22
A wasiso elelar una lukaro na unolin
(Lk 14:15-24)
O Iesu i wasiso melet torom det nama wasiso elelar lenri, “A matanitu tagisapat una langit i elar nama king ra i sa waninar tar a lukaro na unolin sur o nutunu, a musano. Ra i tulu ru anun a kum tultul torom det, ra di sa inanos mugu tar det, sur det in ben pas det sur a lukaro. Ikut det putut rop kut. I tulu ru i bulung anun a ramano kum tultul gisen nama wasiso lena, ‘Mot in inanos det ra di sa inanos mugu tar det lena, “A sa waninar rop tar a utna na inangon. A sa um doko tar a kum bulumakau ma a kum matok na butbut na bulumakau, a kum utna i sa waninar rop. Mot in nan urin una lukaro na unolin.” ’
“Ikut ka det tarom, det wan gisgisen kut. Ara i wan sur anun a du piso, ara kai sur anun a rumu na siuru. Mt 21:35Ma ara taro kai ra di wan sur det, det pam ukai pasi kut a kum tultul, ma det ban laulau det ma det um doko det. A king ra, in balano i sungun doko, i tulu ru anun a taro na inaim, ra det um doko ru a kum tene umum doko taro ra, ma det tun ru anundet a tamon.
“I watung meleti tan anun a kum tultul lena, ‘Di sa waninar tar a lukaro na unolin, ikut det ra di sa inanos mugu tar det, ka det tokodos sur det in kis una lukaro. Mot nan una kum kisapi ma osi ra mot in etoromi, mot in inanosi lena in nan urin sur a lukaro.’ 10 Ra a kum tultul det wan una kum kisapi, ma det ben tomo det rop ra det etorom det, a kum sakino taro ma a kum wakak na taro kai, ma a lukaro na unolin i bukus nam det.
11 “Ra a king i ruk sur in tama a taro, i tama torom pas ara musano ra ke emar nam tin namalu na lukaro na unolin. 12 Ma i tingi lena, ‘Le, u ruk lai taru urin? Uni ka tin namalu na lukaro na unolin anum.’ A musano ra ke balu i. 13  Mt 8:12; 25:30; Lk 13:28Ra a king i watungi tan anun a kum tultul lena, ‘Mot in ker pas aru kikino ma aru lamano ma mot in woro pirso ru i unago utamon una dumirum. Tiro iai di tangtangis ma di ungingit lokondi iai.’
14 “Di sa kabo pas a susut, ikut di pilok pas a pak na taro kut.”
A iting una takis
(Mk 12:13-17; Lk 20:20-26)
15  Mk 3:6Numur a kum Parisi det wan tomo taru, ra det epak pas lena det in lar o Iesu sur tu wasiso anunu, sur det in takuni nami. 16 Det tulu ru anundet a kum nat na ususer tomo nama kum paspasan o Erod torom o Iesu, ma det watungi lena, “Tene Ususer, met tasmani lena ui a tokodos na musano, ma u ser ususer a taro una kisapi anun o God nama lingmulus. Ko nuknuk bing un asau ra a taro det watungi un ui, uni a magiram i takai kut torom a taro rop. 17 Un inanos met, asau a nuknukim? I tokodos sur din pitar a takis torom a Sisa* A Sisa i a labino mugumugu tagun a gapman Rom, ma a taro Israel kai det kis utuntudu in anun a warkurai. o awu?”
18 Ikut, o Iesu i tasmani lena, a nuknukin det i laulau, ra i watungi tandet lena, “Mot a kum tene torotoro, ilai ra mot nemi sur mot in lar iau? 19 Mot in ese iau nam tu mani na takis.” Ra det pitar tar a mani tano. 20 Ma i ting det lena, “In masarin osi ri, ma a tumtumus ri uni anun osi?” 21  Rom 13:7Det balu i lena, “Anun a Sisa.” Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.” 22 Ra det longoro i, det kisin doko ma det wan gusuni.
A iting una nilaun melet gusun a minat
(Mk 12:18-27; Lk 20:27-40)
