13
A wasiso elelar una tene minarut
(Mk 4:1-9; Lk 8:4-8)
Una bung ra, o Iesu i pirso gusun a rumu ra i wan ma i kis tiro una usalin ina du tasi Galili. Lk 5:1-3A labino kunur na taro det tur talilis pasi. Ra i kas una pot ra i kis taru uni, ma a taro rop det tur nago korot una usalin. I wasiso torom det una susut na utna nama kum wasiso elelar. I watungi lena, “A tene minarut i wan sur in sapro a kum pitino wit. Ra i sapro nanan a kum pitino wit, a ramano det puku una kisapi, ra a kum piko det ro pat ma det wan ru i. A ramano kai det puku una nubual na watat, ra kalako susut na piso uni. Det lubung pat lakit, uni a piso ke but. Ikut ra a suan i sisio pat, i rang det ra det main ma det marang rop, uni kalako wakakorin det. A ramano kum pitino wit det puku epotor una kum kuikui, ra a kum kuikui det lubung ma det rau bat pas det. Ikut a ramano kum pitino kai det puku una wakak na piso ra det wu. A ramano det wu ara mar na windet, a ramano kai a wonom na noino, ma a ramano a tulu noino. Osi ra arin talngano kura, i wakak sur in longoro nami.”
A kibino ra o Iesu i wasiso nama kum wasiso elelar
(Mk 4:10-12; Lk 8:9-10)
10 Anun a kum nat na ususer det wan toromi ma det tingi lena, “Sur asau ra u ususer a taro nama kum wasiso elelar?” 11 Ma i balu det lena, “O God i sa pitar tar a mananos tamot, sur mot in talapor una kum wasiso na pidik una matanitu tagisapat una langit. Ikut, ke pitari torom a taro rop. 12  Mt 25:29; Mk 4:25; Lk 8:18; 19:26Uni osi ra i pam ukai a mananos uni, din tabor meleti nama labino, ma in mananos bing. Ma osi ra ke pam ukai tu mananos uni, din rakon ru i utkai asau lik ra kura i pam ukai i. 13 A ususer det nama kum wasiso elelar, uni
det tamtama ma det tamtama, ikut ka det tama lele i,
det longoro ma det longoro, ikut ka det longoro lele i, ma ka det tasmani.
14  Jn 12:40; Ap 28:26-27A wasiso na poropet anun o Aisaia i sa sot un det, ra i watungi lena,
‘Mot in longoro ma mot in longoro, ikut ka mot in longoro lele i,
mot in tamtama ma mot in tamtama, ikut ka mot in tama lele i.
15 Uni a balan a taro ri i dekdek,
ma a taltalngan det i kutkut,
ma a matmatan det i pulu.
Ra gunuk det in tamtama lele nama matmatan det,
ma det in longoro lele nama taltalngan det,
ma det in tastasman nama nuknukin det,
sako det in tupukus torom iau, ma iau ut, an ulaun pas det.’ Ais 6:9-10
16  Lk 10:23-24Ikut mot, mot dan, uni mot tamtama ut nama kum matmata mot, ma mot longlongoro ut nama kum taltalnga mot kai. 17 A inanos mot nama lingmulus, numugu a susut na poropet ma a susut na tene tokodos det kalkal doko sur det in tama a kum utna ri a pami umatamot, ikut ka det tama i. Ma det kalkal doko kai sur det in longoro a kum utna ri mot longoro i, ikut ka det longoro i.
O Iesu i palos a kukurai ina wasiso elelar ina tene minarut
(Mk 4:13-20; Lk 8:11-15)
18 “Mot in longoro a kukurai ina wasiso elelar ina tene minarut. 19 Osi ra i longoro a wasiso una matanitu tagisapat una langit, ma ke mananos uni, i elar nama kum pitino wit ra det puku una kisapi. A Laulau na Musano i wanpat ra i rakon ru a wasiso ra di sa marut tari unin balano. 20 Ma a kum pitino ra det puku una nubual na watat, det elar nama musano ra i longoro a wasiso, ra uniutra, i pam ukai i nama gasgas. 