3
Si Jesus Labaw sangsa kay Moises
1 Gani, mga kabugtoan gintawag man kang Dios agud mangin anang balaan nga katawhan, panumduma gid bala ninyo ka mayad si Jesus. Hay kon nahanungud sa pagtoo nga atun ginasugid, tana kadya ang ginsugo kang Dios kag Pinakamataas nga Pari. 2 Tana masarigan gid sa pag-alagad sa Dios nga amo ang nagtugyan kana sa anang hirikoton, pareho man kay Moises anay nga masarigan sa anang pag-alagad sa bug-os nga panimalay kang Dios. *3:2 panimalay kang Dios-sa Griego, balay kang Dios.
3 Pero si Jesus tana makabig nga mas nagakabagay nga padunggan sangsa kay Moises. Indi bala nga ang manugtukod kang balay mas labi nga ginapadunggan sangsa balay nga anang ginhimo? 4 Kon may balay gani dyan, may nagtukod gid karia. Pero ang Dios amo gid tana ang manugtukod kang tanan nga butang. 5 Kag matuod gid man nga si Moises masarigan gid bilang surugoon sa paghimo kang anang hirikoton sa bug-os nga panimalay kang Dios para sa pagpamatuod kang mga butang nga igapanugid sa paraaboton. 6 Pero si Cristo tana masarigan gid sa paghimo kang anang mga katungdanan bilang Anak nga tinogyanan sa panimalay kang Dios. Kag kita amo ang panimalay kang Dios, basta nga padayon lang kita nga may pagsarig kag wara natun ginakahuya ang atun ginalauman.
Ang Kapahuwayan para sa mga Kabataan kang Dios
7 Gani, pareho kang ginakuon kang Balaan nga Ispirito nga,
“Kar-on nga adlaw, kon inyo mabatian nga nagahambal ang Dios kaninyo,
8 Indi kamo magpaawut kang inyo ulo
pareho kang ginhimo ninyo anay
nga nagbato kamo kana katong rugto kamo sa may disyerto.
Inyo gintirawan ang pasensya kang Dios kon diin gid kutub.
9 Nagkuon ang Dios, bisan pa nga nakita run nanda ang mga katingalahan
nga akun ginhimo sa sulud kang kap-atan ka tuig gintirawan pa gid ako kang inyo mga kaulangan.
10 Amo ria nga naugut gid ako sa henerasyon nga to kag nagkuon ako nga
‘pirme lang sanda nagaparayu kanakun kadya kag wara gid nanda mahangpi ang akun mga pamaagi.’
11 Gani nga sa akun kaugut kananda nagsumpa ako, nga
‘indi gid sanda kadya makasulud sa lugar nga akun ginatigana nga sa diin sanda makapahuway.’ ”†3:11 Mga Salmo 95:7-11
12 Mag-andam kamo, mga kabugtoan, nga wara ti bisan sin-o kaninyo nga may malain ti tagipusoon kag wara run nagatoo hasta nga magatalikod run lang tana sa Dios nga buhi. 13 Sa baylo, amo dyaay ang inyo himoon: kada adlaw maglinaygayay kamo samtang nagapabilin pa ang kahigayunan nga ginatawag kang kasulatan nga “Kadya gid nga adlaw”, agud to nga wara ti bisan sin-o kaninyo nga magpaawut kang anang ulo tungud hay nadayaan tana kang sala. 14 Hay ang matuod karia, kita tanan nagapakigbahin run kay Cristo tungud kang atun kaangtanan kana, basta nga padayonon lang natun nga mapag-un hasta sa katapusan ang una natun nga pagsarig.
15 Amo dyaay ang ginkuon kang Kasulatan:
“Kar-on nga adlaw, kon mabatian ninyo gani ang Dios nga nagahambal,
indi kamo magpaawut kang inyo ulo pareho kang ginhimo ninyo anay
nga nagbato kamo sa Dios.”‡3:15 Mga Salmo 95:7-8
16 Sin-o abi bay ang mga nakabati sa Dios nga naghambal kag nagbato kana? Indi bala ang tanan nga mga tawo nga ginpangulohan ni Moises pagwa sa Ehipto? 17 Kag sa kay sin-o bay naugut ang Dios sa sulud kang kap-atan ka tuig? Indi bala sa mga nagpakasala nga to kag nagkaramatay nga ang andang mga lawas nagkarabilin rugto sa may disyerto? 18 Kag sin-o kabay ang ginatumud kang Dios kang tana magsaad nga indi sanda kadya makasulud sa lugar nga sa diin pagapapahuwayun na sanda? Indi bala ang mga tawo nga wara magsunod kana? 19 Gani nga makita natun nga wara sanda makasulud tungud nga wara sanda magtoo sa Dios.