6
A taro Nasaret ka det nurnur un o Iesu
(Mt 13:53-58; Lk 4:16-30)
O Iesu tomo nam anun a kum nat na ususer det wan tagitong o Kapernaum, ra det wanpat tong o Nasaret, a tamon anun o Iesu. Jn 7:15Una Bung na Sabat, i turpasi sur in ususer a taro tiro una rumu na lotu. A susut na taro ra det longoro i, det kisin doko, ra det watungi lena, “A musano ri i tasman lan a kum utna ri? A ngas na mananos sau ri di pitari tano, ra i pam a kum lamlabino utna na ukisin nami? I a tene pam rumu kut, o nutun o Maria. A kum tistisino kai, o Jems, o Josep, o Judas ma o Saimon, ma a kum bunu kai ano kuri ut dat laun tomo nin.” Ra a taro ka det nemi ut mo.
Jn 4:44O Iesu i watungi tandet lena, “Di ser ru a poropet una kum se tamon, ikut det ut una nun a tamon, a kum kukunu ma det kai una nun a rumu ka det ru i.” O Iesu ke pam lar pas lako susut na utna na ukisin tiro iai, ikut i ubek aru lamano una pak na misait, ra i ulangolango pas det. I kisin, uni ka det nurnur uni.
O Iesu i tulu ru a noino ma aru nat na ususer
(Mt 10:5-15; Lk 9:1-6)
Numur o Iesu i wan nanan una kum tamon, ra i ususer a taro. I kabo pas a noino ma aru nat na ususer, ra i tulu ru det aruru, ma i pitar a dekdek tandet sur det in lakro ru a kum laulau na nion. Lk 10:4-11I watungi tandet lena, “Gong mot los tu utna una numot a inawan, mot in losi kut in nubuku. Gong mot los lako utna na inangon, gong tu rat ma gong mot silapo tu mani una numot a kum malu. Mot in pas aru su, ikut gong mot los tar tin namalu na kelkeles. 10 Ra mot in nanpat tiro un tu rumu, mot in kis ut tiro iai tuk una bung ra mot in nan gusun a tamon ra. 11  Ap 13:51Ra a taro tagun tu tamon ka det in gas pas mot, ma ka det in longoro anumot a wasiso, ra mot in nan gusun a tamon ra, mot in tang ru a kubus gusun a kikimot. Mot in tang ru a kubus sur a ukinalong na utumarong torom det* A ukinalong ra a kum Parisi det ser muri, ra det wan gusun a nubual anun a taro ra awu sur a kum te Juda. Iri a utumarong torom det ra det rosumur gusun a wasiso anun o God..”
12 Ra det wan ma det warawai torom a taro, sur det in nukpukus. 13  Jem 5:14Ma det lakro ru a susut na laulau na nion, ma det talus a susut na misait nama wel, ma det ulangolango pas det.
O Erod i nuki lena o Iesu i o Jon a Tene Baptaiso
(Mt 14:1-2; Lk 9:7-9)
14  Mt 16:14; Mk 8:28; Lk 3:19-20O king Erod i longoro a wasiso un o Iesu, uni a taro rop det sa tasmani. Ara taro det watungi uni lena, “A musano ra, i o Jon a Tene Baptaiso, i sa laun melet gusun a minat. I mo ra, i pam a kum utna na ukisin.” 15 Ara taro kai det watungi un o Iesu lena, “I, a poropet Elaija.” Ara taro kai det watungi uni lena, “O Iesu, i ara poropet elar nama kum poropet tagun numugu.” 16 O Erod i longoro a kum wasiso ri un o Iesu, ra i lena, “A sa tau kutus ru tar in kabaran o Jon, ra uniri i sa laun pat melet gusun a minat!”
O Erod i itula sur din tau kutus in lorin o Jon a Tene Baptaiso
(Mt 14:3-12)
