Leetal ya éyaañ ya eepoñee ya pakati Tesalonik
1 Tesalonik
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci kicanaa.
Aŋe leetal ya éyaañ ya eepoñee ya pakati Tesalonik. Leetal eyye, ayme akiice yo? Póol apoñapoñ a akiice yo, akina niŋ Silas niŋ Timote, pákawiyoo ti páhin.
Ti pakayme Póol naakiice leetal eyye? Ti pakati canku ya eti saatee ya eti Tesalonik naakiice. Póol átuunane ekooŋan ya éesuume ya eti Yéesu Krista ti saatee eyyuu, intaak kéeyinane. Payenkuu káyenoonii canku ya eti saatee ya eti Tesalonik. Pale kamma kaakallanee kenfakat nkuwun, Póol naakatan saatee ya, peelokot akalaŋanii meemak hiti káyinan ka.
Máamun etiil puwant sitiil súsupak, Póol naapoñ Timote, áwiyoo ti páhin, apicaasincan fa canku ya neeyem fa ti íhinu ti káyinan ka kiteyii. Timote ápufulii po ápuñohoonii pe ti Póol, náacoopiyoo ekooŋan éesuume nii, kéeyinane ka kaloŋaa nkacoke ti Yéesu (3:1-10). Póol, niŋ pásiyaloo ekooŋan eyyuu naataak pásuuma penfakat, naakiicii leetal eyye apusokii kacok piliit ti káyinan ka kiteyii. Póol naasok Pútuun pa apalaka ti káyinan ka kiteyii, cíki ya eteyii niŋ pálafi pa piteyii (1:2-10), niŋ fa lompo nkasiiŋiye fa kíp nkataak pásuuma ti kaakallanee ka kiteyii (2:14-16).
Ti leetal eyye, Póol náanawunanii kiti akina faŋoo eloŋ ya eteyoo (2:1-12), naawufanii kilim enka efikasiiŋo ka tenko, kikina kiyem weyme? Asokii nii kañaŋut pihinto niŋ aal eeneetaat ateyii niŋ ekina tom áyiin eeneetaat ateyii (4:3-9). Naasokii lompo kañaŋaa piyeno píhina, nkásik kíp ínkeyyoo ti páhin (4:9-12). Naalompo ákupii kiti éñohoonii ya eti Yéesu niŋ heekaakaay ha pitaako keekete ka ti Yéesu, niŋ lompo heekaakaay ha pitaako kéeyinanut ka ti Yéesu (4:13-18; 5:9-10). Asokii káhin kata kapimemanoolo éñohoonii ya eti Yéesu (5:1-11).
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Inci Póol, Silas, niŋ Timote, ukicanaa aluu. Inci oopa ti hikiicu aluu, éyeniin ya eti kéeyinane ka keeyem ka ti saatee ya eti Tesalonik, aluu keeyem ka ti Pútuun pa Paapaa ya, niŋ ti Ateeteyo Yéesu Krista. Alímaati Pútuun pa pisampan aluu mpuwufan aluu kásuumaay.
Káyinan ka kiti pakati Tesalonik
Ⅱ Unii unka ti hisoku Pútuun pa apalaka tan óo tan hak aluu púlooŋ, nuutowo ti kaluum kitaaluu. Ⅲ Núunawuno hátikin Pútuun pa Paapaa atuunaa páhin pa pitaaluu piti káyinan ka, kata ya etaaluu eti pálafi pa niŋ kamukut ka kitaaluu kiti cíki eyya innitaake ya ti Ateeteyo Yéesu Krista.
Ⅳ Aluu pakan unii ti káyinan, úmeyimeyi nii Pútuun pa pílafilafi aluu mpimamal aluu nipiyeno pakan etempo, Ⅴ kaatuko ta núucoopii ta aluu ekooŋan ya éesuume ya, écoliyoot puu taaluu niŋ kilim lamma pale niŋ sempe lompo, Kunuu ka keenape ka nkíyisan aluu píhiini hat nii eeha nuusoke ha hiti tooñaa. Innímeyi lompo fa mpuukin fa niŋ aluu hak aluu. Ⅵ Aluu, níyipenanaa-yípenan pawenal unii niŋ piti Ateeteyo, kaatuko nisayanaasayan ekooŋan ya niŋ pásuuma empa Kunuu ka Keenape ka nkuwufane pa, háati fa néecoopii fa aluu kúnuul kenfakat. Ⅶ Fiyuu ínniyenoonii pakan payenka an naañaŋe káyipenan, ekina ewune kéeyinane ka púlooŋ pakati mah ma miti Masetoni niŋ miti Akayi kati káyipenan aluu. Ⅷ Kamma aluu, hilim ha hiti Ateeteyo hísiyiit Masetoni niŋ Akayi lamma, pale káyinan ka kiti aluu ti Pútuun pa kísiyeesi pan óo pan. Ooto utaakut waah ewwa efuupenan. Ⅸ Kaatuko poko faŋii nkakaman kawanan enka inniwanane ka unii niŋ fa ínniwunkiye fa pínaati pa nipiyeno pimiikan pakati Pútuun pa piti pánipani ya peeyem pa kaloŋa. Ⅹ Nkákup lompo fa inniyem fa ti hítuulu ékey ya eti Yéesu Añii ya ati Pútuun pa ápufulii alacana, aŋa mpílitanii ya ti eket ya, eefakane ya unaa ti káñiken ka kiti Pútuun pa keeyem ka ti ékey.