21 Ikut a wasiso ke kis unin balano, ma a musano ra ken tur suano i, elar namin wit ra kalako wakakorino. I turpasi i wakak, ikut in puku lakit una du bung ra a kum mamaut in nanpat, ma din ban laulau i, uni i nurnur una wasiso anun o God. 22  Lk 12:16-21; 1 Tim 6:9-10, 17A kum pitino ra det puku epotor una kum kuikui, i elar nam ara musano ra i longoro a wasiso, ikut a labino nuknuk sur a wakak na kinkinis nin upiso, ma a kum usobor tagun a kum ululeng taginin una rakrakon bual, i rau bat a wasiso anun o God, ra ke wu lako wino. 23 Ikut a kum pitino ra det lubung sapat una wakak na piso, det elar nam ara musano ra i longoro a wasiso, ma i mananos uni. In wu ara mar, o a wonom na noino, o a tulu noino wino.”
A wasiso elelar una wit ma a karapa
24 O Iesu i watung ara wasiso elelar bulung torom det lena, “A matanitu tagisapat una langit i elar nama musano ra i sapro a kum wakak na pitino wit una nun a kinobot. 25 Ra a taro det inep, anun a ebar i wanpat ra i sapro tar a kum pitino karapa ubalan a kum wit, ra i wan. 26 A pitino wit i lubung pat ma i ling na wu, ra di tama i utkai a karapa i lubung ubalano. 27 A kum tultul anun a taman a kinobot det wan toromi, ma det watungi tano lena, ‘Labino, pepetlai, a kum wakak na pitino wit rop kut, ra u sapro tari una num a kinobot? Tagai kai a kum karapa?’ 28 I balu det lena, ‘A ebar i pam a petutna ra.’ Ra det tingi lena, ‘U nemi sur met in nan, ma met in gat rop ru det?’ 29 I turbat det lena, ‘Gong munung, sako mot in gat tomo ru i nama kum wit. 30 Madek ru i, det in lubung tomo tuk una kalang na pasong. Una bung ra, an watungi tan a kum tene pasong lena: Mot in rakon mugu ru a kum karapa, mot in ker tomo tar a kum kimkibino sur din tun ru det una sungun. Ra numur mot in los tomo i bulung a kum wit una nung a rumu na ululeng.’ ”
A wasiso elelar unin pitino mastad ma a is
(Mk 4:30-32; Lk 13:18-21)
31 O Iesu i watung ara wasiso elelar bulung tandet lena, “A matanitu tagisapat una langit i elar namin pitino mastad, ra ara musano i los pasi, ma i marut tari una nun a kinobot. 32 I natino taun a kum pitino duwai rop, ikut ra i lubung, i labo taun a kum duwai na inangon rop. Ma a kum piko det ser pam pios una kum kanokano.”
33 O Iesu i watung ara wasiso elelar bulung tandet lena, “A matanitu tagisapat una langit i elar nama is, ra ara ino i rakon pasi, ma i pam tomo tari nama labino palawa, ra a palawa rop i mubus nami.”
34 O Iesu i ususer a kunur na taro nama kum wasiso elelar, ma ke wasiso torom det nam tu se wasiso, a wasiso elelar rop kut. 35 I watungi lenra sur din pam sot pas a wasiso anun a poropet lena,
“An wasiso nama kum wasiso elelar,
an watung a kum utna ra i kis eno, turpasi numugu utmakai, ra o God i ukis a rakrakon bual.” Sng 78:2
O Iesu i palos a kukurai ina wasiso elelar una wit ma a karapa
36 Numur o Iesu i wan gusun a kunur na taro, ra i ruk una rumu. Anun a kum nat na ususer det ruk toromi ma det inanosi lena, “Un palos a kukurai ina wasiso elelar ri tamet una karapa ra i lubung ubalan a kinobot.” 37 I balu det lena, “O naro ra i sapro a kum pitino wit i a Nutun a Musano. 38 A kinobot, i a rakrakon bual, ma a kum wakak na pitino wit, det a taro tagun a matanitu tagisapat una langit, ma a kum karapa, det a kum nutnutun a Laulau na Musano, 39 ma a ebar ra i sapro det, i o Satan. A kalang na pasong, i a ururop ina rakrakon bual, ma a kum tene pasong, a kum ensel. 