8
O Iesu i tabor a wat na arip na musano
(Mt 15:32-39)
Mk 6:34-44Ara bung ubalan a kum bung ra, a labino kunur na taro det wanpat tomo, ma kalako utna na inangon sur det in nani. O Iesu i kabo pas anun a kum nat na ususer toromi, ma i watungi tandet lena, “A maris doko a taro ri, uni det sa kis tomo nam iau nin, a tulu bung, ma kalako utna na inangon sur det in nani. Ra an tulu ru det sur anundet a kum tamon nama munurak, det in bengbeng nanan una kisapi, uni ara taro tagun det, det wan ut tagitiro bakbak.” Anun a kum nat na ususer det inanosi lena, “A nubual ri, kalako taro uni. Tagai mo lako utna na inangon sur dat in tabor det nami?” Ra o Iesu i ting det lena, “A isin beret kura mot losi?” Det balu i lena, “A wonom mawit kut.”
O Iesu i inanos a taro rop sur det in kis. I los pas a wonom mawit nin beret, i watung wakak pas uni torom o God, i tibiki ma i pitari torom anun a kum nat na ususer sur det in tabor a taro nami. Ra det pami lenutra. Det los pas a kabanin natnat na kiripo kai, ra i watung wakak pas uni, ma i pitari sur det in tibo a taro nami. A taro det wangon ma det masur. Numur det song bukus pas a wonom mawit na rat nama kum utna ra det wangon kopos pas uni. A kum ino tomo nama kum nat liklik ma a kum musano, det rop det wangon. A niluluk ina kum musano kut, i elar nama wat na arip. Ra numur o Iesu i tulu ru det. 10 I kas pas una pot tomo nam anun a kum nat na ususer, ma det wan sur a papor Dalmanuta.
A kum Parisi det ting o Iesu sur in pam tu ukinalong
(Mt 16:1-4)
11 A kum Parisi det wanpat torom o Iesu, ma det wasiso na engaras tomo nami. Det ling sur det in lari. Ra det saringi sur in pam tu ukinalong sur in ese i lena, i tagisapat una langit. 12  Mt 12:39; Lk 11:29O Iesu i taramo a mamaut ma i rungasotuk, ra i watungi lena, “Ilai ra a taro tagun uniri, det tamtama sur tu ukinalong? A inanos mot nama lingmulus, ka din pam tu ukinalong torom mot.” 13 Ra i kas melet una pot, ra i wan gusun det utong un ara papor tasi.
A utumarong una is anun a kum Parisi ma anun o Erod
(Mt 16:5-12)
14 A kum nat na ususer det dumano i sur det in los lako beret. In tekene sot kut ra det losi tomo nam det una pot. 15  Lk 12:1Ra o Iesu i utumarong det lena, “Mot in tumarong una is anun a kum Parisi, ma anun o Erod.” 16 Ra det wasiso tomo una kukurai ina wasiso anun o Iesu, ra det lena, “I watungi lenra uni ka dat los lako beret.” 17  Mk 6:52O Iesu i tasman anundet a wasiso ra i watungi tandet lena, “Ilai ra mot wasiso lena ka mot los lako beret? Pepetlai ka mot mananos ma ka mot talapor utmakai? Pepetlai, a balamot i dekdek? 18 A kum matmata mot i kis, ikut ka mot tamtama nami. Ma a kum talngamot i kis, ikut ka mot longoro nami. Pepetlai, ka mot nuk pas asau ra a sa pam tari? 19  Mk 6:41-44Ra a tibik a limanin beret torom a limo na arip na musano, a iso rat ra mot song bukus pasi nama utna na inangon ra di wangon kopos pas uni?” Det balu i lena, “A noino ma aru.” 20 “Ma i kai, ra a tibik a wonom mawit na beret torom a wat na arip na musano, a iso rat ra mot ubukus pasi nama utna ra di wangon kopos pas uni?” Ra det balu i lena, “A wonom mawit.” 21 Ra i ting det lena, “Ka mot talapor utmakai?”
