tarikodan da natun yang maat na mga inang ng kadugguman aw mag-inang da kita ng madyaw na dait sang mga otaw na iyan sang kapawa. Kay yang madyaw na batasan maynang armas na ipanlaban natun sang maskin ono na maat. Agaw, di kita maglasing aw di oman kita magtambong sang mga pakaradyaan na aon inuman aw kasanguan. Di kita magjina atawa mag-inang ng maskin ono na kadopangan. Di oman kita mapagtanam atawa masina. 14 Awgaid yani yang dait mayo inangun na magsonod kamo kang Isa Almasi na kanatun Tagallang kay untak yang kinaiya nan makita sang kinabowi mayo. Aw ayaw da kamo pagpadaa sang maat na napso mayo.