17-18  Wkp 18:16Numugu o Erod i tulu ru anun a kum tene inaim sur det in dat pas o Jon. Ra det sa dat pasi, det ker pasi, ma det uruk tari una karabus. O Erod i pami lenri, uni o Jon i inanosi lena, “Ke tokodos ra u nolin nam o Erodias, a urim.” I watungi lenri, uni o Erod i sa sal pas o Erodias, a ino anun o tisino, o Pilip, ra i nolin nami. 19 O Erodias i nget laulau o Jon ma i nemi sur in um doko i. Ikut ke pet lar pasi, 20 uni o Erod i ngaran o Jon ra i tamtamabati. I pami lenra uni i tasmani lena, o Jon a tene tokodos ma a musano anun o God. O Erod i gas sur in longoro anun a kum wasiso, ikut a nuknukino i ser talara nami.
21 Numur o Erodias i nuk pas ara kisapi sur din um doko o Jon. Una bung ra di ukinalong a bung na usus anun o Erod, o Erod i pam a labino inangon sur a kum mugumugu tagun anun a gapman, ma a kum mugumugu anun a kum tene inaim, ma a kum mugumugu tagitong una papor Galili. 22 Ra kura det wangon, a nutun o Erodias a ino, i ruk ra i lagor umatandet. O Erod ma a taro ra det wangon tomo nami, det gas doko nami. Numur i inanos a toraro ra lena, “Asau ra u nemi tang, an tabor ui nami.” 23 Ra i uliliman dekdek tari lena, “Asau mukut ra un saringi tang, an pitari tam. Ra un saring iau kai sur tu kukur tagun a kum utna ra a warkurai suri, an pitari ut tam.” 24 Ra i wan torom o nano ma i tingi lena, “Asau ra an saringi tano?” O nano i balu i lena, “Un saringi sur in lorin o Jon a Tene Baptaiso.” 25 Uniutra, a toraro ra i wan lakit torom a king, ra i watungi tano lena, “Uniutri, un tabor iau namin lorin o Jon a Tene Baptaiso un tu pelet.”
26 A king i tupunuk doko. Ikut ke nemi mo sur in ipul, uni i sa uliliman tari lena, asau mukut ra in saringi tano in tabori ut nami, ma a taro ra det kis tomo nami una inangon, det sa longoro tar anun a wasiso. 27 Uniutra, i tulu ru a tene inaim sur in los tar in lorin o Jon toromi. A tene inaim i ruk una rumu na karabus, ra i tau kutus pas in kabaran o Jon. 28 I ubek pas in lorino una pelet, ra i pitari torom a toraro, ra i bulung i pitari torom o nano.
29 A kum nat na ususer anun o Jon det longoro i, ra det wan ma det los pas a minatino, ma det uruk tari una kulam na minat.
O Iesu i tabor a limo na arip na musano
(Mt 14:13-21; Lk 9:10-17; Jn 6:1-14)
30  Lk 10:17A kum aposel det kis tomo nam o Iesu, ra det inanosi una kum utna rop ra det sa pam tari, ma det sa ususer tar a taro kai nami. 31 Ra o Iesu i watungi tandet lena, “Dat in nan sur tu nubual kalako taro uni, sur mot in mana pas.” I watungi lenri, uni a susut na taro det wanpat liklik kut, ma katu du bung sur o Iesu tomo nam anun a kum aposel det in nangon uni. 32 Ra det kut, det kas una pot ra det wan sur a nubual kalako taro uni.
33 A susut na taro ra det tama det ra det soi, det tama lele pas o Iesu tomo nam anun a kum aposel. Det kalabor gusun a kum tamon ra det mugu pat una nubual ra o Iesu det in sot iai. 34  Nam 27:17; Mt 9:36Ra det sot, o Iesu i tama a labino kunur na taro. I maris doko det, uni det elar mukut nama kum sipsip ra katu tene tamtamabat anundet. Ra i turpas a towo det nama susut na utna.
35  Mk 8:1-9Ra i sa lirop, anun a kum nat na ususer det wan toromi, ra det inanosi lena, “A nubual ri i bakbak gusun a kum tamon, ma i sa lirop kai. 36 Un tulu ru a taro sur det in nan sur a kum natnat na tamon milau, ma a kum lamlabino tamon kai. Det in kul pas lako utna sur det in nani.” 37 O Iesu i balu det lena, “Mot ut mot in tabor det.” Det watungi tano lena, “Kalako ru mar na denaria Anundet a mani det ser watungi nama denaria. Ara denaria i elar nama ikul anun ara musano una ra bung na pinapam. sur dat in kul tabor det nami.” 38 Ra o Iesu i ting det, “Lako isin beret kura mot losi? Mot in nan ma mot in tamtama.” Ra det sa tama tari, det inanos o Iesu lena, “A limanin beret kut ma arin kiripo kai kuri met losi.”
