Yeso a wo ure Borewono wo mPiris me nikəwəri nisawno
8
1 Unaafase wo apuwa sa ˃tinaze, a anay, ticiye Borewono wo mPiris, awaasa ᐩucuge ne taare tine te ukpənku wo tigbama te Bore Upere sa ure ashini, 2 a wo ꞊uyane nituma ne aməmo ayaara ha nsano, uTenti wo kiwenden sa Mbaa ᐩuyane haza a bigana.
3 Kuwede bije borewono wo mpiris, ꞊akazangneke-wo wərike uyane uniyaze ne kiwaa ke binama wərike ane Ashini. Wərike nongo, ᐩakafa a Animasihu womaa, sa uciye apuwa sa uta une. 4 Gade a ne inang uren, gade wo haza upiris, wərike ˂akananke aciye haage sa ˂akayane uniyaze tantaasa uduwaka wo Mosa ᐩukuna. 5 Mpirisma ꞊ayane Ashini nituma ne ayaara ha nsano, hay sa a uwurigine sa udonkize apuwa sa are ashini. Ne agabaa sa Mosa ukuta utunki uTenti, Ashini ˂ukuyane-wo uduwama ᐩukunan kewo, <<Yane kuwede yina tantaasa ᐩndonke-bo ashini ne utaanew.>> 6 Ama saanuwa ᐩane Yeso nituma ne upiris sa nimaane unoo, tantaasa nikəwəri neen nimaane unoo, nee sa a Yeso ure bore utunna ne ntitay me agana ne Ashini. Nikəwəri neen nimaane unoo, wərike ᐩatunki nina ne apuwa sa ᐩukukone uta uyane sa amaane unoo.
7 Gade nikəwəri ne uciba ˂akadaake aciye uzira wo araa ne, gade adaake anaase ne uriya. 8 Ama Ashini ˂ukuciye agana ne uyane wo araa, hane ᐩukuna,
<<Agaba ayiyezi,
sa nta n-yane nikəwəri nisawno
ne ukura wo Isarina
ne ukura wo Yahuda,
apuwa sa ze Mbaa ᐩukuna.
9 Nizanere-wo saa nikəwəri
sa ˂nkiyane ne ncaaran meha
sa ˂nkicuwana-ha ne taare
wərike nkatte-ha uMasar,
wərike ˂akadaake apiti nikəwəri nom ne kiwenden,
hane ᐩnhangiza-ha utine,
apuwa sa ze Mbaa ᐩukuna.
10 A nikəwəri nee nta n-yane ne ukura wo Isarina
ka agaba hayen amaa,
nta nwone nduwaka mam ne aməmo iruwa yeha,
a ncaze nna ne iruwa yeha,
apuwa sa ze Mbaa ᐩukuna.
Nta nre Ashini haa,
a ha are agana ham.
11 Agana aza adome ayene-ha aruwanke haa udonkize,
baa bigi ukonen ke biruwanke bewo, <Yiyama Mbaa,>
wərike unaafase woha ata ayiyame-m,
ucuwana ke bicimibu niya ke bimənubu,
12 wərike nta nviyase-ha apuwa araa.
Nza ndome mbatiriza-m apuwa araa sa ᐩayane.>>
13 Sa Ashini ˂ukuyane anaza ha nikəwəri nisawno, ᐩukutti ne ucibaw a nikoneno. Apuwa sa are akoneha sa ꞊akonenza, ata anaa yare.