Leetal ya eepoñee ya pakati Efes
Efes
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci kicanaa.
Leetal eyya nuuyemaa ya fiye ti káasiitan, eekiice yo ya, akina ayem Póol apoñapoñ a ati Eenucee ya, Yéesu Krista. Ta naakiice yo ta, inhemool akina ti ékuluma. Ti pakayme naakiice yo? Ti canku ya eeyem ya ti saatee ya eti Efes naakiice yo, pale pikee pa náalafi pikee picanku pa pipikalaŋ yo lompo.
Ti leetal eyye, Póol asokaasok nii, le niŋ Pútuun pa efipiliil púlunta pa, pipayaapa hitaaku henfakat eeha mpikaakaay íhinu. Henfakat eehuu, píyisanut ho an, pale fiye mpíyisan ho Póol niŋ pakakee pupoñapoñ pa. Hikina hiyem káasuumanool nempo kéeyinane ka púlooŋ ti Eenucee ya, kéefulii pan óo pan ti púlunta pa, kapiyeno kayoŋ koonool, ekina eyem Canku ya. Eenucee ya ayem ati hikaw ha ati Canku ya.
Póol aloomaaloom hisoku ti leetal eyye nii, niŋ úyinanaa ti Eenucee ya, “unaa unka ti Eenucee ya”, ekina eyem, “unaa pakoonool niŋ Eenucee ya”. Ekina eyem, pan óo pan pa Eenucee ya naayem, unaa lompo unka po. Waah óo waah weetaakiye Eenucee ya, efi lompo utaako unaa. Náayisan nii, eloŋ ya eti unaa ecenkeecenk ti Eenucee ya. Naasok nii, Canku ya, ekina eyem enii ya, Eenucee ya, akina ayem hikaw enii eyyuu. Naasok nii, Canku ya, ecukaacuk samat nii aal, Eenucee ya ayem áyiinoo. Canku ya, ekina eyem ekumpaan ya, Eenucee ya, akina ayem énankiin ya eenaŋee ya ti tonkoŋ ya eeyekane ya ekumpaan ya.
Náayisan nii, Eenucee ya, akina ayem ati hikaw ha hiti sempe sa púlooŋ. Náayisan nii, niŋ Seetaani ya elaakiyaa unaa, uñaŋaa puwaso, niŋ ekina tom púsoolo, pucoolaŋ pa piti hikam ha, empa Pútuun pa mpuwufane pa unaa, kati úyiniyaa pisiiŋo kíp ti pítaakool empuu.
Póol náayisan lompo fa kéeyinane ka nkañaŋe fa eloŋ. Kañaŋaa pílafooli. Niŋ aayema áyiin eesaye, niŋ fotom aal eenimiye, niŋ fotom añii, niŋ fotom amiikan, niŋ fotom eetaake amiikan, Póol áyisanaayisan fa aññaŋe eloŋ samat nii anapana Yéesu Krista.
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Inci Póol, apoñapoñ ati Yéesu Eenucee ya samat nii fa Pútuun pa mpílafiye fa, kicanaa aluu. Iyyémi ti hikiicu aluu pakan paka keesampanee ka pakati Pútuun pa keeyem ka ti saatee ya eti Efes te nkacok kíp ti Yéesu Eenucee ya. Ⅱ Alímaati Pútuun pa Paapaa ati unaa niŋ Ateeteyo Yéesu Krista kasampan aluu nkawufan aluu kásuumaay.