40  Jn 15:6A kum tene pasong det los tomo a kum karapa ra det tun ru det una sungun. In lenkutkai ra din pami una ururop ina rakrakon bual. 41  Mt 24:31; 25:31; Mk 13:27A Nutun a Musano in tulu ru anun a kum ensel, ma det in rakon rop ru a kum utna ra i ben raro a taro, ma det kai ra det ser pam a sakino. 42  Mt 8:12Ma det in woro det una labino sungun. Det in tangtangis ma det in ungingit lokondet iai. 43  Dan 12:3Ma a kum tene tokodos det in sisio elar namin nusuan una matanitu anun a Tamandet. Osi ra arin talngano kura, i wakak sur in longoro nami.
A wasiso elelar una utna ra a matano i ka
44 “A matanitu tagisapat una langit i elar nama utna ra a matano i ka doko, ra di munu tari una kinobot. Ma ara musano i sio pasi ma i munu melet tari. Ra i wan nama gasgas, ma i siuru rop ru anun a kum utna, ra i kul pas a kinobot ra nami.
45 “A matanitu tagisapat una langit i elar kai nam ara tene siuru, i sisio sur a kum wat kura ubalan a kabokabol, ra a matandet i ka. 46 Ra i sio pas ara wat ra a matano i ka doko, i siuru rop ru anun a kum utna, ma i kul pas a wat ra nami.
A wasiso elelar una uben
47 “A matanitu tagisapat una langit i elar kai nama uben, ra di woro tari sa utasi, ma a wur ngas na kiripo det iru taru uni. 48 Ra i bukus a uben, a kum tene woro uben det dat mamaso tari una usalin. Det kis ra det timilo ru a kum kiripo utiro una kum rat, ma a kum laulau ino det woro ru det. 49 Una ururop ina rakrakon bual din pami ut lenri: A kum ensel det in nanpat ma det in isuaro ru a kum tene sakino gusun a kum tene tokodos. 50  Mt 13:42; Lk 13:28Ra det in woro ru a kum tene sakino una labino sungun. Det in tangtangis ma det in ungingit lokondet iai.
51 “Pepetlai, mot sa mananos una kum kukurai ina kum utna rop ri, o awu?” Anun a kum nat na ususer det balu i lena, “Ma! Met sa tasmani.” 52 Ra o Iesu i watungi tandet lena, “I mo ra a kum tene ususer rop tagun a Warkurai, ra det sa ususer pas una matanitu tagisapat una langit, det elar nam ara musano ra i uleng a kum wakak na utna una nun a rumu. Ra i upirso a kum wakak na utna ra, gusun anun a rumu sur in papam nami, a ramano kum utna, a kum matokino, ma a ramano kai, a kum turaino.”
A poropet ra ka di ru i
(Mk 6:1-6; Lk 4:16-30)
53 Ra o Iesu i sa watung rop tar a kum wasiso elelar ri, i wan tagitiro iai, 54  Jn 7:15ra i wanpat una nun a tamon, tong o Nasaret. I turpasi sur in ususer a taro tiro una nundet a rumu na lotu, ma det kisin doko ra det watungi lena, “A musano ri i los a mananos tagai? Ma tagai kai a dekdek ra i pam a kum utna na ukisin ri nami? 55  Jn 6:42O Tamano a tene pam rumu kut, ma o nano o Maria. A kum tistisino kai, o Jems, o Josep, o Saimon ma o Judas 56 ma a kum bunu kai ano kuri ut dat laun tomo nin. Ma tagai a dekdek ra a musano ri i pam a kum utna ri nami?” 57  Jn 4:44Ra ka det nemi ut mo. Ra o Iesu i watungi tandet lena, “Di ser ru a poropet una kum se tamon, ikut det ut una nun a tamon ma anun a rumu ka det ru i.” 58 Ra ke pam lako susut na utna na ukisin tiro iai, uni ka det nurnur uni.

13:2: Lk 5:1-3

13:12: Mt 25:29; Mk 4:25; Lk 8:18; 19:26

13:14: Jn 12:40; Ap 28:26-27

13:16: Lk 10:23-24

13:22: Lk 12:16-21; 1 Tim 6:9-10, 17

13:40: Jn 15:6

13:41: Mt 24:31; 25:31; Mk 13:27

13:42: Mt 8:12

13:43: Dan 12:3

13:50: Mt 13:42; Lk 13:28

13:54: Jn 7:15

13:55: Jn 6:42

13:57: Jn 4:44