5
O Iesu i ulangolango pas ara musano
Numur, o Iesu i wan usapat o Jerusalem sur a labino bung na lotu anun a taro Juda. Ara kabopolo, di watungi nam o Besata una wasiso Ibru, i kis sapat o Jerusalem, milau una labino matansako ra di watungi nama “Matansako na sipsip”. Ma a limo na parada det tur talilis pas a kabopolo ra. 3-4 A susut na taro ra det misait nama wur ngas na misait, det ser kis tiro iai, a kum pulu, det ra ka det ser wan ma det ra a pinpinin det i mat.* Una ramano kum du buk una wasiso Grik, a ramano kum wasiso kai i kis una vers ri. I lenri: Det kis langlang sur a danim ra in tonton. A ramano kum du bung, a ensel anun a Labino in nan pirso utiro una kabopolo ra, ma in utontoni. Osi kut ra in rurus mugu una kabopolo una du bung ra i tonton, in langolango mut gusun anun a misait.
Ara musano i kis tiro iai i misait pas a tulu noino ma tiwal na kilalo. O Iesu i tama pas a musano ra i inep taru tiro iai. I tasmani lena a musano ra i sa suano i a misait uni, ra i tingi lena, “Pepetlai, u nemi sur un langolango?” A musano ra i balu i lena, “Labino, kataio i ser warut iau sur in los tar iau una du bung ra a danim i tonton uni. Ra a nem na wan sur an rurus, ara gisen kut in kalabor mugu batbat pas iau.” Mt 9:6O Iesu i watungi tano lena, “Un katutur, un los anum a bat ra un nan.” Uniutra a musano ra i langolango, i tur, ma i los pas anun a bat, ra i wan.
A utna ri i wanpat una Bung na Sabat. 10  Neh 13:19; Jer 17:21I mo ra a ramano kum te Juda det watungi tan a musano ra o Iesu i ulangolango pasi lena, “A Sabat ri! I tabu sur din los a bat uni.” 11 Ra i balu det lena, “A musano ra i ulangolango pas iau, i watungi tang lena, an los pas anung a bat ra an nan.” 12 Det tingi lena, “Osi na musano ra i watungi tam lena un los pas anum a bat ma un nan?” 13 Ikut a musano ra ke tasman osi ra i ulangolango pasi, uni o Iesu i wan epotor tan a kunur na taro.
14 Numur ut, o Iesu i barato pas a musano ra una rumu na etabor. I watungi tano lena, “Tama i, uniri u sa langolango. Gong melet mo u pam tu sakino, sako numur tu laulau na utna sakit in nanpat un ui.” 15 A musano ra i wan ma i inanos a kum te Juda lena, “O Iesu ut i ulangolango pas iau.” 16 Ra uniri, a kum te Juda det turpasi sur det in pam a kum sakino petutna torom o Iesu, uni i pam a kum utna ri una Bung na Sabat. 17 O Iesu i watungi tandet lena, “O Tita ke mana nama pinapam na warut, lenkutkai ra iau kan mana nama pinapam na warut torom a taro.” 18  Mt 26:4; Jn 7:1; 10:30Iri a kibino ra a kum te Juda det nem doko i sur det in um doko o Iesu. Det kankan torom o Iesu, awu sur i kibino kut ra i papam una Bung na Sabat. A kibino utkai ra o Iesu ut i watung o God lena o Tamano, ma una wasiso ri, i elaro i ut nam o God.
O Tamano i pitar a warkurai torom o Nutunu
19  Jn 5:30O Iesu i balu det lena, “A inanos mot nama lingmulus, a Nutun o God ken pam oros pas tu utna elar nam anun a nemnem, in pami kut a kum utna ra i tama o Tamano i ser pami. Uni a kum utna rop ra o Tamano i pami, o Nutunu kai in pami. 20 O Tamano i nem o Nutunu, ma i ese i una kum utna rop ra i ser pami. Ma in ese i kai una kum utna ra i labo taun a kum utna ri, sur mot in kisin uni. 21 O Nutunu in tabor det ra i nemi sur in tabor det nama nilaun, elar nam o Tamano i ukatutur pas a kum minat, ma i tabor det nama nilaun. 22  Jn 5:27; Ap 10:42O Tamano ken warkurai taio, ikut i pitar tar a warkurai rop tan o Nutunu, sur in warkurai nami, 23  Pil 2:10-11; 1 Jon 2:23sur a taro rop det in ru o Nutunu elar nami ra det ru o Tamano. Osi ra ke ru o Nutunu ke ru i kai o Tamano, i ra i tulu ru i urin.
