Magtubu to jôgiɲ wôô to Pol li biɲ Timoté
Kwôlo kôl kwôli magtubu to Pol li hen
Magtubu to jôgiɲ wôô to Pol li biɲ Timoté hen na, na kiriɲa ôbi geliɲ gusiɲ gaɲ daŋgay a Rôm a (Sapitre 1: 7). Wulê wo Pol a diriɲ kibi jé wori baa ɗa niɲ aɲa ôbi ré li magtubu hende to hen ayiɲ tôri biɲ kwo na ôbi bêêri ôriɲ kiriɲ wo ôbi geyri gaɲ hen (Sapitre 1: 2).
Sapitre 1: 3 - 2: 13 na, *ôbi jé Pol ay tô lê magtubu tori naɲ liɲ Emen dosé wô peré wo Timoté pur ɓiɲé men, wô ayê bôô wori a men. Wô gusiɲ to ôbi a uɲé men, kaɲê wo bay a kaɲê manê ka Kwôlo Dôri hen a men na, Pol ay tôri biɲ Timoté ré ɓu bôri iyêre sa gusiɲ a men, ré li maɲê naɲ ibiyare men, naɲ bôô pôn a men mega asgar wo Jésu Krist iyôŋ. Men, Pol yêge maa Timoté bi ré ɗi tu melênê sa yiri a wô ɓiɲé kaɲ bay geyé nariɲare kwôlê woɲ ɗéɲ iyôŋ hen men, wô naɲare to gengiɲ sa kwôli kelêrji woɲ ɗéɲ iyôŋ wo a dôrem ôriɲ kelaŋgê naɲ ayê bôô hen men.
Sapitre 2: 14-4: 5 na, Pol kôliɲ Timoté ré ay hal wori men, bi ôbi ré ɗebu sa têri a naɲ bôô pôn sa aŋgaɲ gelé ka biɲ naɲ kwôlo Emen ka bay na gili naɲ kamɲêri yeŋ hen.
Sapitre 4: 6-22 na, deré kibi magtubu tori hende to hen na, Pol kôl kwôli kiriɲ ka ré iyêre naɲ ɗi. Niɲba, ôbi liɲ Kelma dosé wô geré wo ôbi gereri hen.
Kwôy wo ôbi deriɲ kibi jé wori na, Pol li maɲê wo dôri wo gengiɲ sa Kwôlo Dôri (Sapitre 4: 7). Naɲ elê wo yôŋ yôŋ wo ɓiɲé dêŋse magtubu hende to hen na, Pol kôlji bi bay ré li maɲê wo dôri bi wo hen ɗiba, bay ré hariɲ ôbi bare ré men, bay ré li naɲ ayê bôô men, ulê bôô men, peré ɓiɲé naɲ ɗebé sa têê a a men.
1
1 Nôbi Pol, *ôbi jé wo Krist Jésu naɲ bô geyé wo Emen wo na genge bi ené uwôl béré gelê wo ayiɲ tôri ɗiré biɲ ɓiɲé wo yi yi Jésu Krist a kiriɲa nana biɲ naɲ ɗi hen.
2 En li magtubu hende to hen bem jôbi Timoté wo ju yi môɲ keman wo en geyri hen iyôŋ. Bi Ibarna Emen naɲ Kelma wona Krist Jésu tô kibriji sam a men, bi bay bô tu ɲa tom men, bi bay jal bôm a men.
