Kwôlo Dôri wo Emen wo Mark kôl kwôli bô magtubu tori a
Kwôlo kôl kwôli magtubu to Mark li hen
Kwôlo Dôri wo Mark na, gengiɲ na sa ɓiɲé ka na Jubɲê ré hen. Magtubu to Mark hende to hen na, na magtubu to mena ɗêj seŋge men, kwôlo Jésu wôni wo yêŋgi iyôŋ kôba naɲ bôô a a men. Niɲba, magtubu hende to hen kôl na kwôli ɓiɲé ka Jésu men, kwôli berarê wo ôbi berare ɓiɲé men, kwôli nariɲare kwôlê wo ôbi nariɲ naɲ ɓiɲé a men. Kwôlo pôni wo yi bô magtubu to Mark a hen na, naɲ bô magtubu to Matiyé a men, naɲ bô to Ja a men, naɲ bô to Luk a a men. Magtubu to Mark hende to hen kôl kwôli bô emê, wôsa tumô ba, hende kôl na kwôli Jésu mega ré na Kema Emen (1: 1) men, deré kibi ba kôl na kwôli Kema Emen bi wo hen réé ma aɲ bay réé ɓééri sa gurô tagelê (15: 39).
Sapitre 1 - 8: 26 a na, Jésu gey wo kwôni ré hôn jog ɗiré na i ba ré tô. Ôbi berare bay ômɲare men, dage tunu to habiɲ sa ɓiɲé men, iyêl naɲ ibiyare a men, menba, ɓiɲé eŋgere iyôŋ ba: «Gawra bi wo hen na I ba?» Niɲba, Jésu kôliɲ ɓiɲé ka kôl ciré hôni hen iyôŋ ba: «Kôliɲge kwôni ené i ba ré pa pa.»
Sapitre 8: 26 - sapitre 16 a na, gey geliɲ ɓiɲé ré hôn wô mi a Jésu ré na Kema Emen ba.
Ɓiɲé kaɲ bay bê bôrji sa Emen a ka bô emê wo Rômê na, gey gawrê ka yi môɲ emen iyôŋ hen. Gawrê bay ka hen lêrê aŋga ɗêrê sa kiriɲ men, aŋga bay li ba kuriɲ dô biji men, bay gôliɲ sa aŋgaɲ bô emê kêm a men.
Niɲba, Jésu wo na Kema Emen hen na, bul yiri gawra aɲ biɲ Emen kwôlê kwôy wo uwôɲiɲ bô emê men, uwôɲiɲ temare a men. Bay tô Jésu kôba are bay ka ôbi li hen na, bay hôn bôrji peraŋ né. Aɲ li wo bay jibiri ɗéɲ kiriɲa bay ôriɲ wô uwôliɲ kwôlê sari a aɲ deriɲni hen. Na dami wo asgarɲê woɲ Rômê a gelé temare to Jésu ma hen, menba, ôbi kôl iyôŋ ba: «Gawra wo na na, na Kema Emen bi tiri.»
Kiriɲa Jésu ɗa kelê kwôlê wôni gengiɲ sari ba ôbi uwôge yiri Kema Emen. Uwôgê bi wo hen na, gel na wo gawra bi wo hen, Emen né biri damɲare kêm men, néé woɲ ɗé bô jalê sa gawrê men, kwoɲ uwôliɲ kwôlê sarji a a men. Men, gel wo Jésu ré na gawra tiri a men. Men, giɲê wo yi gengiɲ sa Jésu naɲ jé lêri hen.
Kwôni wo dêŋse magtubu to Mark hende to hen na, a henê wo eŋgeré kwôlê wo kôl iyôŋ ba: «I a na Jésu ba?» hen bô a. Aɲ kwôlo jeré hôn ulê sara lew ba naɲ. Já dêŋsê magtubu to Mark kaŋ kerê dema jeré henê geré wo Jésu ay men, i a ré na Jésu ba a men tô.
1
Derê kwôlê wo Ja ôbi liɲ ɓiɲé batêm
(Mt 3: 1-12, Lk 3: 1-18, Ja 1: 19-28)
1 Kwôlê wo Dôri wo gengiɲ sa Jésu Krist Kema Emen ayiɲ tôri mega hen iyôŋ. 2 Mega *ôbi kibi Emen *Esay na li bô magtubu to Emen a tumô kôl iyôŋ ba:
«Toy, nôbi Emen en jé mana wuɲê tumôm a
bi ré ô ɲanê geré wom1: 2 Malasi 3: 1.