39 Ra o Iesu i tulu anun a kum nat na ususer sur det in tibo susuaro a taro sur det in kis unin wuliso. 40 A ramano det kis arara mar, ma a ramano kai a limlimo na noino.
41 Ra o Iesu i los pas a limanin beret, ma arin kiripo, i tamtama usapat una langit, i watung wakak pas torom o God uni, i tibik a limanin beret, ra i pitari tan anun a kum nat na ususer sur det in tibo a taro nami. I tibo det rop kai nam arin kiripo. 42 Det rop det wangon ma det masur. 43 Numur det song bukus pas a noino ma aru rat nama beret ma a kiripo ra det wangon kopos pas uni. 44 A kunur na taro ra det wangon, a niluluk ina kum musano sot kut i elar nama limo na arip.
O Iesu i wan sapat netes una tasi
(Mt 14:22-23; Jn 6:15-21)
45 Uniutra, o Iesu i tulu ru anun a kum nat na ususer, sur det in kas una pot, ma det in mugu utong o Betsaida una ara papor tasi. Ma i, i kis utmakai sur in tulu ru tar a taro. 46  Lk 5:16Ra i wan gusun det, i wan tito usapat una tangai sur in wararing. 47 Ra i sa lirop matano mirum, a pot i sa wan potor una du tasi, ma o Iesu mukut i kis nago una usalin. 48 I tama det ra i sa tekes det a ulusu, uni a wuwu i waim tagisa numugu. Una lar, o Iesu i wan sapat netes una tasi torom det, ra i ling na wan sakit det. 49  Lk 24:37Det tama pasi ra i wan sapat netes una tasi, det nuki lena a nion. Ra det woiwoi, 50 uni det rop det tama i, ra det ngara doko. Uniutra o Iesu i watungi tandet lena, “A kosom taru tamot, iau kut ri. Gong mot ngara.” 51  Mk 4:39Ra o Iesu i kas torom det una pot, ra a wuwu i mana mut. Det kisin doko, 52 uni ka det tasman wakak a utna na ukisin ra o Iesu i sa pam tari una beret ma a kiripo. Uni a balandet i dekdek doko.
53 Ra det sa wan kutus un ara papor tasi, det sot tiro una papor Genesaret, ra det ega tar a pot. 54 Det sirok gusun a pot, ra uniutra, a taro det tama lele pas o Iesu. 55 Det kalabor una kum tamon una papor ra, sur det in los a kum misait torom o Iesu. Det los det una kum lu utiro toromi, un asi na tamon ra det longoro i lena, kura i iai. 56 O Iesu i wan utiro una kum natnat na tamon ma a kum lamlabino tamon kai, ra a taro det los pat a kum misait ma det inep det tiro una nubual ra a taro det ser wan tomo uni. A kum misait det saringi sur det in pami kut a sinisir ina nun a saket. Ra det rop ra det pami, det langolango mut.

6:2: Jn 7:15

6:4: Jn 4:44

6:8: Lk 10:4-11

6:11: Ap 13:51

*6:11: A ukinalong ra a kum Parisi det ser muri, ra det wan gusun a nubual anun a taro ra awu sur a kum te Juda. Iri a utumarong torom det ra det rosumur gusun a wasiso anun o God.

6:13: Jem 5:14

6:14: Mt 16:14; Mk 8:28; Lk 3:19-20

6:17-18: Wkp 18:16

6:30: Lk 10:17

6:34: Nam 27:17; Mt 9:36

6:35: Mk 8:1-9

6:37: Anundet a mani det ser watungi nama denaria. Ara denaria i elar nama ikul anun ara musano una ra bung na pinapam.

6:46: Lk 5:16

6:49: Lk 24:37

6:51: Mk 4:39