Leetal ya eepoñee ya pakati Kolos
Kolos
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci kicanaa.
Leetal eyya nuuyemaa fiye ti káasiitan, Póol akiice yo, akina ti núkuluma. Póol apoñapoñ a ati Eenucee ya, Yéesu Krista. Naakiic yo ti kéeyinane ka keeyem ka ti canku ya eeyem ya ti saatee ya eti Kolos.
Kéeyinane ka pakati Kolos, akee áyiin aŋa nkasok Epafulas akalaŋanii kiti ekooŋan ya éesuume ya. Epafulas Póol áwiyoo.
Po Kolos, intaako pakakee pikalaŋana keeyeniye kakalaŋan kéeyinane ka pikee pakalaŋanal peekufut niŋ ekooŋan ya éesuume ya eti Yéesu Krista. Hikee hinoom, Epafulas naakaay pati Póol pati núkuluma ya, naakamanoo heeyem ha ti pikaayu po. Tempo Póol naakiice leetal eyye ti kéeyinane ka keeyem ka Kolos. Póol naasokii nii, kañaŋaa hicoku kíp ti tooñaa eyya Epafulas naakalaŋanii ya. Timpi kacok eeha pakakee pikalaŋana pa nkayemii ha ti kakalaŋan. Naasokii nii, ekooŋan ya éesuume ya eti Yéesu Krista, ekina lamma eyina kafakan an.
Póol náayisanii nii, Eenucee ya ahaŋa sempe waah óo waah. Akina ayem Ateeteyo ati waah óo waah weeliilee, akina ayem Ateeteyo ati waah óo waah weeyem ti púlunta pa. Naasokii nii, eetaake Eenucee ya, ataakaataak waah óo waah ewwa naasoolahe. Háati niŋ pakakee paka kayeniyii kawufan pikee pakalaŋanal péeyeeni, mpitaak sempe; niŋ pakalaŋanal empuu pinakoolut niŋ piti Eenucee ya, eehuu púlooŋ hiti kincaam. Nene áyisanii, niŋ kataakaa Eenucee ya, waah wa weehaŋe wa panap nkataake, nkataak lompo waah óo waah ewwa nkasoolahe.
Póol náayisanii fa nkañaŋe eloŋ, samat nii kéeyinane ka ti ekooŋan ya éesuume ya. Naasokii kawaat eloŋ ya eemaamane ya, nkaloŋ nii pakan kéeyeeni, samat nii fa an nawaat wañ weemaamane náasoolo wañ wéeyeeni.
Náayisanii, fa eloŋ ya neeyem niŋ aayema áyiin eesaye, aal eenimiye, añii niŋ ekina tom amiikan.
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Inci Póol yem aluu ti hikiicu. Inci apoñapoñ a ati Yéesu Eenucee ya samat nii Pútuun pa fa mpílafiye fa, niŋ Timote an unaa ti káyinan, ukicanaa. Ⅱ Aluu keesampanee ka pakati Pútuun pa keeyem ka ti saatee ya eti Kolos, pakanam ti káyinan kéetuule ka Eenucee ya. Alímaati Pútuun pa Paapaa ati unaa pisampan aluu, mpuwufan aluu kásuumaay.
Póol kaluum ka kiteyoo niŋ hisoku ha hiteyoo apalaka
Ⅲ Nuusoksok tan óo tan apalaka Pútuun pa, Paapaa ya ati Ateeteyo Yéesu Krista ati unaa, niŋ uluumaa kiti aluu. Ⅳ Kaatuko úsiyaasi kiti káyinan ka kiti aluu ti Yéesu Eenucee ya, niŋ pálafi empa innitaake pa keesampanee ka púlooŋ pakati Pútuun pa. Ⅴ Nitaakaataak oom káyinan niŋ oom pálafi kamma waah ewwa ínnihine wa tewwo cíki, weemankee wa alacana kamma aluu. Nifiyaafiyo ínnisiye ewwuu ti ekooŋan ya eti pánipani ya, eeyem ya ekooŋan ya éesuume ya.
Ⅵ Samat nii enuun eenape fa néyankii neepuk papukal peenape, fo lompo incuke, ekooŋan ya éesuume ya yoopiya ti ehancaloolo pan óo pan ti púlunta pa, néehin pakan paka kapuloŋ samat nii Pútuun pa fa mpílafiye fa. Fiyuu lompo néehine ti aluu kápiliŋ ta ínnisiye ta ínnimeyi panap pa piti Pútuun pa ti tooñaa ya. Ⅶ Epafulas, eeyem ya áwii unii amiikan, akalaŋane ho aluu. Akina áhina eehintiyee ati Eenucee ya ati Pútuun pa, náayemi ti páhin ti aluu, ti putum unii.*1:7 Niŋ fotom: náayemi ti páhin ti putum aluu. Ⅷ Akina asoke unii pálafi empa Kunuu ka keenape ka nkuwufane ka aluu.
