Leetal ya ésupiyenu ya eepoñee ya pakati Tesalonik
2 Tesalonik
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci neekicanaa.
Aŋe leetal ya ésupiyenu ya eepoñee ya pakati Tesalonik. Ayme akiice yo? Oonooluu eekiice ya éyaañ ya: Póol.
Teyme naakiice leetal eyye? Ta naakiice yo ta, pikee pa láaŋoolut niŋ ta éyaañ ya neekiicee ta. Póol náasi nii, páciite púsupak pitaakaataako ti pututa kéeyinane ka pakati Tesalonik:
1. Pakakee ti kéeyinane ka, kácookaacook káyinan nii, hinoom ha hiti Ateeteyo híkeyyookey, Yéesu apayaapa náañohoonii. Kincaam enkuu nkiseeñii nkiyokanii meemak. Tempo Póol naakiice ápiyisan nii, hinoom ha hiti Ateeteyo étihikey taamanta akee áyiin aŋa nkasok amuuyena ya ákeyyoot, hícump pakan nkasiiŋo kápitaakoolan Pútuun pa (2:1-12).
2. Kéeyinane ka payenka ammeya ka nii, kapookaapook páhin, kataakut haaci fo kanakan ñutumii ti pakakee. Tempo Póol náayisanii nii, kanapan eloŋ ya eteyoo nkasincan fa naaloŋe fa neyii, naasokii kacok kápihin páhin, naasokii lompo, timpi káwusen ti íhinu heenape (3:6-15).
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Inci Póol, Silas, niŋ Timote, ukicanaa aluu. Inci oopa ti hikiicu aluu, éyeniin ya eti kéeyinane ka pakati saatee ya eti Tesalonik, aluu keeyem ka ti Pútuun pa Paapaa ati unaa, niŋ Ateeteyo Yéesu Krista. Ⅱ Alímaati Pútuun pa Paapaa ati unaa niŋ Ateeteyo Yéesu Krista kasampan aluu nkawufan aluu kásuumaay.
Kíiti ya eti éñohoonii ya eti Yéesu
Ⅲ Pakanam ti káyinan, unii tan óo tan unka ti hisoku Pútuun pa apalaka kamma aluu, apan fo nuuñaŋe íhinu, kaatuko káyinan ka kiti aluu kutowaatowo ti hiyanku pihaŋ toko, te pálafi empa aluu púlooŋ ínnilafooliye pa mpíyemi ti epenano meemak. Ⅳ Ekina ewune, unii nuumaayoolo kiti aluu hátikin keeyem ka ti picanku pa piti Pútuun pa, kamma innicoke kíp ti káyinan ka kitaaluu, háati fa innicuke fa kúnuul kenfakat innikallanee.
Ⅴ Eehe púlooŋ híyisanaayisan nii kíiti ya eti Pútuun pa eecoonoole. Ekina ewune efinicokee pakan kéetuuniye pinako cáwii ca citi Pútuun pa, ceewune ca ínniyemi ti kúnuul. Ⅵ Pútuun pa peecoonoole, efipikallan keekallane ka aluu, Ⅶ mpiyihan aluu keekallanee ka, niŋ unii lompo. Eehe efihitaako ta Ateeteyo Yéesu áfaayisanee ta ápufulii alacana ti seemak senfakat niŋ pumaleekoo pa piteyoo peetaake pa sempe. Ⅷ Afaasiiŋan ti pisiya kéemiit ka Pútuun pa, kéetuulut ka ekooŋan ya éesuume ya eti Ateeteyo Yéesu ati unaa. Ⅸ Efikasiiŋanee ti pisiya ti épucaloolo eti cancowiyaaw, nkálaaŋool niŋ Ateeteyo niŋ la ecaaŋ ya eti sempe sa siteyoo senfakat sa neeyem la, Ⅹ ti hinoom eeha áfaakey ha. Ti hinoom eehuu, áfaakey kati ámakiyanee ti pututa pakanoo keesampanee ka, kéeyinane ka púlooŋ nkaŋaŋo ti hamake ha hiteyoo. Aluu lompo efiniyeno toko, kamma ínniyinane eeha nuusoke ha aluu kiteyoo.
Ⅺ Ekina ewune nunuuluum kiti aluu tan óo tan. Nuuluum Pútuun pa piti unaa kati píhin aluu pakan kéetuuniye, eloŋ ya eti aluu neeyeno samat nii fa mpílafiye fa aluu nipiyeno ta mpiyonkale ta aluu. Alímaati piyankanan aluu tan óo tan niŋ sempe etempo ancuk kati níyini íhinu heenape eeha ínnilafiye ha íhinu, niŋ páhin empa inniyem pa ti íhinu kamma ínniyinane po. Ⅻ Uluumaaluum eehe ancuk caacaw ca citi Ateeteyo Yéesu ati unaa címakiyanee kamma aluu, aluu lompo ínnimakiyanee kamma akina. Eehuu efihitaako kamma kaasampan ka kiti Pútuun pa piti unaa niŋ Ateeteyo Yéesu Krista.