3 Na tôô ôbi ulê béré wo ôm derô gwôlê kôl iyôŋ ba:
‹Ɲanêŋge geré wo Kelma men,
ɲanêŋge kam geré kari bi ô derôre a men1: 3 Esay 40: 3.› »
4 Na hen iyôŋ a Ja ré so aɲ ôbi liɲ ɓiɲé batêm derô gwôlê men, uwôliɲ béré kôl iyôŋ ba: «Beléŋge cêgerŋge biɲ têriɲ aɲ ken li batêm aɲ bi Emen né ɗiɲ bôri jalê sa têriɲ toŋge a.»
5 Ɓiɲé ka bô emê wo Judé kêm naɲ ka Jérusalêm ôrji sa pôn pôn ligiri a. Ɓiɲé bay ka hen tô tô têriɲ toji ta aɲ ôbi liji batêm bô cér wo Jurdê bi wo hen a.
6 Ja tôbe bargay ka bay li naɲ gusiri jambal men, ôbi ha tô bôri naɲ ariɲ a men. Ari emêri na céré men, timne a men. 7 Ôbi uwôl béré kôl iyôŋ ba: «Kwo a era cêgen a hen na, néé wori gôliɲ kuɲê men, en nêm deŋgé terê gaŋgi garbê kaɲ têri ré a men. 8 Nôbi, en lêŋge batêm na naɲ kam niɲba, ôbi ba a lêŋge batêm naɲ Tunu toɲ hendi bô bôrê.»
Batêm to Jésu
(Mt 3: 13-17, Lk 3: 21-22)
9 Na iyôŋ a, Jésu ré hena Najarêt bô emê wo Galilé aɲ biɲ Ja liri batêm bô cér wo Jurdê. 10 Kiriɲa Jésu so bô kam a na, ôbi gel derômaraŋ bôliɲ aɲ Tunu toɲ hendi bô bôrê yi mega derare iyôŋ herbo sari a. 11 Aɲ tô kwôni ôm derômaraŋ a kôl iyôŋ ba: «Ju na Keman, en purem damaŋ men, en li yi derê wô sam damaŋ a men.»
Sidan sél Jésu
(Mt 4: 1-11, Lk 4: 1-13)
12 Kiriɲ bay ka hen na, Tunu toɲ hendi bô bôrê dô tumô Jésu ôriɲ naɲ ɗi derô gwôlê. 13 Ôbi li wulê tôre pôrbu derô gwôlê menba, Sidan era sa séli. Jésu mô perê tanare to noni niɲba, *manê ka derômaraŋ a sa li naɲ ɗi.
Jésu uwôge bay tôri ka tumô pôrbu
(Mt 4: 12-22, Lk 4: 14-15, 5: 1-11)
14 Kiriɲa bay ɓu Ja uwôl daŋgay a na, Jésu ô bô emê wo Galilé. Ôbi uwôl béré Kwôlo Dôri wo hena ligi Emen a. 15 Aɲ ôbi kôl iyôŋ ba: «Kiriɲ kô niɲ aɲ *emê iyére to Emen era ɗa niɲ. Ɗéŋge jé lêreŋge wo habiɲ hen ba, aɲ ken bêŋge bôrŋge sa Kwôlo Dôri a.»
16 Kiriɲa Jésu ô kibi cér wo Galilé na, ôbi gel Simô naɲ yêni André ka na bay uré hen urji kuyê naɲ bera. 17 Menba, Jésu kôlji iyôŋ ba: «Eraŋge tôn a aɲ na béŋge ka yé bay uré ɓiɲé ben.»
18 Kiriɲ bay ka hen na, bay ɗéɲ bera toji aɲ, aɲ ôrji tôri a.
19 Kiriɲa Jésu ô kelaŋ dê menba, ôbi gel si *Jak naɲ yêni Ja kaɲ kami gawra wo bay uwôgeri Jébédé môrji bô bato ɲanji bera toji. 20 Kiriɲ bay ka hen na, ôbi uwôgeji menba, bay ɗéɲ ibarji Jébédé hen naɲ bay jé kari bô bato a aɲ ôrji tô Jésu a.
Jésu dage tunu to habiɲ
(Lk 4: 31-37)
21 Bay ôrji a sa iyé Kapêrnayôm. Aɲ naɲ sa *sa merê ta a menba, Jésu ô bô *iyéy daɲare a ô geliɲ ɓiɲé are. 22 Tiniji ge kay sa derê kwôlê wo Jésu dô hen wôsa ôbi iyêl mega kelma ɗiba yi mega *bay derê tô tôô to Emen hen né.
23 Kiriɲ bay ka hen na, bô iyéy daɲare hende to hen na, gawra wo pôni wo tunu to habiɲ yi bôri a hen soo ira. 24 Aɲ hende kôl iyôŋ ba: «Wuge! ju gey na mi yirni a ba? Jésu wo Najarêt. Ju era na wô mênêni. En hôn ju na i ba, ju na kwôni wo yi naɲ jeŋgêri gay wo Emen a jori.»