Ⅸ Ekina ewune, unii lompo, kápiliŋ núusiye eehuu, úyekuniit kaluum Pútuun pa kiti aluu. Nuuluum kati píhin aluu nípimeyi pántoon eeha mpílafiye ha, Kunuu ka keenape ka nkuwufan aluu kameye niŋ ecohato. Ⅹ Fiyuu, eloŋ ya eti aluu efeecuk samat nii pakan paka pakati Ateeteyo fa nkañaŋe fa eloŋ, ínnihin lompo tan óo tan eeha náalafiye ha. Eloŋ ya etaaluu neetaak papukal peenape, pikina piyem waah óo waah weenape ewwa ínnihin; ínnimeyi Pútuun pa pihaŋhaŋ toko. Ⅺ Nuuluum lompo kati puwufan aluu sempe séefulii ti sempe etempo seemaka sa, ancuk kati nitaak sempe ti waah óo waah. Fiyuu efinitaak tan óo tan kamukut, innicok lompo piliit niŋ pásuuma Ⅻ innisok Paapaa ya apalaka. Akina éehine ya aluu kati níyini hitaaku himpaac ti eeha naamanke ha pakanoo keesampanee ka, ti cáwii ca citi ecaaŋ ya. ⅩⅢ Kaatuko áfulanaafulan unaa ti sempe sa siti énimaan ya, náacoopii unaa ti cáwii ca citi Añiinoo aŋa náalafiye ya. ⅩⅣ Añiinoo awune nuufakanee, umuuyen wa uti unaa nuuponketee.
Eenucee ya ihaŋu ha hiteyoo hiti waah óo waah
ⅩⅤ Eenucee ya ati Pútuun pa ayem anakool a tak ati Pútuun pa peecukantee pa. Akina ayem Añii ya áyaañ a, naahaŋ waah óo waah weeliilee. ⅩⅥ Kaatuko pínapii teyoo Pútuun pa mpiliile waah óo waah weeyem patiila niŋ t’etaam, ewwa nuucukee wa niŋ weecukantee wa, pumaleekoo pa piti sempe sa, pumansa pa niŋ pakati kikaw ka, niŋ keetaake ka sempe púlooŋ. Waah óo waah uliileeliil pínapii teyoo úpinapiyanoo. ⅩⅦ Eenucee ya ataakaataako le niŋ waah óo waah efuutaako, apan ti akina waah óo waah nuutowo ti pitaako. ⅩⅧ Akina ayem hikaw ha, kéeyinane ka kayem eniinoo. Akina ayem píyaañ pa, áyaañ a éelitaniyee ya ti eket ya, kati ayeno áyaañ a ti waah óo waah. ⅩⅨ Kaatuko Pútuun pa pílafilafi púmpuluŋ etempo pipikin ti Eenucee ya. ⅩⅩ Pínapii teyoo Pútuun pa mpúsuumoole niŋ waah óo waah kamma hísim ha hiteyoo heeniisee ha ti kuluwaa ya. Fiyuu mpíhine kásuumaay kipitaako ti pututa etempo niŋ waah óo waah weeyem patiila niŋ t’etaam.
ⅩⅪ Aluu lompo, nílaaŋaalaaŋ hínum Pútuun pa, inniyeno pikamool etempo kamma heenaput eeha ínnimiilool ha ínnihin. ⅩⅫ Pale fiye, Pútuun pa píhinaahin aluu nípisuumool nempo pínapii ti eket ya eti Añii etempo. Akina acuke kúnuul ti eniinoo, ancuk kati níyini pisiiŋo hátikin etempo samat nii pakan keemuuyenut nkakuul, an átayini kawatan aluu ti waah. ⅩⅩⅢ Pale niñaŋaa putowo ti hicoku piliit ti káyinan ka, innisiiŋo kíp tenko. Timpi niyesan puson aluu ti cíki eyya innitaake ya kápiliŋ ta ínnisiye ta ekooŋan ya éesuume ya. Ekooŋan eyyuu étuunanee-túunan pakan paka púlooŋ ti etaam ya, apan inci Póol, páhinam fiye káatuunan eteyyo.
Póol páhin pa piteyoo piti káatuunan hilim ha kéeyinane ka
ⅩⅩⅣ Fiye inci taakaa pásuuma ti kúnuul enka inci iyyem ka ti hicuku kamma aluu. Kaatuko loŋaa ti hicuku kúnuul ti eniinam fo fiye, ancuk kati yíni kayankanan enii ya eti Eenucee ya ati Pútuun pa, eeyem ya kéeyinane ka. Pínapii ti kúnuul ka kutoom, inci oopa ti kaahankan ñíyoka ña ñeetowiye ña ñiti Eenucee ya. ⅩⅩⅤ Inci fiye áhina ati kéeyinane ka. Pútuun pa puwufanaam páhin empe kati hín po kamma aluu: púpoñiyaampoñ kati túunan hilim etempo púlooŋ. ⅩⅩⅥ Hilim eehe, píyisanut ho símaama unaa. Pale fiye, mpíyisan ho pakan etempo keesampanee ka. ⅩⅩⅦ Pílafiyiilafi káyisan nii, eeha mpihintane ha íhinu, apan píyisanut ho an hínum, eehuu hiyem hisaanumate henfakat, eeha efihiyeno heenape ti písii pa púlooŋ. Hikina hiyem: Eenucee ya oopa ti aluu, cíki ya eti hamake ha heeyem ha ti ékey. ⅩⅩⅧ Unii, kiti Eenucee ya aŋe núutuunan Pakan paka. Núukupanan an óo an, nuukalaŋan an óo an ti ecohato ya púlooŋ eyya Pútuun pa mpuwufane ya unii, ancuk an óo an náayini pisiiŋo hátikin Pútuun pa samat nii an éetuuniye ti Eenucee ya. ⅩⅩⅨ Eehe hiwune inci íyyemi ti páhin niŋ kaañañatool niŋ sempe ensa Eenucee ya nawufanam sa, ínsiyemi ti páhin ti inci niŋ sempe.