O Iesu i utamtama pas a pulu tong o Betsaida
22 O Iesu tomo nam anun a kum nat na ususer det wanpat tong o Betsaida, ra ara taro det ben pat ara pulu toromi, ma det saringi sur in ubek a lamano uni, sur in tamtama. 23 I pam a laman a pulu, ra i ben gisen pasi gusun a tamon, i ibis tar arin matan a pulu, ma i ubek aru lamano uni, ra i tingi lena, “U sa tama tu utna?” 24 A musano ra i tamtama tokodos, ra i lena, “A tama a taro det elar kut nama kum duwai ra det wan nanan.” 25 O Iesu i ubek melet aru lamano una arin matan a pulu, ra arin matano der talapor wakak maragom, ra i tama a kum utna rop. 26 O Iesu i tulu ru a musano ra, ma i watungi tano lena, “Un nan tokodos sur anum a rumu. Gong u wan ubalan a tamon.”
O Pita i wasiso talapor un o Iesu
(Mt 16:13-20; Lk 9:18-21)
27 O Iesu tomo nam anun a kum nat na ususer det wan sur a kum tamon milau o Sisaria Pilipai. Ra det wan nanan, i ting det lena, “A taro det watung iau nam osi?” 28  Mk 6:15Det balu i lena, “Ara taro det watung ui o Jon a Tene Baptaiso. Ara taro det watung ui o Elaija, ma ara taro kai det watung ui, ara tagun a kum poropet.” 29  Jn 6:68-69; Mk 9:9Ra i ting det lena, “Ma mot, mot watung iau nam osi?” Ra o Pita i balu i lena, “Ui a Karisito.” 30 Ra i turbat dekdek det sur gong det inanos tar taio nami.
O Iesu i wasiso mugu una nun a minat
(Mt 16:21-28; Lk 9:22-27)
31 O Iesu i turpasi sur in towo anun a kum nat na ususer lena, “A Nutun a Musano in taramo a susut na mamaut. A kum mugumugu, a kum lamlabino tene etabor torom o God, ma a kum tene ususer tagun a Warkurai det in rosumur gusuni ma din um doko i. Ra a tulu bung in rop, in katutur melet.” 32 A wasiso ri anun o Iesu i talapor kut. Ra o Pita i ben gisen pasi ma i turbat dekdeki. 33 O Iesu i tupukus, ma i tamtama torom anun a kum nat na ususer, ra i wasiso dekdek torom o Pita lena, “Satan, un nan unago numur tang! Uni u muri kut a nuknukin a taro, ma ko mur a nuknukin o God.”
34  Mt 10:38-39; Lk 14:27O Iesu i kabo pas a kunur na taro tomo nam anun a kum nat na ususer toromi, ma i watungi tandet lena, “Ra taio i nemi sur in mur iau, gong i mur a nuknukino. In los pas anun in nanai kutus ma in mur iau. 35 Osi ra i maris bat anun a nilaun, in iru, ikut osi ra ke maris bat anun a nilaun uni i tagun iau ma a Wakak na Wasiso, in laun. 36 Osi ra in utur ukai a kum ututna rop taginin una rakrakon bual, ma a niono in iru, in wakak pepetlai toromi? 37 In kul keles a niono nama sau? 38  Mt 10:33A taro tagun uniri, anundet a nilaun i bakbak gusun o God, ma det a kum tene pam sakino. Osi ra in maimai un iau ma una nung a kum wasiso epotor tan a taro ri, a Nutun a Musano kai in maimai uni, ra in nanpat tomo nama kum ensel anun o Tamano ma a minamar anun o Tamano.”

8:1: Mk 6:34-44

8:12: Mt 12:39; Lk 11:29

8:15: Lk 12:1

8:17: Mk 6:52

8:19: Mk 6:41-44

8:28: Mk 6:15

8:29: Jn 6:68-69; Mk 9:9

8:34: Mt 10:38-39; Lk 14:27

8:38: Mt 10:33