25 Jésu ône kôl iyôŋ ba: «Wôm tôŋ aɲ mu séɲ bô gawra bi wo hen.»
26 Menba, tunu to habiɲ hende to hen séɲ bôri a aɲ liri ôbi ka kula men, gwôrêri men. 27 Ɓiɲé kêm hare gaɲ, aɲ bay eŋgeriɲ yirji na ba ré na mi a ré yé hen iyôŋ ba. Derê kwôlê wo kôrbi wo na ba, ré na kwo naɲ néé. Wôsa gawra bi wo hen ay tôô biɲ tunu to habiɲ menba, hende biri kwôlê.
28 Aɲ hini emê wo Jésu ôm gôriɲ kiriɲ kêm bô emê wo Galilé.
Jésu berare bay ômɲare kwône
(Mt 8: 14-17, Lk 4: 38-41)
29 Kiriɲa Jésu men, Simô men, André men, soji bô iyéy daɲare a na, bay ôrji iyé si Simô naɲ André aɲ si Jak naɲ Ja kôba naɲ ci men. 30 Wulê bi wo hen na, mari Simô kal dere aɲ yi ira menba, bay kôliɲ Jésu kwôle. 31 Jésu ô kiriɲ ka hende yiɲ ya hen, aɲ ɓu kôbre buru hena ta, menba, hende berare aɲ hende li aŋgaɲ emê biji.
32 Kiriɲa tare kuriɲ niɲ menba, ɓiɲé ka sa iyére hende to hen eraɲji naɲ bay ômɲare kêm men ɓiɲé ka tunu to habiɲ yi bôrji a hen a men biɲ Jésu. 33 Aɲ ɓiɲé kêm ka sa iyére hende to hen daɲji tumô iyére to Jésu môriɲ ya hen. 34 Jésu berare ɓiɲé kêm ka naɲ ômɲare to gay gay to geliɲ tirji gusiɲ hen men, ôbi dage tunu to habiɲ bô ɓiɲé ka pôni a a men. Niɲba, Jésu jôriɲ tunu to habiɲ iyêlê wôsa hende hôni dô.
Jésu uwôl béré naɲ kiriɲ kiriɲ bô emê wo Galilé
(Lk 4: 42-44)
35 Kiriɲa kiriɲ ba hende ɗurum ɗurum tô na, Jésu hena si nô ô wolé derô gwôlê ô uwôbê aɲ uwôl Emen. 36 Simô naɲ ɓiɲé ka mô naɲ ɗi hen siji ô wogeri, 37 aɲ uwoɲni. Bay kôli iyôŋ ba: «Ɓiɲé kêm wogem.»
38 Menba, Jésu kôlji iyôŋ ba: «Na erêŋge naɲ sa iyére iyére bi na erê ulê béré yaŋ men. Na wô bi wo hen a ené soɲ nô wolé hen.»
39 Aɲ Jésu ô gôr bô emê wo Galilé uwôliɲ béré bô iyéy daɲare a men, dagiɲ tunu to habiɲ a men.
Jésu berare ôbi terbare
(Mt 8: 1-4, Lk 5: 12-16)
40 Gawra wo pôni wo *terbare liri era ligi Jésu a aɲ kuriɲ tôŋ di tiɲare tumôri a aɲ uwôli ré bô tu ɲa tori aɲ kôli iyôŋ ba: «Hena jeré gey ba já beraren.»
41 Jésu jé kôbri hebiɲni aɲ kôl iyôŋ ba: «Ew, en gey bi terbare tom hende to hen ré dôriɲ sam a.»
42 Kiriɲa Jésu kôli hen iyôŋ na, terbare dôriɲ sa gawra bi wo hen, lew, menba, ôbi berare. 43 Jésu dageri aɲ nayri aɲ kôli kwôlê wo iyêre kôli iyôŋ ba: 44 «Kôliɲ kwôni kwôlê wôni ré, niɲba, ju ô geliɲ ôbi bê kwôbe yem aɲ ju li sarga naɲ tôô to *Moyis na ay hen aɲ bi bay ré gel wo jeré na kwo séli tumô Emen a.»
45 Niɲba, kiriɲa ôbi terbare ô na, ôbi ay tô kôliɲ ɓiɲé kêm, aɲ li wo Jésu nêm erê sa iyére tôni a ba wo ɓiɲé ré hôn né ba naɲ. Jésu ɗubu sêd nono aɲ ɓiɲé sooro gay gay era ligiri a.