Leetal ya éyaañ ya eyya Saŋ naakiice ya
1 Saŋ
Waah wa weeyem wa ti leetal eyye
Aluu pakanam keeyemaam ka ti káasiitan, inci kicanaa.
Aŋe leetal ya éyaañ ya eti Saŋ. Ayme akiice leetal eyye? Akiica ya asokut akina ayem ayme, pale ti káawincinool, ínhiini unaa nii, eekiice ya leetal eyye, akina ayem Saŋ, akee ti pinapana pa pakati Yéesu. Sepete añiinoo.
Teyme naakiice leetal eyye? Leetal eyye ta neekiicee ta, hak máamun sitiil áwii ésupak (40) puwant sitiil áwii ésupak niŋ ŋaasuwan (50) pamuusal eket ya eti Yéesu Krista.
Weyme uwune leetal eyye neekiicee? Ti oom caanak, taakaataako pikalaŋana keeneetaat pánipani keeyeniye kaalincan kéeyinane ka ti Yéesu. Intaako pakakee keeyeniye lompo hífulu ti káyinan ka. Tempo Saŋ naakiice leetal eyye kati acoonanool pakan paka kati kámeyi ayme ayem éeyinane pánipani niŋ ayme ayem akalaŋana pánipani.
Saŋ naahintan waah úhaaciil ewwa efikasincan tewwo kati kámeyi man aŋe éeyinane pánipani ati Yéesu niŋ fotom akalaŋana pánipani.
1. Fo áyinanaayinan nii, Yéesu Krista ayem Añii ya ati Pútuun pa éeyenoonii ya an? Saŋ naasok nii: “an óo an eesoke nii pánipani Yéesu Krista ákeyyookey naayeno an, oom an ataakaataak Kunuu ka keenape ka kéefulii ka ti Pútuun pa. Pale an óo an eepooke nii Yéesu ákeyyookey naayeno an, oom an ataakut Kunuu ka keenape ka kéefulii ka ti Pútuun pa.” (4:2-3)
2. Fo álafilafi pakanoo ti káyinan? Eehe náayisane nii: “Uláfooliyaa, kaatuko pálafi ti Pútuun pa náafulii. An óo an éelafiye pakan, oom an Pútuun pa pupukoo, náameyi po.” (4:7-8) Asok: “An óo an eesoke nii álafilafi Pútuun pa, háati fo naanat anoo ti káyinan, oom an nincaama.” (4:20)
3. Fo átuulaatuul hilim ha hiti Pútuun pa? Asok: “An óo an eesoke nii, ámeyimeyi Pútuun pa, apan átuulut hilim etempo, oom an nincaama, ántuŋ tooñaa ya eneetaat teyoo.” (2:4)
Alaapalaka ti káasiitan ka kitaaluu, álimaati Pútuun pa púwiiniyan kunuu unaa mpípankin saan unaa kati úyiniyaa kasayan hilim etempo. Ti caacaw ca citi Yéesu Krista. Amíini.
Ⅰ
Hilim ha hiti eloŋ ya
Ⅰ Unii unka ti káatuunan aluu kiti an a eetaakiye ya kápiliŋ ti púcook pa, aŋa núusiye ya nuucukoo niŋ ñíkin unii, aŋa nuusincane ya núulikoo niŋ sipees unii. Akina ayem Hilim ha hiti eloŋ ya. Ⅱ Aŋa eeyem ya eloŋ ya náafulii; nuucukoo núuyemi keetantake ka pakateyoo, fiye núutuunan aluu kiti aŋa eeyem ya eloŋ ya eepayantoo ya. Ayenaayeno niŋ Paapaa ya náafulii toonii. Ⅲ Aŋa nuucuke ya núusi, núuyemi aluu ti káatuunan kiteyoo, ancuk aluu lompo niyeniyaa niŋ unii pakoonool samat nii fa unii nuuyem fa pakoonool niŋ Paapaa ya niŋ Añiinoo Yéesu Krista. Ⅳ Ukiicaakiic eehe ancuk utaakaa pásuuma pántoon.
Ecaaŋ ya eti Pútuun pa
Ⅴ Aŋe ayem ekooŋan ya eyya Yéesu Krista naawufane ya unii, núuyemi yo aluu ti káatuunan: Pútuun pa ecaaŋ, énimaan etaakiit tempo cántum. Ⅵ Niŋ usokaa nii unaa pakoonool niŋ Pútuun pa apan núuyemiyaa ti eloŋ eti ñáanim, kincaam nuuyaakeyaa ántuŋ uneetaataa ti eloŋ eti tooñaa. Ⅶ Pale niŋ unaa unapaa ti ecaaŋ ya, samat nii pikina fa mpiyem fa ti ecaaŋ ya, nuuyeniyaa pakoonool, hísim ha hiti Yéesu, Añii etempo, nihikuulan unaa ti umuuyen óo umuuyen. Ⅷ Niŋ unaa usokaa nii utaakutaa kaamuuyen, kincaakool faŋ unaa nuuyaakeyaa, apan tooñaa ya eneetaat ti unaa. Ⅸ Pale Pútuun pa peecoonoole, púfulantoo ti hilim etempo, niŋ uwatanooliyaa umuuyen wa utuunaa nuuluumaa po kaaponket, efipuponket umuuyen wa utuunaa mpukuulan unaa ti heenaput óo heenaput. Ⅹ Niŋ usokaa nii umuuyenutaa, hisoku nuuyaakeyaa nii Pútuun pa nincaama, hilim etempo hineetaat ti unaa.