24  Jn 3:15-18“A inanos mot nama lingmulus, osi ra i longoro anung a kum wasiso ma i nurnur un o naro ra i tulu ru iau urin, i sa utur ukai a nilaun tukum, ma ken iru una warkurai. I sa wan gusun a minat sur a nilaun tukum. 25 A inanos mot nama lingmulus, a du bung in nanpat, ma iri i sa wanpat, ra a kum minat det in longoro in nalngan a Nutun o God, ma det ra det longoro i det in laun. 26 O God a kimkibin a nilaun. Ma lenkutkai ra i pitari torom o Nutunu sur i kai a kimkibin a nilaun. 27 O God i pitar tar a dekdek tano sur in warkurai a taro nami, uni, i a Nutun a Musano. 28  Dan 12:2; Mt 16:27; Ap 24:15Gong mot kisin una wasiso ri. A du bung in nanpat, ra det rop ra det inep una kum kulam na minat det in longoro in nalngano. 29 Det in katutur melet gusun a kum kulam na minat. Det ra det sa pam tar a wakak na petutna det in katutur melet gusun a minat sur a nilaun tukum. Ma det kai ra det sa pam tar a sakino petutna, det in katutur melet gusun a minat sur a iniru tukum.”
A wasiso talapor un o Iesu
30  Jn 5:19; 6:38O Iesu i wasiso utmakai torom a kum te Juda lena, “Ka pam oros tu utna elar nam anung a nemnem. A warkurai nama utna a longoro i. Ma anung a warkurai i tokodos, ma ka mur a nuknuking, a ser muri ut a nuknukin o naro ra i tulu ru iau urin. 31 Ra an wasiso talapor un iau ut melet, anung a wasiso talapor ken maut. 32 Ikut ara gisen ut i wasiso talapor un iau, ra a tasmani lena anun a wasiso talapor un iau i lingmulus sakit.
33 “Mot tulu ru ara taro torom o Jon a Tene Baptaiso, ra i wasiso talapor torom det un iau. Ma anun a wasiso i lingmulus. 34 Ka sibo sur lako taro det in wasiso talapor un iau, ikut a watungi lenri sur din ulaun mot. 35 O Jon i elar nama lam, ra i kunabor ma i talapor, ma mot gas ra mot tamtama lilik pas kut una talaporino.
36  Jn 3:2; 14:11“Ikut an inanos mot una wasiso talapor un iau, ra i labo taun a wasiso talapor anun o Jon un iau. A kum pinapam ra a ser pami, det wasiso talapor un iau lena, o Tita i tulu ru iau urin. O Tita i pitar tar a kum pinapam ra tang, sur an pami. 37  Mt 3:17; Jn 5:32; 8:18Ma o Tita, i ra i tulu ru iau urin, i sa wasiso talapor taru un iau. Ka mot longoro in nalngano, ma ka mot tama tari kai in matano. 38 Ma ka mot utur ukai anun a wasiso una kum balamot, uni ka mot nurnur un o naro ra di tulu ru i urin. 39  Lk 24:27Mot ser luki ut a Buk Tabu, uni mot nuki lena mot in los a nilaun tukum uni. Ikut a Buk Tabu kai i wasiso ut un iau! 40 Ikut, mot a kum te Juda, ka mot nem na wan torom iau sur mot in los a nilaun.
41 “Ka ling sur a taro det in ulabo pas iau. 42 Ikut a tasman mot ut lena, ka mot nem o God nama balamot mulus. 43 A wanpat nama risan o Tita, ma ka mot gas pas iau. Ikut ra taio gisen in nanpat nama risano ut, i ra, mot in gas pasi.
44 “Mot, mot nemi sur a taro det in ulabo pas mot, ikut a wasiso na ululabo anun o God, i ra ara God sot kut, ka mot tiktikin wakak suri. I mo ra ka mot nurnur un iau. 45 Gong mot nuki lena iau an takun mot torom o Tita, awu. O Moses ra mot nurnur uni lena in warut mot, i ut in takun mot. 46  Ap 3:22Ra gunuk mot nurnur un o Moses, mot in nurnur utkai un iau, uni anun a kum tumtumus i wasiso ut un iau. 47 Ikut ka mot nurnur una kum tumtumus anun o Moses, ra mot in nurnur pepetlai una anung a kum wasiso?”

*5:3-4: Una ramano kum du buk una wasiso Grik, a ramano kum wasiso kai i kis una vers ri. I lenri: Det kis langlang sur a danim ra in tonton. A ramano kum du bung, a ensel anun a Labino in nan pirso utiro una kabopolo ra, ma in utontoni. Osi kut ra in rurus mugu una kabopolo una du bung ra i tonton, in langolango mut gusun anun a misait.

5:8: Mt 9:6

5:10: Neh 13:19; Jer 17:21

5:18: Mt 26:4; Jn 7:1; 10:30

5:19: Jn 5:30

5:22: Jn 5:27; Ap 10:42

5:23: Pil 2:10-11; 1 Jon 2:23

5:24: Jn 3:15-18

5:28: Dan 12:2; Mt 16:27; Ap 24:15

5:30: Jn 5:19; 6:38

5:36: Jn 3:2; 14:11

5:37: Mt 3:17; Jn 5:32; 8:18

5:39: Lk 24:27

5:46: Ap 3:22