Eimos
Lainuwanega
Eimos tana ba tauwaiḡamoḡamo Betliḡem tauninemo i miyamiya Diudiya noponemo. Maimaituwa i vine te taugiuwatana. Niga laḡannemo Islael lavedi ai maula gulata te Bada ena giuvavasaḡa a gose. Lava ai lavabiu bi waiyamoyamonidi bi kanikanipekidi a laulau kivigebogeboyedi.
Eimos i lauguguyana gado, “Maimaituwa i giuwapa te laḡan muliḡa Islael dobuna kaka ya laivaliu munaḡe. Bi Yelusalem sa ḡala munaḡe bi ḡalibona Deivida ena tubulelesa dobuna sai badae bi lava nuwaubamo sa miya.”
8
Laḡan waiḡolana ya natonatona ena ḡaba
“Temi koi beyavaiya,
temi lava wai kani geḡedi ko vavawaidoḡedoḡedi.
Bi ko ḡoeḡoena emi dobumo
waiyamoyamonidi ko laukivi gebogeboyedi.
Waiyawasi laḡanna bi laḡan waiwaiyawidi
edi saugemo ba ko wai papalanana gado,
‘Laḡandi sa nawa kamaḡa
bi ta munaḡa eda kani tai kunekunedi.
Bi kanidi maiidi ta tausaḡedi
te taugimala sa gimelidi bi mane laubanidi ta legaudi.’
Banina temi ko ḡoeḡoena ko munaḡa makai
bi taugimala ko kaiyovuḡedi. Bi lava edi wai kunekune mwalidi sa natomdi bi temi ko aiai sikesikeledi.
Temi kani gebogebodi
bi visuvisudi ko viliviliwaikapudi
bi ko wai kunekunedi.
Bamoda lava wai yamoyamonina em bai i vai,
maibena kaḡesuma maiina ḡaubona
bi mote i wai maii ba ko voiye te aubaimi ya wai taupaula.
Bada isanemo i giuwapana gado,
Mba isanana Islael lavedi a vivivile bi i giuna gado,
‘Mote kaka edi gebogebo
nuwagu ima yavuḡa.’
 
10 Bi tagu emi soi yà vitaledi
te nuwaboya.
Bi emi sale yà vitaledi
te ḡaba kwatululu.
Bi matabumi yà voiyemi
te gala yadiyadidi ko kotedi
bi dabemi ko ḡalidi.
Mba laḡanina yà voiye te maibena
natum ḡemota ota i peki bi nuwaboyana,
ba maibena laḡan waiḡolana.”