23  Ap 23:8Una bung ut ra a kum Sadusi, ra det ser ipul kut lena katu nilaun melet gusun a minat, det wan torom o Iesu, ma det tingi lena, 24  Lo 25:5“Tene Ususer, o Moses i watungi lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino ra i sa mat. 25-26 Ara kabo tisino, a wonom mawit na musano det, det kis epotor tamet. A mugano i nolin, ra i mat pas gusun anun a ino, ma katu nutunder. Ra a murmur tano bulung i nolin nama ino ra, ma i bulung i mat kut gusuni. Numur a mantul nami bulung. Ra i lenra torom a wonom mawit, det rop det nolin pas nami, ikut katu nutun tu pasandet. 27 Ra numur a ino bulung i mat.
28 “Una nilaun melet gusun a minat, a ino ra, anun osi na pasandet mo tagun a wonom mawit ra? Uni det rop det sa nolin pas nami.”
29 O Iesu i balu det lena, “Mot raro doko, uni ka mot tasman a Buk Tabu ma a dekdekin o God kai. 30 Una nilaun melet gusun a minat, ka det in nolin melet mo, det in elar mukut nama kum ensel sapat una langit. 31 Ra mot ipul lena a kum minat ka det in katutur melet gusun a minat, pepetlai, ka mot luki utmakai a wasiso ra o God i sa watung tari tamot? I watungi lena, 32  Mt 8:11‘Iau a God anun o Abaram, a God anun o Aisak ma a God anun o Jekop O Abaram, o Aisak ma o Jekop detul mat, ikut a wasiso ri i ese i lena, uniri detul laun..’ Kis 3:6
O God awu sur a God anun a kum minat, i a God anundet ra det laun.” 33 Ra a kunur na taro det longoro i, det kisin doko una nun a ngas na etowo.
A warkurai ra i labo sakit
(Mk 12:28-34; Lk 10:25-28)
34 A kum Parisi det longoro i lena, o Iesu i sa duku sot pas a kum Sadusi, ra det wan tomo toromi. 35 Ma ara pasandet, a tene mananos tagun a Warkurai, i lari nama iting lena, 36 “Tene Ususer, asi na warkurai ra i labo sakit taun det rop?” 37 Ma i balu i lena, “ ‘Un nem a Labino anum a God namin balam rop, a niom rop, ma a nuknukim rop.’ Lo 6:5
38 A warkurai ri i labo sakit tandet rop, ma i a mugano warkurai. 39  Mt 7:12Ma iri i a manru na warkurai, ra i ling na elar nami, ‘Un nem o pasam elar nami ra u nem ui ut.’ Wkp 19:18
40  Rom 13:10; Gal 5:14Aru warkurai ri, der a kimkibin a kum wasiso na Warkurai rop anun o Moses ma a kum etowo anun a kum poropet.”
A Karisito i a Labino anun o Dewid
(Mk 12:35-37; Lk 20:41-44)
41 Ra a kum Parisi det kis tomo, o Iesu i ting det lena, 42  Jn 7:42“Asau ra mot nuki una Karisito? I a nutun osi?” Det balu i lena, “A nutun o Dewid.” 43 O Iesu i watungi tandet lena, “Ra i lenra, ilai ra a Tokodos na Nion i mugu o Dewid ra i watung a Karisito lena ‘anung a Labino’? Uni o Dewid i watungi lena,
44  Mt 26:64‘A Labino i watungi torom anung a Labino lena,
“Un kis una papor sot na lamang,
tuk ra an winim pas anum a kum ebar
sur det in kis utuntudu in anum a warkurai.” ’ Sng 110:1
45 O Dewid i watung a Karisito lena, i anun a Labino. Ra i lenra, der tamano pepetlai?” 46 Ma kataio i nuk pas tu wasiso melet sur in balu i nami. Turpasi una bung ra, kataio melet mo i wan toromi nam tu iting, uni det ngara.

22:6: Mt 21:35

22:13: Mt 8:12; 25:30; Lk 13:28

22:15: Mk 3:6

*22:17: A Sisa i a labino mugumugu tagun a gapman Rom, ma a taro Israel kai det kis utuntudu in anun a warkurai.

22:21: Rom 13:7

22:23: Ap 23:8

22:24: Lo 25:5

22:32: Mt 8:11

22:32: O Abaram, o Aisak ma o Jekop detul mat, ikut a wasiso ri i ese i lena, uniri detul laun.

22:39: Mt 7:12

22:40: Rom 13:10; Gal 5:14

22:42: Jn 7:42

22:44: Mt 26:64