Magtubu to tumô to Ja li
Kwôlo kôl kwôli magtubu to tumô to Ja li hen
Magtubu to subu to Ja liɲ hen na, gawrê kôl kêm wo ré na *ôbi jé Ja a ré lê hen bi wo hini uwôgiɲ têê pôn nêŋ iyôŋ bô ré hen, men, gawrê ka ôbi li magtubu hende to hen biji hen kôba, hiniji uwôgiɲ né a men. Gaɲ wori ba, gel na wo magtubu hende to hen ré liɲ biɲ na bay ayê bôô. Bay ayê bôô bay ka hen na, toy kwôlê kwône gengiɲ geré lê kwôlo Emen wo gay gay hen wo a ôriɲ naɲ ci kelaŋ naɲ ayê bôô woɲ tiri hen. Na ôbi á, ôbi lê magtubu hende to hen ré genge aŋgaɲ lê kiriɲ wôô bô magtubu hende to hen a.
Ka tumô ba, na dôbêji ibiyare bôrji a bi bay ré biɲ biɲare toɲ tiri naɲ Emen men, naɲ Kemari Jésu Krist a men, a yé hen iyôŋ naɲ geré woɲ peré yi tô yêniɲare a.
Ka wôôyi ba, na kaɲê aŋgaɲ gelé kaɲ benare ka jôô bê bôô pôn sa Kwôlo Dôri a hen.
Sapitre 1: 1-4 na, kôl wô mi a ôbi lê magtubu hende to hen ré lere hen ba? Ermé wori bi a na: nôgê tô biɲare to bay ayê bôô naɲ Emen men, naɲ Jésu Krist men, biɲare to perêrji a a men. Hen iyôŋ na, bay a ɗebé tô geré wo ka na gel Jésu men, na toy kwôlê wori hen a men na gelji hen.
Ôbi lê magtubu hende to hen kôliɲ gawrê bay ka hen ré mô kiriɲ ka peraŋgi a wôsa Emen na kiriɲ ka peraŋgi. Iyôŋ ba, tôô to kôl kwôli peré hen a bay ré bi kwôlê sara (1: 5 - 2: 17). Cêgeri wori menba, ôbi kôlji kwôli sa wo ôbi bayi Krist wo dami hen men, bay benare ka kôl Jésu ré na *Krist, kwo Emen dôri hen né men (2: 18-29). Men, ôbi kôl kwôli aŋga gel wo kwôni ré na kema Emen woɲ tiri hen, men jé lêri na kwoɲ derôre men, peré wo bay periɲ yiri hen men, bôô pôn woji sa Jésu Krist a a men (3: 1-24). Kiriɲa ôbi gelji derê tu kwôlê woɲ benare naɲ tu kwôlê (4: 1-6) niɲ na, ôbi lê magtubu hende to hen hô hera têê pôn a sôŋ gengiɲ sa kwôli peré aɲ ôbi kôl iyôŋ ba yé gawra wo Emen na, na peré kiriɲ wôsa Emen na kwôni wo pur kiriɲ (4: 7-21). Ôbi kôl kwôli ayê bôô wo ay joor hen men, mawi kwôlê wo yi bô magtubu a hen a men aɲ diriɲ kibi magtubu tori (5: 1-21.)
Bô magtubu hende to hen na, gel na ayê bôô woɲ tiri hen men, li naɲ ermé wo bay ayê bôô bi bay ré dô yirji aɲ yi kwôlê woɲ benare wo wuu kiriɲ hen men, dôbji ibiyare bôrji a bi bay ré day bê bôô sa Jésu Krist a naɲ peré yênem.
1
Kwôlê wo bi merê tu geɲ
1 Kwôni wo nini li magtubu béŋge kelêŋge kwôli hen na, tumô wo tô terare na ɗiɲ né tô kôba, ôbi na ya niɲ. Kwôni bi wo hen na, nini toy kwôli kelêri men, nini geli naɲ tirni men, nini kôbri men, nini hebiri naɲ kôbrini a men. Ôbi bi a na kwôlo biɲ gawrê merê tu geɲ hen. 2 Na ôbi á, kiriɲa Emen né yêge sa kwo bi merê wo naɲ kwini bi wo hen niɲ na, nini gili aɲ na ôbi a, niné kelêŋge kwôli hen. Merê tu geɲ bi wo nini kelêŋge kwôli hen na, na yi ya naɲ kwini. Tumô ba, ôbi nà ná naɲ Ibarna Emen derômaraŋ a niɲba, haw hen Emen gelénari nô niɲ. 3 Na are bay ka nini gel naɲ tirni men, nini toy naɲ marni a men hen aɲa niné kelêŋge kwôliji men hen. Nini kelêŋge hen iyôŋ bi kenbay kôba, kené biɲ pôn naɲ nini mega wo nibay nini biɲ pôn naɲ Ibarna Emen men, naɲ Kemari Jésu Krist men hen iyôŋ. 4 Na ôbi á, niné li magtubu hende to hen béŋge kelêŋge kwôli are bay ka hen aɲ bi yirni ré derêni cerêd.
Erêŋge kiriɲ ka peraŋgi a ɗi
5 Emen na kiriɲ ka peraŋgi ɗiba, kiriɲ ka hendi naɲ yiri a. Aɲ na kwôli peraŋgê wori bi wo hen aɲa Kemari Jésu Krist naɲ yiri ré kelêni kwôli aɲa niné kelêŋge men hen. 6 A hena nana kôl nabay naɲ Emen nana biɲge pôn aɲa nana mô bô dilemne a kwôy kwôy na, gel wo nana na bay benare men, jé lêrena ré na kwoɲ benare men, tu kwôlê naɲ bô a men. 7 Niɲba, hena nana ô kiriɲ ka peraŋgi a mega wo Emen môriɲ kiriɲ ka peraŋgi a hen iyôŋ na, nana biɲ pôn perêrna men, kwôbri Kemari Jésu pul têriɲ tona aɲ, aɲ bi nana yiɲ ka séli a men.
8 Hena nana kôl nana li têriɲ ré ba, nana kôl na kwôlê woɲ benare men, nana lam na yerna wona gaŋ a men, ɗiba, kwôlê woɲ tiri wo Emen naɲ yerna. 9 Niɲba, hena nana kôl ta waŋ nana na bay lê têriɲ ba, Emen a ɗé bôri jalê sa têriɲ lêrena hende to hen a. Men, ôbi a derê têriɲ tona aɲ naa yiɲ ka séli wôsa Emen na kwôni woɲ derôre men, ôbi na ôbi bôô pôn a men. 10 A hena nana kôl nana li têriɲ ré ba, gel wo nana kôl Emen ré na ôbi benare men, kwôli kôba, ré naɲ bôrna a men.