Kaasampanee ti Eenucee ya ati Pútuun pa
Ⅲ Umúlaa Pútuun pa, peeyem pa Pútuun pa piti Ateeteyo ati unaa Yéesu Krista, mpíyemi lompo Paapaa ateyoo. Pisampanaa-sampan unaa niŋ pasampanal óo pasampanal péefulii alacana empa an naayinaat hicuku, kamma nuuyemaa ti Eenucee ya. Ⅳ Pútuun pa pimamalaamamal unaa kamma Eenucee ya. Píliilum púlunta pa mpimamale unaa ancuk kati uyeniyaa pakan keesampanee nkakuul hátikin etempo. Mpílafi kati uyeniyaa pakan payenka an naayinaat kawatan ti waah. Kamma mpílafiye unaa, Ⅴ mpifiyo mpimamale unaa upiyeniyaa epuuk etempo, pínapii ti Yéesu Krista. Eehuu mpílafiye íhinu, kamma nihiwufane po pásuuma, Ⅵ ancuk kati úmulaa panap etempo penfakat pa. Panap empuu mpuwufane unaa haahaw pínapii ti Añii etempo aŋa mpílafiye ya meemak. Ⅶ Uyeniyaayeno ti himiikanate hiti eket niŋ kaamuuyen, pale Pútuun pa mpunoom unaa mpifakan unaa. Niŋ hísim ha hiti Eenucee ya mpunoome unaa, umuuyen wa uti unaa nuuponketee. Fiyuu Pútuun pa mpíyisane unaa panap etempo penfakat pa. Ⅷ Oom panap mpuwufane unaa fo muus, pinapool niŋ ecohato ya niŋ píyiyo pa púlooŋ. Ⅸ Mpíyisan unaa eeha mpihintane ha faw íhinu, eeha mpíyisanut ha hínum. Efípihin ho pínapii ti Eenucee ya, samat nii fa ínsuume po fa. Ⅹ Mpihankan ho ti pikelan púlunta pa. Efipuconcenool waah óo waah weeyem patiila niŋ t’etaam, ancuk Eenucee ya kati ayeno ati hikaw ha.
Ⅺ Samat nii fa nuuyemaa fa ti Eenucee ya, utaakaataak himpaac ti Pútuun pa. Utaakaataak himpaac eehuu kamma mpimamale unaa píliilum púlunta pa samat nii fa mpihintane fa. Pikina piyem empa mpíhin pa waah óo waah ti pálafi etempo, Ⅻ ancuk hamake etempo hímulee kamma unii kéetikine ka úhin cíki ti Eenucee ya. ⅩⅢ Aluu lompo, ínnisi hilim ha hiti tooñaa ya, ekooŋan ya éesuume ya eti kafakan ka kiti aluu. Ta ínniyinane ta, Pútuun pa mpuwufan aluu lánkamaasi, pípiyisan nii aluu pakati Eenucee ya. Lánkamaasi eyyuu eyem Kunuu ka keenape ka enka Pútuun pa mpíyinanane ka unaa. ⅩⅣ Kunuu ka keenape ka kiyem heewune ha núumeyiyaa nii efuusayaa eeha Pútuun pa mpimanke ha unaa. Eehuu, efuusayaa ho niŋ ufakanee pántoon. Ancuk hamake ha hiti Pútuun pa hímulee.
Kaluum ka kiti Póol kiti pakati Efes
ⅩⅤ Ekina ewune, emma inci ínsiye ma nii níyinanaayinan ti Ateeteyo Yéesu ínnilafi pakan paka púlooŋ keesampanee ka pakati Pútuun pa, ⅩⅥ yékuniit hisoku Pútuun pa apalaka kamma aluu. Niŋ inci yeniyaa kaluum ínnawuno aluu. ⅩⅦ Inci illuumluum Paapaa ya eemaka ya, Pútuun pa piti Ateeteyo Yéesu Krista ati unaa, ancuk kati puwufan aluu kunuu kiti ecohato mpíyisanoolo ti aluu, kati nímeyi po pántoon. ⅩⅧ Illuum lompo Pútuun pa kati pípankin kunuu aluu, mantefa ínnimeyi cíki ya enfakat eyya mpiyonkale ya aluu teyyo niŋ hisaanumate ha henfakat ha eeha mpimanke ha pakan etempo keesampanee ka. ⅩⅨ Illáfi kati nímeyi lompo sempe sa senfakat sa siti Pútuun pa seetaakut sa pilehu, seeyem sa ti páhin ti unaa kéeyinane ka. Aŋuu sempe sa senfakat sa soonool suu nii ⅩⅩ séelitanii sa Eenucee ya ti eket ya insiyenanoo kayen ti epees yáali etempo alacana. ⅩⅪ Po, Eenucee ya ayem patiila pumaleekoo pa piti sempe sa niŋ piseetaani pa, pakati kikaw ka niŋ keetaake ka sempe púlooŋ. Naayenanee patiila caacaw óo caacaw ceeluwee, neetaat féefiye lamma pale fo cancowiyaaw. ⅩⅫ Pútuun pa mpinaŋ waah óo waah t’etaam wootoo, mpisiiŋanoo apiyeno ati hikaw ha ati waah óo waah kati píhin heenape kéeyinane ka púlooŋ. ⅩⅩⅢ Kéeyinane ka kayem enii Eenucee ya, apan náayemi teyii naameeŋanii tuk, akina eemeeŋane ya waah óo waah pántoon.