Pol uwôl Emen wô sa Timoté men, dôbri ibiyare bôri a a men
3 En liɲ Emen wo en li jé biri naɲ bôn wo dôri mega wo môɲêrna kôba, na liɲ jé biri hen iyôŋ dosé. En liri dosé wôsa yoyre naɲ tu tare kiriɲa en mô wô uwôlêri na, en erem sam a kwôy kwôy. 4 Bôn juben sa sômê wo na ju sôm a hen aɲ en gey gelem aɲ bi yen ré dôren. 5 Men, en erem sa ayê bôô wom woɲ tiri hen, ayê bôô woɲ tiri bi wo hen na, agerem Loyis naɲ yom Énis na ôriɲ hen iyôŋ men aɲ en hôn wo jôbi kôba, ayê bôô wom ré na kwoɲ tiri hen iyôŋ men. 6 Na ôbi á, ené jubu tô bôm ta bi jeré cubu tum tô gwosoy jé wo Emen na bem kiriɲa na en uwôliɲ kôben sam a hen dô ɗiba, bi ré yi aŋga beray mera ré. 7 Wôsa Tunu to Emen béna hen na, na to béna néé men, toɲ geyé ɓiɲé men, toɲ gemé yi a men, ɗiba, na tunu toɲ harê ré.
8 Hen iyôŋ na, dô wo ju ɗi tayre dêm sa dôriɲ ɓiɲé kwôlê wo gengiɲ sa Kelma wona hen ré men, gengiɲ san nôbi wo en yi daŋgay a wô sa Jésu hen né a men. Niɲba, ju geliɲ gusiɲ naɲ en wô sa kwôlê wo dôri wo Emen naɲ néé wo ôbi bem hen. 9 Emen a gôliɲ naɲ na men, ôbi a uwôgêna bi nana yi ɓiɲé kari a men. Na wô jé lêrena wo dôri wo nana li hen né, niɲba, na gengé wori men, bô derê wori a men. Na bô derê wo ôbi li naɲ na tô Jésu Krist a pa dema tô terare na ré ɗiɲ tô. 10 Men, haw hen ôbi geléna bô derê wori bi wo hen naɲ sa to ôbi gôliɲ naɲ na Jésu Krist na saɲ hen, wôsa Jésu Krist a mênê néé wo temare yôd. Aɲ naɲ kwôlê wo dôri bi wo hen na, ôbi yêge sa gelê wo a kerê ré hen béna.
11 Nôbi kôba, na wô kwôlê wo dôri bi wo hen a Emen ré ɗén mega ôbi ulê béré iyôŋ men, mega *ôbi jé iyôŋ men, mega ôbi geliɲ ɓiɲé are iyôŋ a men hen. 12 Na ôbi á, ené geliɲ gusiɲ hende to hen hen. Niɲba, en ɗi tayre dên ré wôsa en hôn kwo en bi bôn sari a hen men, en hôn wo ôbi ré ôriɲ naɲ néé woɲ gemé aŋga ôbi bên kôbena hen derê kwôy Wulê woɲ jerê kwôlê a. 13 Gem tu kwôlê wo ju toy keben a hen dô aɲ bi yi môɲ aŋgaɲ gelé kam iyôŋ men, ju ɓu ayê bôô wom iyêre men, pur ɓiɲé a men wô kibi biɲare tona naɲ Jésu Krist. 14 Timoté, cubu tum sa aŋga Emen bêm kôm a hen dô naɲ néé wo Tunu toɲ hendi bô bôrê to yi yerna hen a men.
15 Ju hôn wo bay ayê bôô kêm ka mô bô emê wo Asi a na, ɗénji aɲ men, aɲ perêrji a hen na, si Pijélus naɲ Hemojêns kôba, ɗénji aɲ a men. 16 Niɲba, bi Emen bô tu ɲa to Onésipôr naɲ ɓiɲé ka bô iyére tori a, wôsa ôbi dôben ibiyare bôn a kwôy kwôy, men ôbi bi tayre diri san a wô wo ené na daŋgay ré a men. 17 Niɲba, kiriɲa ôbi sa Rôm a na, ôbi wogen ɗé ɗé ô uɲen. 18 Bi Kelma bô tu ɲa tori wulê wo ôbi a jôriɲ kwôlê sa ɓiɲé a hen. Are kêm ka ôbi na li naɲ en Epês a hen na, ju hôn dô.